Улстөр нийгэм
АНУ-ын сенатор Боб Менендезийг авлигын хэргээр шүүж байна
АНУ-ын сенатор Боб Менендезийг авлигын хэргээр шүүж байх явцад түүний өмгөөлөгч нар түүний эхнэрийг тус хэрэгт буруутгахыг оролдсон ба шүүх хурал болсон өдрийн маргааш Боб Менендез эхнэрийгээ хөхний хорт хавдартай болохыг илчилсэн байна.
Боб Менендезийг Египет, Катарын засгийн газарт болон Нью Жерсигийн бизнесменүүдэд тусалсныхаа төлөө хахууль авсан, тэр дундаа алтан гулдмай авсан хэрэгт буруутгаж байгаа юм.
Боб Менендезийн эхнэр Надине Менендез нь уг хэргийн хамсаатан боловч түүнийг тусад нь шүүнэ гэв. Шүүгдэгч талын хоёр хоёулаа Боб Менендезийн карьерт нөлөөлж байгаа уг хэргийг үгүйсгэж байгаа.
Ноён Менендез пүрэв гаригт хийсэн мэдэгдэлдээ түүний 57 настай эхнэр нь хөхний хорт хавдрын 3-р зэрэгтэй гэсэн оноштойгоор мастэктомын мэс засалд орно гэж хэлжээ.
Тэрээр хэлэхдээ хатагтай Менендез нь түүнээс өөрийнх нь эрүүл мэндийн нөхцөл байдлын талаар нийтэд илчлэхийг хүссэн гэв. Учир нь хатагтай Менендезийг хэвлэлийнхэн байнга дагаж, сэтгүүлчид асуултаар булдаг тул тэрээр эрүүл мэндийн байдлаа нийтэд дэлгэхийг хүсчээ.
“Мэдээж бид өвчний байдал хүндрэх асуудалд санаа зовж байна” гэж сенатор нэмж хэлжээ.
Түүний авлигын хэргийг тангарагтны шүүгчид хэлэлцэж байх үед Холбооны мөрдөх товчооны ажилтан хэлэхдээ Нью-Жерси мужийн Энглвуд Клиффс дэх Менендезийн гэрт хийсэн ажиллагаагаар олдсон бүх бэлэн мөнгийг тоолохын тулд нэмэлт хүч дуудах шаардлагатай болсон гэв.
Холбооны мөрдөх товчооны ажилтан Аристотелис Кугемитросын хэлснээр тэд нийтдээ 486,000 долларыг (383,000 фунт) бэлэн мөнгөөр хураан авсан ба эдгээр бэлэн мөнгөнүүдийг байшингийн эргэн тойрон, булан тохой бүрд янз бүрийн зүйлд чихэж хийсэн байжээ. Жишээлбэл Burberry цүнх, бор цаасан уут, шар гялгар уут, хүрэм, жижиг хар цүнх, Тимберландын гутал зэрэг.
Ноён Кугемитрос шүүхэд хэлэхдээ “Та бүгдийн гэрэл зургаас харж байгаачлан олдсон мөнгөн дэвсгэртүүдийг гараар тоолоход хэтэрхий их байсан” гэв.
Мөн 0.02 кг (1 oz) жинтэй 11 ширхэг “мини” алтан гулдмай, тус бүр 1 кг жинтэй хоёр ширхэг алтан гулдмайг хураан авсан ба тэдгээрийг шүүгчдийн бүрэлдэхүүнд шилжүүлэн өгчээ.
Прокурорууд шүүх хурлын нээлтийн мэдэгдэлдээ 2006 оноос хойш сенатчаар ажиллаж байгаа ноён Менендезийг "хахууль авахын тулд ард түмнээсээ урвасан" гэж мэдэгджээ.
Түүний гэрээс олдсон бэлэн мөнгө болон алтан гулдмайг Египетийн албан тушаалтнууд Вашингтон дах улс төрийн ашиг сонирхлын зорилгоор бэлэглэсэн гэж тэд мэдэгджээ.
Прокурор Лара Померанц нь ноён Менендезийг энэ хэргийн хамсаатан Египет гаралтай Америк бизнесмен Ваэль Ханатай холбоотой эрүүгийн хэрэгт хөндлөнгөөс оролцож нөлөөснийхөө хариуд Мерседес Бенз машин авсан гэж буруутгасан.
Мөн хатагтай Менендезийг эдгээр хээл хахуулийн хэргүүдийн зуучлагч гэж буруутгаж байгаа юм.
Харин ноён Менендезийн өмгөөлөгч Ави Вайцман үйлчлүүлэгчээ авлига аваагүй, хууль зөрчөөгүй гэж мэдэгджээ. Тэрээр зарим алтан гулдмай нь хатагтай Менендезийнх байсан гэж нэмж хэлэв.
Шүүх хурлын үеэр ноён Вайцман бурууг сенаторын эхнэрт шилжүүлэхийг хичээж, түүний эхнэр нь түүнийг санхүүгийн нээлттэй бус байдалд байлгадаг байсан гэж хэлсэн ба хосууд тусдаа банкны данстай байсан гэв.
Ноён Менендезд бэлэн мөнгө, алтан гулдмай өгсөн хэрэгт буруутгагдаж буй хэргийн хамсаатнууд болох Ноён Хана болон Нью Жерсигийн үл хөдлөх хөрөнгө хөгжүүлэгч Фред Дайбес нар нь хатагтай Менендезийн олон жилийн дотны найзууд, мөн тэд дандаа хоорондоо бэлэг солилцдог байсан гэж тэдний өмгөөлөгч нар хэлжээ.
Ноён Ханагийн өмгөөлөгч Лоуренс Лустберг хэлэхдээ "Бэлэг болгоныг хахууль гэж битгий хэлээрэй" гэв.
Ноён Менендез Сенатын Гадаад харилцааны хороонд таван жил гаруй хугацаанд даргаар ажиллаж байх үедээ АНУ-ын гадаад бодлогод давамгай нөлөөлж байсан. Түүнийг яллагдагчаар татсаны дараа албан тушаалаас нь чөлөөлсөн.
Түүнийг хээл хахууль авсан, бусдын эд хөрөнгийг залилан мэхэлсэн, шүүхийн үйл ажиллагаанд саад учруулсан зэрэг 16 гэмт хэрэгт буруутгаж байгаа бөгөөд хэрвээ гэм буруутай нь тогтоогдвол хорих ялаар шийтгэгдэх юм.
Хатагтай Менендезийг хахууль, авлигын хэргээр долоодугаар сард шүүнэ.
Улстөр нийгэм
Ерөнхийлөгч У.Хүрэлсүх ХБНГУ-ын Ерөнхийлөгчийн урилгаар төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүх ХБНГУ-ын Ерөнхийлөгч Франк-Вальтер Штайнмайэрийн урилгаар 2026 оны 10 дугаар сарын 19-22-ны өдрүүдэд төрийн айлчлал хийнэ.
Айлчлалын үеэр хоёр улсын Ерөнхийлөгч албан ёсны хэлэлцээ хийж, харилцаа, хамтын ажиллагааг харилцан ашигтай худалдаа, эдийн засаг, боловсрол, шинжлэх ухаан, соёлын салбарт өргөжүүлэн хөгжүүлэх асуудлаар ярилцана.
Мөн “Монгол Улс, ХБНГУ хоорондын Хамтарсан тунхаглал” байгуулж, “Стратегийн түншлэл”-ийг өргөжүүлэн бэхжүүлэх хамтын ажиллагааны тэргүүлэх чиглэлээ тодорхойлно.
Төрийн тэргүүн нар Берлин хотноо гаргах “Чингис хаан ба Монголчуудын ертөнц” үзэсгэлэнгийн нээлтэд оролцоно.
Айлчлалын хүрээнд “Монгол-Германы бизнес форум”, “Монгол-Германы шинжлэх ухааны өдөрлөг”, “Монгол ба монголын дараах үеийн Евроази дахь соёлын солилцоо, байгаль орчин” олон улсын эрдэм шинжилгээний хурал, зохиолч Д.Нацагдоржийн мэндэлсний 120 жилийн ойд зориулсан эрдэм шинжилгээний олон улсын бага хурал болно.
ХБНГУ-ын Ерөнхийлөгч хоёр улсын хооронд дипломат харилцаа тогтоосны 50 жилийн ойн хүрээнд 2024 онд манай улсад төрийн айлчлал хийж, нийтлэг үнэт зүйлд суурилсан харилцааг ахиулж, “Стратегийн түншлэл”-д хүргэсэн юм.
Улстөр нийгэм
Нийслэлийн ногоон бүсэд орц, гарц хаасан, зөвшөөрсөн хэмжээнээс хэтрүүлэн хашаа барьсан зөрчлүүдийг арилгаж байна
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва наймдугаар сарын 26-нд нийслэлийн Сүхбаатар, Чингэлтэй дүүргийн нутаг дэвсгэр дэх ногоон бүс, ойн сан бүхий зуслангийн 26 аманд ажилласан. Энэ үеэр ойн сан бүхий, ногоон бүсэд иргэдийн чөлөөтэй зорчих, амарч зугаалах орц, гарцыг хаасан, зөвшөөрөгдсөн хэмжээнээс хэтрүүлэн хашаа барьсан, эзэмшил газраа зориулалтын дагуу ашиглаагүй зэрэг зөрчилтэй нэгж талбаруудын газар эзэмших эрхийг цуцалж, зөрчлийг арилгахыг холбогдох албаныханд үүрэг болгосон.
Энэ хүрээнд өнөөдрийн байдлаар нийслэлийн дөрвөн дүүргийн хэмжээнд зөрчилтэй 407 нэгж талбарын газар эзэмших эрхийг хүчингүй болгож, зөрчлийг арилгах, нийтийн эзэмшлийн орц, гарцыг чөлөөлөх ажил үргэлжилж байна.
СХД-ийн Газар зохион байгуулалтын албаны Газар зохион байгуулалт хариуцсан мэргэжилтэн Г.Мөнхзул “Нийслэлийн Засаг даргаас өгсөн үүргийн дагуу ойн сан бүхий газарт иргэдийн зорчих орц, гарцыг хаасан, зөвшөөрөгдсөн хэмжээнээс хэтрүүлэн хашаа барьсан, мод сүйтгэн газар ашигласан зэрэг зөрчилтэй нэгж талбаруудын газар эзэмших эрхийг цуцлах, газрын зөрчлийг арилгах, нийтийн эзэмшлийн орц, гарцыг чөлөөлөх ажлыг зохион байгуулж байна. Энэ хүрээнд Сонгинохайрхан дүүргийн хэмжээнд нийт 83 нэгж талбарт зөрчил арилгах, газар эзэмших эрхийг хүчингүй болгох юм. Өнөөдрийн байдлаар 37 нэгж талбарын газар эзэмших эрхийг дуусгавар болгож, 46 нэгж талбарын газар эзэмших эрхийн гэрчилгээг хүчингүй болгохтой холбоотой сонсох ажиллагаа үргэлжилж байна. Мөн 10 байршилд орц, гарцыг чөлөөлөөд байна. Тухайлбал, 21 дүгээр хороо, Жаргалантын аманд нэг байршлын 400 метр, Ар гүнтэд хоёр байршлын 14 метр, 34 дүгээр хорооны Баянголын аманд нэг байршлын 1,996 метр, 42 дугаар хорооны Зүүн салааны зуслангийн бүсэд нэг байршлын 268 метр урттай зөвшөөрөлгүй төмөр хашааг албадан буулгаж, орц, гарцыг чөлөөлсөн” гэв.
ЧД-ийн Газар зохион байгуулалтын албаны Газар зохион байгуулалт хариуцсан мэргэжилтэн Б.Бат-Оргил “Чингэлтэй дүүргийн ойн сан бүхий газарт ашиглалтгүй байсан 67 нэгж талбарын газар эзэмших эрхийг хүчингүй болгосон. Түүнчлэн дүүргийн 23, 24 дүгээр хорооны нутаг дэвсгэрт зөвшөөрөгдсөн хэмжээнээс хэтрүүлэн хашаа барьсан, иргэдийн ногоон бүсэд чөлөөтэй зорчих эрхийг хязгаарласан нийт 70 нэгж талбарт илэрсэн зөрчлийг үе шаттайгаар арилгаж байна” гэлээ.
СБД-ийн Газар зохион байгуулалтын албаны ахлах мэргэжилтэн Н.Чинсанаа “Сүхбаатар дүүргийн Газар зохион байгуулалтын албанаас “Ногоон бүсээ хамгаалъя” аяны хүрээнд кадастрын зурагт тусгасан хэмжээнээс хэтрүүлэн хашаа барьсан зөрчилтэй есөн нэгж талбарын байршлыг өөрчилж, иргэдийн чөлөөтэй, саадгүй зорчих нөхцөлийг бүрдүүлэн орц, гарцыг чөлөөлөөд байна. Эзэмшил бүхий газраа зориулалтын дагуу ашиглаагүй, газар дээрээ бодит ашиглалт хийгээгүй 178 иргэний газар эзэмших эрхийн гэрчилгээг хүчингүй болгосон. Газрын зөрчил арилгасан байршлуудад дахин хашаа барих, зөрчил давтан гаргахаас урьдчилан сэргийлэх зорилгоор тухайн хороог хариуцсан болон газар зохион байгуулалт хариуцсан мэргэжилтнүүд долоо хоног бүр хяналт тавин ажиллаж байна” гэсэн юм.
БЗД-ийн Газар зохион байгуулалтын албаны Газар зохион байгуулалт хариуцсан мэргэжилтэн Б.Гантогтох “Баянзүрх дүүргийн хэмжээнд нийт 10 байршлын 112 га талбайд дрон нисгэж, боловсруулалт хийж, судалгааг нэгтгэсэн. Энэ хүрээнд ойн сан бүхий газарт ашиглалтгүй байсан 68 нэгж талбарт холбогдох сонсох ажиллагааг зохион байгуулж, газар эзэмших эрхийг дуусгавар болгосон. Харин зургаан нэгж талбарын газар эзэмших эрхийг дуусгавар болгох асуудал дүүргийн Засаг даргын захирамжийн төслийн шатанд хянагдаж байна. Зөвшөөрсөн хэмжээнээс хэтрүүлэн хашаа татсан, ойн сан бүхий газарт нэвтрэх орц, гарцыг хаасан зөрчилтэй нэгж талбаруудыг чөлөөлж, иргэдийн зорчих эрхийг хангах ажил үргэлжилж байна. Газар албадан чөлөөлөхөөс өмнө хуульд заасан журмын дагуу сонсох ажиллагааг зохион байгуулж, иргэдэд 14 хоногийн өмнө мэдэгдэл хүргүүлэх, эзэнгүй хашаанд мэдэгдэх хуудас байрлуулах зэрэг арга хэмжээ авдаг. Ийнхүү газар чөлөөлөх ажиллагааг холбогдох хууль, журмын дагуу хэрэгжүүлдэг” гэв.
Улстөр нийгэм
Орон сууцны мэдээллийг QR кодоор бүртгэлжүүлж, иргэдийг залилангийн гэмт хэргээс урьдчилан сэргийлнэ
Орон сууцын залилах гэмт хэргээс урьдчилан сэргийлэх арга хэмжээний тухай Засгийн газрын тогтоол батлагдлаа.
Барилгын ажил эхлүүлэх зөвшөөрлийг аймаг, нийслэлийн Засаг дарга олгож, уг зөвшөөрлийн үндсэн дээр компаниуд захиалгаа авдаг. Мөн зөвшөөрөлгүйгээр ч сууц, талбайн захиалга авч байна. Захиалгын гэрээ байгуулахдаа тухайн сууц, талбай өмнө нь захиалагдсан эсэхийг шалгах боломжгүйгээс давхар захиалга хийгдэж, иргэд залилах гэмт хэргийн хохирогч болсоор байна. Өнөөдрийн байдлаар 2,569 иргэнд 206.0 тэрбум төгрөгийн хохирол учирчээ.
Ерөнхий сайдын 2026 оны 154 дүгээр захирамжаар “Орон сууцын захиалгын гэрээний улмаас хохирсон иргэдийн хууль ёсны эрх, ашгийг хамгаалах асуудлыг холбогдох хууль тогтоомжийн хүрээнд шалгаж, үүсээд байгаа нөхцөл байдлыг шийдвэрлэх” үүрэг бүхий Ажлын хэсэг байгуулсан.
Хохирогчдын тоо нэмэгдэх эрсдэлтэй байгаа тул холбогдох төрийн байгууллагад байгаа мэдээллийг нээлттэй, ил тод болгож, иргэн, хуулийн этгээдийг урьдчилан сэргийлэх боломжтой үнэн зөв мэдээллээр хангах зайлшгүй шаардлага үүсжээ.
Засгийн газрын энэ тогтоолоор аймаг, нийслэлийн Засаг дарга барилгын ажлын зөвшөөрлийн гэрчилгээ, тухайн барилгын хаягийн болон хот байгуулалтын мэдээллийн сангийн бүртгэлд бүртгэсэн байршлын урьдчилсан хаяг, давхрын зохион байгуулалтын зураг, сууц, талбайн хаалганы дугаар болон хаалганы дугаар бүрээр үүсгэсэн QR код бүхий дахин давтагдашгүй дугаар зэрэг мэдээллийг барилгын ажил эхлүүлэх зөвшөөрөл олгосноос хойш ажлын гурван өдөрт Улсын бүртгэлийн ерөнхий газарт цахимаар хүргүүлэхийг үүрэг болголоо. Мэдээлэлд өөрчлөлт орсон тохиолдолд шинэ мэдээллийг мөн гурванөдөрт цахимаар хүргүүлнэ.
Улсын бүртгэлийн байгууллага барьж дуусаагүй орон сууцын барилгын сууц, талбайд урьдчилсан тэмдэглэл, захиалгын гэрээ хийгдсэн тохиолдолд эдгээр тэмдэглэлийн төлөв, тэдгээрийн өөрчлөлтийг албан ёсны цахим хуудсаар мэдээлнэ.
Ингэснээр иргэн, хуулийн этгээд сууц, талбай захиалгын гэрээ байгуулахаас өмнө тухайн сууц, талбайд өмнө нь захиалга, эсхүл урьдчилсан тэмдэглэл хийгдсэн эсэх зэрэг мэдээлэлд үндэслэн гэрээ байгуулах эсэх шийдвэр гаргах, учирч болзошгүй эрсдэлийг урьдчилан тооцох боломж бүрдэнэ гэж үзлээ.
