Бидэнтэй нэгдэх

Үзэл бодол

Ерөнхийлөгч Х.Баттулга ард түмэндээ хандан уриалга гаргалаа

Огноо:

,

Монгол Улсын Ерөнхийлөгч Х.Баттулга өнөөдөр ард түмэндээ хандан  зургаан зүйл бүхий уриалга гаргалаа.

УРИАЛГАД:

“Сүүлийн үед коронавирусний тахал, нефтийн үнийн уналт, дэлхийн санхүүгийн зах зээлийн уналтаас үүдэн эдийн засагт даяар хямрал нүүрлэн ирлээ гэж дэлхийн бараг бүх эдийн засагчид дүгнэж, Засгийн газрууд нүүрлэн буй хямралын цохилтыг зөөлрүүлэх, даван туулахад бүхий л хүч анхаарлаа тавьж эхлэв.

Бидний мэддэг, дасал болсон эдийн засгийн даяар систем маш богино хугацаанд танигдахын аргагүй өөрчлөгдөж эхэллээ. Орчин үеийн дэлхийн эдийн засаг цоо шинэ асуудалтай тулгарсан ба энэ нь дэлхийн үйлдвэрлэлийн хэмжээ хүн амын худалдан авах боломжоос хэт даван гарсан явдал аж.

Олонх аналитикууд 2020 оны зун, намраас дэлхийн эдийн засагт бодит секторын хямрал болж, нэлээд удаан үргэлжилнэ гэж үзэж байна. Дэлхийн бүх улс орнууд хямралд бэлтгэж эхэллээ.

Өнгөрсөн зууны 80-аад онд бүрэлдэж бий болсон эрэлтийг урамшуулдаг систем ажиллахаа больсон байна. Үүний улмаас хүн амын эрэлтийг хязгаарлах механизм, үүний дотор хорио цээрийн улмаас хамгийн эхлээд дэлхийн эдийн засгийн болон тээврийн ложистик систем эвдрэх аж. Үүний улмаас ХХ зууны 30-аад онд АНУ-д болсон “Их хямрал” (депресси)-тай дүйцэхүйц нөхцөл байдал үүснэ гэж мэргэжилтнүүд санал нэгтэй дүгнэж байна.

Нүүрлэн буй эдийн засгийн даяар хямрал түүхий эдээ экспортлох баримжаатай, “либерал хандлагатай” эдийн засагт илүү хүндээр тусна гэсэн зарим мэргэжилтний дүгнэлт манай Монголд туйлын их хамаатай.

Коронавирусний тахлын эсрэг бид одоохондоо чамгүй сайн тэмцэж байгаа боловч үнэнийг хэлэхэд энэ арга хэмжээнд асар их мөнгө урсгаж байна. Нөхцөл байдал энэ хэвээрээ удвал манай эдийн засаг энэ их ачааллыг удаан даахгүй нь ойлгомжтой. Үүний дээрээс дэлхий даяар хямрал болж, эдийн засгийн болон ложистик систем эвдэрч, эрдэс баялаг, түүхий эдийн эрэлт буурах аваас юу болохыг төсөөлөхөд бэрх.

Иймээс Би Монгол Улсын Ерөнхийлөгчийн хувьд улс нийтээрээ гарцаагүй нүүрлэн ирсэн даяар хямралд бэлтгэж, түүнийг даван туулах цогц арга хэмжээг яаралтай төлөвлөж, хэрэгжүүлж эхлэх нь зүйтэй хэмээн үзэж энэ уриалгыг гаргаж байна.

Хэрэв бид эдийн засгаа хямралын нөхцөлд зохицуулан зөв зохион байгуулж чадвал түүнийг гарз хохирол багатай даван туулах баялаг, хүн хүч, хөрөнгийн нөөц хангалттай байгаа гэдгийг онцлон дурдаж байна. Манай улсад бусад оронд болдог шиг юу юугүй өлсгөлөн, гачлан болохгүй гэдэгт би итгэлтэй байна. Хэдий ийм ч бид бүхэн Монголын буяныг хямгадах, хэмнэх, зохистой зарцуулах цаг ирж байна.

Хямрал хаяанд ирээд хаалга тогшиж байхад манай улс төрийн намууд ямар ч тооцоо судалгаагүй атлаа сонгуулийн том том мөнгөн амлалт өгч байгаа нь оргүй худлаас гадна тэд цаг үеэ огт мэдрэхээ байсны баттай шинж мөн. Манай улс төрийн намууд хийгээд түүний бараг бүх удирдагчид “улс төрийн хямрал нүүрлэсэн” гэж дүгнэсэн нь саяхан. Эдүгээ улс төрийн хямрал дээр эдийн засгийн даяар хямрал нэмэгдэж, давхар хямрал нүүрлэсэн нөхцөлд манай улс төрийн намууд амлалтын биш, хямралыг даван туулах хөтөлбөр гаргах нь зүйтэй. Намайг улс төрийн реформ хийнэ гэхэд намууд дургүйцэж байсан алдаагаа дахин давтахгүй гэж найдаж байна.

Нэн түрүүнд дараах арга хэмжээ авах нь зүйтэй гэж үзэж байна:

Нэг. Юуны өмнө улсын төсөвт тодотгол хийж, сонгуульд зориулсан болон тэвчиж болох бүх зардлыг танаж, үүнээс гарсан мөнгийг хямралын эсрэг арга хэмжээнд зарцуулах.

Хоёр. Энэ удаагийн УИХ-ын сонгуулийг хойшлуулж, түүнд зарцуулах хөрөнгө мөнгийг хэмнэх.

Гурав. Хямралын үед хамаг хүндрэл бэрхшээлийг үүрэн гарах үйлдвэр, аж ахуйн нэгж, хувиараа хөдөлмөр эрхлэгчдийг дэмжих “Хямралын эсрэг” тусгай сан бүрдүүлэх, түүнийг зарцуулах дүрэм журам боловсруулах.

Дөрөв. Нийт иргэд, ялангуяа хүүхдийн амьжиргааны түвшинг хэвээр хадгалах, тэтгэх, ажилгүйдлийг бууруулах, түүнээс ирэх цохилтыг зөөлрүүлэх, иргэдээ наад захын хэрэгцээт зүйлсээр тасралтгүй хангах арга хэмжээний төлөвлөгөө боловсруулах.

Тав. Энэ асуудлыг Үндэсний Аюулгүй байдлын Зөвлөлөөр хэлэлцэж, хямралд бэлтгэж, түүнийг даван туулах эрдэмтэн мэргэжилтнээс бүрдсэн цомхон бөгөөд чадварлаг комиссыг (хороо) нэн яаралтай байгуулж, ажлын төлөвлөгөө, хуваарь гаргах.

Зургаа. Хямралын нөхцөлд зохицуулан төрийн удирдлагыг төвлөрүүлэх. Ташрамд дурдахад, энэ бол дарангуйлал огтхон ч биш, зайлшгүй авах шаардлагатай арга хэмжээ юм.

Би ард түмнээ хямралаар айлгаж байгаа юм биш. Харин гарцаагүй нүүрлэн ирсэн аюулыг сөрөн зогсох, хохирол багатай даван туулах тухай бодит үнэнийг л ярьж байна.

Аливаа хямралыг зөвхөн хар амиа бодож, ганц ганцаараа даван туулах гэвэл их эндүүрэл байдгийг дэлхийн түүх харуулдаг. Хямралыг даван туулах цорын ганц арга нь эв нэгдэлтэй, зохион байгуулалттай, сахилга хариуцлагатай, төвлөрсөн удирдлагатай байж, бүх нийтээрээ хүчээ нийлүүлэн хамтран ажиллах явдал мөн. Наад зах нь манай иргэд тансаг зүйлийн хэрэглээгээ багасгаж, хэрэглээгээ зохистой бага түвшинд хэсэг хугацаанд барихад л асар их хөрөнгө хэмнэж болно.

Хямралыг даван туулах тухай эл асуудлыг ойрын хугацаанд УИХ, Засгийн Газар, Үндэсний Аюулгүй байдлын Зөвлөлөөр ярьж шийдэж болно, тэгэх ч байх. Гэхдээ ийм том, ноцтой асуудлыг ард түмэндээ дуулгахгүй хийх нь тун зохисгүй явдал гэж үзсэний учир энэ уриалгыг гаргаж байна.

Бид бүхэн хамтдаа хүндрэл бэрхшээлийг даван туулж чадна!

Мөнх тэнгэрийн хүчин дор Монголын уудам нутагт эрүүл энх, элэг бүтэн амьдрал өнөд оршиг ” гэжээ.

Дэлгэрэнгүй унших
сурталчилгаа
Монгол Улсын Их Хурлын 2020 оны сонгуулийн санал хураалт дуусах хүртэл сайтын сэтгэгдэл бичих талбарыг түр хаасан тул хүлцэл өчье. SHUDARGA.MN сайтын редакц

Үзэл бодол

Талархал

Огноо:

,

Жаахан биедээ баймгүй тэсвэр тэвчээр гарган аюулт өвчинтэй тэмцэж ах дүү гэр бүлийнхээ баатар болсон сайхан хүү Э.Маргад-Эрдэнэ тэнгэрт дэвшсэн гунигт мэдээ сайхан сэтгэлт монгол түмэнд уй гашуу, харуусал төрүүлсэн билээ.

“Улаанбаатар буян” ХХК бурхан болооч хүүгийн буяны ажлыг 100 хувь үнэ төлбөргүй хариуцаж, сэтгэлийн өргөл өргөжээ. Үүнд гэр бүл нь цахим хуудсаараа дамжуулан талархал илэрхийлсэн байна. Уг талархалд “Улаанбаатар буян” ХХК-ны хамт олондоо энэ хорвоогоос одсон бидний бурхан болооч хүү Э.Маргад-Эрдэнэний буяны ажлыг 100 хувь үнэ төлбөргүй бүрэн хариуцан хийж өгч буйд талийгчийн гэр бүл, ах дүү, төрөл төрөгсөд, найз нөхөд, хүүд минь сэтгэл гаргаж тусалсан мянган мянган элэг нэгт ахан дүүсийнхээ нэрийн өмнөөс гүнээ талархаж байна.Танай компанийн удирдлага болон баг хамт олны цаашдын ажил үйлст нь өндрөөс өндөр амжилт бүтээлийг хүсэн ерөөе. Сайн үйлс бүхэн дэлгэрэх болтугай” гэжээ.

Монголын ард түмний сайхан сэтгэл, сайн үйлс бүхэн дэлгэрэх болтугай.

Дэлгэрэнгүй унших

Үзэл бодол

Эрдэнэвангийн хошууныхны эмгэнэл

Огноо:

,

Нийслэл хот есөн дүүрэгтэй. Гэхдээ энэ есөн дүүргээс  Баянгол дүүрэг арай өөр тодотголтой. Улс төрийн хүрээллийнхнээс АН-ын дарга асан  С.Эрдэнэ гэгч хүнд харьяалагдаж, тус дүүргийн иргэд Эрдэнэвангийн хошууныхан гэсэн нэр хоч зүүсээр удаж байна. Уг нь С.Эрдэнэ гэдэг хүн улс төрд анх хөл тавихдаа Багануур дүүргээс гарч ирж байжээ. Гэхдээ тэрээр 1996-2000 онд Баянгол дүүргийн ИТХ-ын төлөөлөгчөөр сонгогдож, Нийслэлийн Баянгол Дүүргийн Засаг даргаар томилогдсноос хойш Баянголчууд С.Эрдэнэ гэдэг хүний харьяалалд бүрэн шилжсэн гэхэд болно.

Тэрээр Баянгол дүүргийн засаг дарга болонгуутаа өөрийнх нь эсрэг үг хэлдэг болгоныг энэ тойргоос шахан зайлуулж, өөрийнхөө хувийн бизнесийг цэцэглүүлж, “Гурван тамир” нэртэй хувийн сургууль байгуулж,  Баянгол дүүрэгт орших Өргөө кинотеатрын ар талд баахан барилга барьж, Тамираар овоглосон сургууль, зочид буудал, зоогийн газар хүртэл байгуулсан. Өөрийнхөө эзэмшил газар дээр өөрийнхөө вант улсыг байгуулсан С.Эрдэнэ ёстой л нөгөө баруун солгойгүй мөнгө тараан УИХ-ын гишүүнээр сонгогдож, хэдхэн жилийн дараа дүүргийн Засаг дарга явсан эр Нийгмийн хамгаалал хөдөлмөрийн яамны сайдаар томилогдов. С.Эрдэнэ Баянголоос хагартал баяжиж, ах дүү нар, үр хүүхдээ ичиж улаахгүйгээр Баянгол дүүргийн ИТХ-д чихэж эхэлсэн. Одоогоос найман жилийн өмнөх түүхийг сөхөж харья.

2012 оны орон нутгийн сонгууль
Энэ үед Баянгол дүүргийн ИТХ-ын сонгуульд АН-ынхан буюу С.Эрдэнэвангийн хүмүүс ялалт байгуулж, 30 суудал, МАН-ынхан 9, МАХН 2 суудал авчээ.  С.Эрдэнэ  хүү  Э.Ганболор, эхнэр Н.Нинжбадгар хүргэн Г.Энхболд охин Э.Содгэрэл нар нь нэр дэвшин гарч ирэв. Энэ бол зөвхөн цусан төрлийн холбоотой хүмүүсийн жагсаалт. Тодруулбал
  1. Н.Нинжбадгар /С.Эрдэнэ сайдын эхнэр/
  2. Э.Содгэрэл /С.Эрдэнэ сайдын охин/
  3. Э. Ганболор /С.Эрдэнэ сайдын хүү/
  4. Б.Лхагвасүрэн /С.Эрдэнэ даргын хамаатан, НДЕГ-т ажиллаж байсан/
  5. Б.Мөнгөнсүх /С.Эрдэнэ сайдын бие хамгаалагч/
  6. Л.Баттулга /С.Эрдэнэ сайдын жолооч/
  7. Г.Энхболд /С.Эрдэнэ сайдын хүргэн, НДЕГ-т ажиллаж байсан/
  8. Т.Сэр-Од /С.Эрдэнэ сайдын бие төлөөлөгч/
  9. Т.Мөнх-Очир /УИХ-ын гишүүн С.Эрдэнийн туслах/
  10. Б.Бурмаа /БГД-ийн тамгын газарт захиргааны хяналтын байцаагч/
  11. Д.Дэлгэрбат /НДЕГ-т ажиллаж байсан/
  12. Э.Мандхай /С.Эрдэнэ сайдын бие төлөөлөгч/
  13. Т.Төгөлдөр /“Гурван тамир” сургуулийн багш/ гэх мэтээр энэ жагсаалт хөвөрч байлаа.
Баянгол дүүргийн ИТХ-ыг ингэж гартаа оруулж авсан С.Эрдэнэ дүүргийн удирдлагыг бас л өөрийнхөө хүмүүсээр дүүргэв.

Тэрээр өөрийнхөө хүргэн Г.Энхболдыг  Баянгол дүүргийн засаг даргын орлогч болгов. Баянгол дүүргийн Засаг даргын тамгын газрын даргаар  НДЕГ-т ажиллаж байхдаа  Мониторингийн хэлтсийн даргаар ажиллуулж байсан Т.Нямцэцэг, Эдийн засаг төлөвлөлтийн хэлтсийн даргаар гэр бүлийн найзууд болох Д.Дулмаа, Худалдаа, үйлдвэрлэл үйлчилгээний хэлтсийн даргаар мөн л хуучин хамт ажиллаж байсан Б.Сүрэнхүү нарыг томилуулжээ.
2016 оны орон нутгийн сонгууль
Баянгол дүүргийн ИТХ-д дахин АН ялалт байгуулж, 41 суудлын 31-ыг С.Эрдэнэвангийн хүмүүс авчээ.
  1. Г.Энхболд  /С.Эрдэнэ сайдын хүргэн, НДЕГ-т ажиллаж байсан/
  2. Б.Бурмаа /БГД-ийн тамгын газарт захиргааны хяналтын байцаагч/
  3. Б.Мөнгөнсүх /С.Эрдэнэ сайдын бие хамгаалагч/
  4. Д.Нарангэрэл /С.Эрдэнийн хамаатан, туслахаар нь ажиллаж байсан/
  5. Л.Баттулга /С.Эрдэнэ сайдын жолооч/
  6. Л.Төмөрчөдөр /С.Эрдэнийн амралтын газрын дарга/
  7. Д.Дэлгэрбат /НДЕГ-т ажиллаж байсан/
  8. Ш.Давааням /С.Эрдэнийн цэргийн найз/
  9. Л.Алтансүх /С.Эрдэнэтэй хамт НДЕГ-т хамт ажиллаж байсан/
  10. Б.Лхагвасүрэн /С.Эрдэнэ даргын хамаатан, НДЕГ-т ажиллаж байсан/
  11. Батням /С.Эрдэнийн ээжийн нэр дээр байдаг Молор трейд ХХК-ны ажилтан/
  12. Х.Болор-Эрдэнэ /Гурван Тамир” дунд сургуулийнх нь хөгжмийн багш/
гэх мэтээр жагсаалт хөвөрч байна. Үүний дараа тэрээр өөрийнхөө хамгийн итгэлтэй хүмүүсийн нэг болох хүргэн Г.Энхболдыгоо ИТХ-ын даргаар, Б.Бурмааг ИТХ-ын дэд даргаар томилуулав.  Баянгол дүүргийн ИТХ-ын дэд дарга Б.Бурмаа С.Эрдэнийг олон жил дагаж яваа бөгөөд 1996 онд түүнийг дүүргийн Засаг дарга байхад Тамгын газарт нь захиргааны хяналт эрхэлсэн байцаагчаар ажиллаж байсан бөгөөд С.Эрдэнийн охины удирддаг “Төгс эрдэм” сангийн гүйцэтгэх захирлаар 2000-2003 онд ажиллаж байжээ.

Дашрамд дурдахад энэхүү “Төгс эрдэм” сангийн нэр дээр хүүхдийн халамжийн төв байгуулахаар авсан газар дээр эдүгээ С.Эрдэнийн “Шонхор тауэр” баригдсан юм. Б.Бурмаа С.Эрдэнийг Нийслэлийн АН-ын дарга байх үед Баянгол дүүргийн Ардчилсан эмэгтэйчүүдийн холбооны тэргүүн, ХАХНХ-ын сайд байх үед нь хүүхэд, гэр бүл хөгжлийн “Өнөр бүл” төвийн захирлаар ажиллаж байснаас харахад тун ойрын итгэлтэй хүн нь ажээ. Тиймээс ч хүргэнийхээ дараах албан тушаал буюу дүүргийн ИТХ-ын дэд даргаар түүнийг тавьсан байна. Үүний дараа тэрээр өөрийн итгэлтэй хүмүүийн нэг болох С.Одонтуяаг дүүргийн Засаг даргаар томилуулж, бас л өөрсдийнхөө хүмүүсийг нэр дэвшүүлэн гаргаж ирэв.

2020 оны орон нутгийн сонгууль
АН-ын даргаас хэл амтайгаар огцорсон С.Эрдэнэ өнөөдөр дахин Баянгол дүүргийн ИТХ-ын сонгуулийг өөрийн болгохоор зүтгэж, өөрөө хөрөнгө мөнгийг нь гаргаж, Баянгол дүүрэгт АН-ыг ялуулна хэмээн ам бардам сууж байна. МАХН, Шинэ намтай эвсээд байгаа АН-ынхан энэ удаа Баянгол дүүргийг бас л С.Эрдэнэдээ өгч, өнөөх нь өөрийнхөө баахан хүмүүсийг нэр дэвшүүлж, эвсэж орж байгаа намынхандаа ганц ч суудал хялайлгасангүй.  Тэрээр өөрийнхөө  хүргэн Г. Энхболдыг хамийн түрүүнд Баянгол дүүргээс НИТХ-д нэр дэвшүүлжээ.
1.   Д. Ганзориг  /С.Эрдэнийн хүн. Сүүлийн 6 жил     Баянгол Агропарк ОНАТҮГ –т ажиллаж байгаа/.
2. Ё.Ариунцэцэг  /С.Эрдэнийн эхнэрийн найз/
3. Д.Дорждулам  
4. С. Мягмарсүрэн   
5. Б. АЛТАНГЭРЭЛ /УНДЕГ-т С.Эрдэнийн багт ажиллаж байсан/   
6.Д.Нарангэрэл /С.Эрдэнийн хамаатан, туслахаар нь ажиллаж байсан/
7. Р.Батнасан /С.Эрдэнийн өмгөөлөгч/
8. Туяанэмэх Пүрэвсүрэн /С.Эрдэнийн бие төлөөлөгчөөр ажиллаж байсан/
9. С.Мягмарсүрэн / С.Эрдэнийн ухуулагчаар ажиллаж байсан. 2013 оноос БГД-гийн Хөдөлмөрийн хэлтэс, ЖДҮ-ийн хэлтэст ажиллаж байгаа/
10. А.Чинбат /С.Эрдэнийн хамаатан НД-ийн хэлтэст орлогын байцаагч,  ЖДҮД төвд даргаар ажиллаж байсан.
11. Б.Лхагвасүрэн /НДЕГ-т мэргэжилтэн, АН-ын санхүүгийн албаны даргаар ажиллаж байсан/ гэх мэтээр энэ жагсаалт хөвөрч байна.
Мөн үүнээс гадна С.Эрдэнэ өнгөрсөн ИТХ-ын сонгуульд ялсныхаа дараа С.Одонтуяаг Засаг даргаар томилуулж, өөрийнхөө хүмүүсийг  Хорооны Засаг дарга болгон дэвшүүлжээ. Тэрээр энэ удаа дөрвөн жилийн өмнө хорооны засаг даргаар ажиллуулсан 10 хорооны засаг даргааа сойгоод байна.                                                                    
Тэрээр энэ удаа мөн л өмнөх сонгуульд ашигласан тактикаа хэрэглэж БГД-гийн ахмадуудыг өөрийнхөө Гурван тамир амралтын бааз руу зөөж, өдрөөр амруулан, залуучуудыг цуглуулан сэмхэн найрлуулж мөнгө төгрөг тарааж байгаа аж.
Таваг хоол, атга будаанаас худалдагдсан эрх
С.Эрдэнэ сүүлийн найман жил БГД-гийн ИТХ-д дан өөрийнхөө хүмүүсийг нэр дэвшүүлэн дүүргийн эрх мэдлийг гартаа атгаж суугааг дээрх баримт гэрчилж байна. С.Эрдэнэ гэгч хүн зөвхөн хувийн ашиг сонирхолынхоо төлөө иргэдийн саналыг луйвардан баяжиж, харин Баянголчуудын амьдрал өнөөх л бахь байдгаараа үргэлжилсээр... Зөвхөн 2018-2020 оны хооронд Баянгол дүүрэгт гарч байгаа гэмт хэрэг зөрчил 40 орчим хувиар нэмэгдэж, ажилгүй иргэдийн тоо гэхэд 2017 оны судалгаанаас харахад 20 орчим хувиар өсчээ. Харьцангуй гэр хороолол багатай, олон жилийн түүхтэй, өөрийн гэсэн өнгө төрхтэй энэ дүүрэг өнөөдөр улам бүр өнгө алдсаар. Энд шинээр хийгдсэн бүтээн байгуулалт гэхээр олигтой зүйл хийгдсэнгүй, баар, цэнгээний газар, ТҮЦ л  нэмэгдэж,  хулгай дээрэм, архидалтаас үүдэлтэй гэмт хэрэг нэмэгдэж байна.  Баянгол дүүрэгт хэрэгжиж байгаа төсөл хөтөлбөрийн мөнгө хэрхэн яаж хувиарлагдаж, хэн юунд зарцуулж байгаа нь нууц байсаар найман жил өнгөрч байна. Баянгол нэртэй ядуу дүүргийн хувь тавиланд хэн буруутай вэ? Дүүргийг бүхлээр нь өмчилж аваад байгаа С.Эрдэнэ үү? Эсвэл атга будаа, таваг хоолноос саналаа өгч орхидог сонгогчид та буруутай юу?
 
Дэлгэрэнгүй унших

Үзэл бодол

О.Отгонбаяр: Нэмэлт бүтээгдэхүүн үйлдвэрлэх, зардал бууруулах чиглэлд штабууд амжилттай ажилласан

Огноо:

,

“Эрдэнэт үйлдвэр” ТӨҮГ-ын Ерөнхий захирлын 2020 оны 3-р сарын 20-ны өдрийн А/139 тоот тушаалаар тус үйлдвэрийн хэмжээнд шинэ коронавирусын т а р х а л т т а й холбоотойгоор үүсэж буй хүндрэлийг даван туулж, сөрөг үр дагавраас урьдчилан сэргийлэх Төв штаб байгуулагдан ажиллаж байна. Тус штабын 9 дэх хуралдаан саяхан боллоо. Энэхүү хуралдаанаар авч хэлэлцсэн асуудал, хэрэгжүүлэхээр зорьж буй ажлын явц, цаашдын зорилтын талаар Төв штабын нарийн бичгийн дарга, Захиргаа, хүний нөөцийн бодлогын газрын дарга О.Отгонбаяртай ярилцлаа. 

- Та эхлээд Төв штабын зорилт, түүний хэрэгжилтийн талаар мэдээлэл өгнө үү?

- “Эрдэнэт үйлдвэр” ТӨҮГ нь шинэ коронавирусын тархалтаас урьдчилан сэргийлэх, үүсээд байгаа хүндрэлийг даван туулах арга хэмжээний хөтөлбөр төлөвлөгөө баталж, 2020 оны Төв штаб, мөн чиглэл хариуцсан дөрвөн штабын үйл ажиллагааны зохион байгуулалтад орж ажилласан. Корона вирусын тархалттай энэ үед уурхайчид, тэдний гэр бүлийг хамгаалах, мөн улс, орон нутгийн төсөвт төвлөрүүлж буй хөрөнгийг бууруулахгүй байх гэсэн үндсэн зорилго тавьж, уурхайчид мөр зэрэгцэн, гар сэтгэл нэгдэн ажиллаж ирлээ. 

- Төв штабын 9-р хуралдаанаар ямар асуудал хэлэлцэв?

- Штабын оны эхний хагас жилийн ажлыг дүгнэж, Төв штабын зүгээс чиглэл хариуцсан штабын ажилд үнэлэлт дүгнэлт өгсөн. Хямралын эсрэг арга хэмжээний төлөвлөгөөний гүйцэтгэл 57 хувьтай, өмнөх наймдугаар хуралдаанаар чиглэл хариуцсан штабуудад өгсөн үүрэг даалгаврын биелэлт 95,9 хувьтай гарсан. Манай чиглэл хариуцсан штабууд тус тусдаа төлөвлөгөө гарган ажилласан. Үйлдвэрлэлийн үйл ажиллагааг бууруулахгүй байх, санхүүгийн нэмэлт орлого олох, зардлаа бууруулах, хүндрэлийг даван туулах чиглэлээр штабууд амжилттай ажилласан гэж дүгнэсэн. Санхүү, эдийн засгийн, Үйлдвэрлэлийн, Нийгмийн, Хөгжлийн чиглэлийн дэд штабуудын үйл ажиллагааг дүгнэж, хямралын эсрэг арга хэмжээний оролцооны хувь хэмжээг гаргасан. Хямралын үед хэмнэлтийн бодлого хэрэгжүүлэх ажилд идэвхтэй оролцсон цехийн ажиллагчдад тодорхой хэмжээний урамшуулал олгох чиглэл өгсөн. 

Мөн шинээр байгуулагдсан Гадаад харилцааны болон Хөрөнгө оруулалт, худалдан авах ажиллагааны бодлогын газар, Мэдээллийн технологийн хэлтсийн үйл ажиллагааны тайланг авч хэлэлцлээ. Эдгээр газар, хэлтсүүд бий болсноор Эрдэнэт үйлдвэрийн үйл ажиллагаанд гарсан өөрчлөлт, шинэчлэлт, давуу болон сул тал, тулгамдаж буй асуудлыг хэлэлцэж дүгнэлт гаргасан. Энэчлэн үйлдвэрлэлд тулгамдаж буй асуудлыг штабаар хэлэлцэж, нэмэлт даалгавар өгч ажилласнаар бид хямралыг амжилттай даван туулж байгаа гэж үзэж байна. 

- Чиглэл хариуцсан штабуудын ажлыг тухайлчлан дүгнэсэн гэлээ. Энэ талаар тодруулбал? 

- Уурхайчин хамт олон маань өөрийн үйлдвэрийн үндсэн бүтээгдэхүүн болох зэс, молибдены баяжмалыг нэмэлтээр үйлдвэрлэх, зардал хэмнэх төлөвлөгөөт даалгавраа амжилттай биелүүлсэн. Түүнчлэн арилжааны банкуудтай хийсэн хэлцэл, санхүү, эдийн засаг мөнгөний оновчтой бодлого, худалдааны гэрээг сайжруулсны үр дүнд нэмэлт орлого олж байна. Энэ ч утгаараа оны эхний 8 сарын байдлаар үйлдвэрлэл, эдийн засгийн төлөвлөгөөг бүх үзүүлэлтээр нь биелүүлсэн. Энэ нь Үйлдвэрлэлийн болон Санхүү, эдийн засгийн чиглэлийн штабууд зорилтоо амжилттай хэрэгжүүлсний үр дүн гэж дүгнэсэн.

Хөгжил болон Нийгмийн чиглэлийн штабууд том төслүүдийг хэрэгжүүлэх, ажлын байрыг хадгалахад анхаарлаа хандуулан ажиллалаа. Цаг үеийн нөхцөл байдлаас шалтгаалан нийгмийн цехүүдийн үйл ажиллагаа зогсонги байдалд орох үед дотоод зохион байгуулалт хийж, цалин хөлсийг бууруулахгүй байх арга хэмжээ авсан. Үйлдвэрийн ирээдүй, ажилчдын эрх ашиг, нийгмийн асуудал, сайн сайхны төлөө чиглэсэн эдгээр штабын ажлыг ахицтай байсан гэж дүгнэсэн. Төв штаб үйл ажиллагаагаа хямралыг даван туулах, сөрөг үр дагавраас сэргийлэхэд чиглүүлэхээс гадна, том төслийн бүтээн байгуулалтын ажил тус бүрийн явц, тулгамдаж буй асуудлыг хэлэлцэн, гарц гаргалгаа, үүрэг чиглэл өгч, шийдвэр гаргаж ажилладаг нь ихээхэн үр дүнтэй байна гэж Ерөнхий захирал дүгнэсэн. 

- Төв штабаас цаашдаа хэрхэн ажиллахаар зорьж байна? 

- Он дуусах хүртэлх дөрвөн сарын хугацаанд манай Уурхайчин хамт олон хэрхэн ажиллах тухайд Төв штаб зорилтоо тодорхойлсон. Дэд штабууд үйл ажиллагаандаа ямар өөрчлөлт хийх, юун дээр илүү төвлөрч ажиллахаа хэлэлцсэн. 2020 оны зорилтот түвшинд хүрэхэд дотоод болон гадаад орчны нөлөөлөл, улс орны эдийн засгийн байдал, зэсийн үнийн хэлбэлзэл зэргээс шалтгаалан төлөвлөгөөндөө нэмэлт өөрчлөлт оруулж, дахин нэмэлт даалгавар аван ажиллах шийдвэр гарсан байгаа. Ийнхүү үлдсэн саруудад энэ оны зорилтоо биелүүлэн ажиллах нь манай штабын гол ажил.

Я.Энхтуяа
Фото: Б.Баттөгс

Дэлгэрэнгүй унших

Санал болгох