Бидэнтэй нэгдэх

Цаг үе

Б.Агваанцэрэн: Банканд дугаарлах цаг заваа хэмнээд бас урамшуулал авах боломж олгож байгаа

Огноо:

,

Төрийн банк хэрэглээний төлбөрөө цахимаар төлж буй харилцагчдадаа урамшуулал олгоно гэсэн мэдээллийн дагуу Төрийн банкны Сурталчилгаа, идэвхжүүлэлт албаны захирал Б.Агваанцэрэнгээс дараах асуулт тайлбарыг авлаа.

Нийгмийн сүлжээнд Төрийн банкийг дараалал ихтэй гэсэн шүүмж их гарч байгаа харагддаг. Төрийн банканд яагаад дараалал ихтэй байдаг талаарх асуултаас яриагаа эхэлье?

Төрийн банкны хувьд Монгол Улсын өнцөг булан бүрт байрлах 500 гаруй салбар нэгжээрээ дамжуулан 2.1 сая харилцагчдадаа банк санхүүгийн цогц үйлчилгээ үзүүлэн ажилладаг. Одоогийн байдлаар Монгол Улсад 12 арилжааны банк үйл ажиллагаа явуулж байгаагаас Төрөөс иргэдэд олгож буй халамжийн үйлчилгээний 85 орчим хувь, тэтгэврийн тэн хагасыг Төрийн банк дангаараа олгодог. Дээр нь нэмээд хэрэглээний төлбөрийн 90 орчим хувийг манай банк дамжуулан гүйцэтгэдэг. Дээрх үйлчилгээг банканд ирэлгүй цахимаар авах боломжийг Төрийн банк бүрдүүлээд багагүй хугацаа өнгөрч байгаа хэдий ч банканд ирж дугаарлан зогсож үйлчилгээ авдаг харилцагчид цөөнгүй байна. Жишээлбэл, сар бүрийн 10-25-ны өдрүүдэд байр, цахилгаан, СӨХ,  контор, IPTV, гар утас гэх мэт хэрэглээний төлбөрөө төлөх иргэд, харилцагчид банканд дараалал үүсгэдэг.

Ер нь Төрийн банкны дараалалд зогсож буй иргэдийн хэдэн хувь нь халамж, тэтгэврээ авахаар, хэдэн хувь нь хэрэглээний төлбөрөө төлөхөөр ирдэг вэ?
Товчоор хэлэхэд Төрийн банканд дараалалд зогсож байгаа 10 хүний 3 нь халамжийн мөнгөө авах, 2 нь байрны мөнгөө төлөх, 2 нь тэтгэврээ авах, үлдсэн 3 нь бусад үйлчилгээ авах дараалалд зогсож байна.

Банкны дарааллаа бууруулах зорилгоор Төрийн банкнаас авч буй арга хэмжээний талаар мэдээлэл өгнө үү?
Төрийн банкнаас нийт тэтгэвэр авагчдадаа тэтгэврийн картаа үнэгүй захиалан авах боломжийг олгож байгаа бөгөөд цалинтай ээж, хүүхдийн мөнгө, одонгийн мөнгө, асаргааны мөнгө гэх мэт халамжийн үйлчилгээгээ картаараа авч, цахим банкаа ашиглан удирдаж зарцуулах боломжтой. Мөн байрны мөнгө болон бүх төрлийн хэрэглээний төлбөрөө цахимаар төлж, банкны үйлчилгээг онлайнаар авах боломжийг Гялсбанк үйлчилгээгээр бүрдүүлж өгсөн.
 
Хэрэглээний төлбөрөө цахимаар төлөхөд НӨАТ-н баримт өгөх үү?

Өгөлгүй яахав. Хэрэглээний төлбөрөө цахимаар төлөөд бүртгэлтэй цахим шуудангаараа НӨАТ-н баримтаа авах боломжтой.

Хэрэглээний төлбөрөө цахимаар төлөөд урамшуулал аваарай гэж байсан. Яг ямар урамшуулалтай хөтөлбөр вэ?

Дэлхий нийтээрээ цахим шилжилт хийж буй өнөө үед өөрсдийн цаг заваа хэмнэн хэрэглээний төлбөрөө цахимаар төлж хэвшиж байна. Гэсэн хэдий ч цахимаар авах боломжтой үйлчилгээг банканд дугаарлан зогсож авах нь дараалал үүсэх гол шалтгаан болж байна.
Тиймээс Төрийн банкнаас БИЛЛИНГ-ийн үйлчилгээг ашиглан хэрэглээний төлбөрөө ухаалгаар төлсөн харилцагчдаа идэвхжүүлэх зорилгоор урамшуулалт хөтөлбөр зарлаж байна. Өөрөөр хэлбэл Банканд дугаарлах цаг заваа хэмнээд бас урамшуулал авах боломж олгож байгаа.
2020.09.15-2020.11.30-ныг дуустал хугацаанд Биллингийн үйлчилгээг ашиглан хоёроос дээш гүйлгээ хийсэн хүн бүр урамшууллын хөтөлбөрт хамрагдан 1,000,000 төгрөгийн эзэн болох ГУРВАН  харилцагчийн нэг болох боломжтой. Дэлгэрэнгүй мэдээллийн манай банкны веб сайтаас авах боломжтой. Эцэст нь нийт харилцагчдадаа хандаж хэлэхэд “КОВИД-19” цар тахлын үед цахим банкаа ашиглан салбарт ирэлгүй санхүүгийн үйлчилгээгээ авч өөрийн болоод бусдын эрүүл мэндийг хамгаалахыг уриалж байна.

Ярилцсан танд баярлалаа
 
Дэлгэрэнгүй унших

Сэтгэгдэл

Цаг үе

Улаанбаатарт өдөртөө 29 хэм дулаан

Огноо:

,

Малчид, иргэд, тээвэрчдийн анхааралд: Өнөөдөр ихэнх нутгаар халж, хуурайшилт нэмэгдэх тул гал түймрийн аюулаас сэрэмжтэй байхыг анхааруулж байна.

2024 оны тавдугаар сарын 20-ны 08 цагаас 20 цаг хүртэл: Ихэнх нутгаар солигдмол үүлтэй. Хэнтийн уулархаг нутгаар бороо орно, бусад нутгаар бороо орохгүй.

Салхи нутгийн зүүн хэсгээр баруун өмнөөс, бусад нутгаар баруун хойноос секундэд 5-10 метр. Ихэнх нутгаар халж, Алтай, Хангай, Хөвсгөлийн уулархаг нутаг, Завхан голын эх, Хүрэн бэлчир орчмоор 21-26 хэм, Орхон-Сэлэнгийн сав газар, говийн бүс нутгийн өмнөд хэсгээр 29-34 хэм, бусад нутгаар 25-30 хэм дулаан байна.


УЛААНБААТАР ХОТ ОРЧМООР: Багавтар үүлтэй. Бороо орохгүй. Салхи баруун хойноос секундэд 4-9 метр. 27-29 хэм дулаан байна.

БАГАНУУР ОРЧМООР: Үүлшинэ. Бага зэргийн бороо орно. Салхи баруун хойноос секундэд 5-10 метр. 27-29 хэм дулаан байна.

ТЭРЭЛЖ ОРЧМООР: Багавтар үүлтэй. Бороо орохгүй. Салхи баруун хойноос секундэд 4-9 метр. 25-27 хэм дулаан байна.


2024 оны тавдугаар сарын 21-нээс 2024 оны тавдугаар сарын 25-ныг
хүртэлх цаг агаарын урьдчилсан төлөв

21-нд Монгол-Алтай, Хангай, Хөвсгөлийн уулархаг нутгаар, 22-нд баруун болон зүүн аймгуудын нутгийн зарим газар, төвийн аймгуудын ихэнх нутгаар, 23-нд төв болон говийн аймгуудын нутгийн зарим газраар, 24-нд төвийн аймгуудын ихэнх нутаг, говийн аймгуудын нутгийн зарим газар, зүүн аймгуудын нутгийн баруун хэсгээр бороо, уулаараа нойтон цас орно. Салхи ихэнх хугацаанд секундэд 6-11 метр, 21-нд нутгийн зүүн хэсгээр, 22-нд говь, тал, хээрийн нутгаар, 23-нд Алтайн салбар уулсаар секундэд 15-17 метр хүрч ширүүсэж, шороон шуурга шуурна. 22, 23-нд нутгийн зүүн хагаст, 24-нд нутгийн хойд хэсгээр бага зэрэг сэрүүсэж Монгол-Алтай, Хангай, Хөвсгөл, Хэнтийн уулархаг нутаг, Дархадын хотгор, Тэс, Эг, Үүр, Туул, Тэрэлж, Онон, Улз, Халх голын хөндийгөөр шөнөдөө 1-6 хэм, өдөртөө 16-23 хэм, говийн бүс нутгийн өмнөд хэсгээр шөнөдөө 16-21 хэм, өдөртөө 31-36 хэм, бусад нутгаар шөнөдөө 7-12 хэм, өдөртөө 22-27 хэм дулаан байна.

Дэлгэрэнгүй унших

Цаг үе

“Хөдөлмөрийн харилцааны хөтөлбөр”-ийг шинээр хэрэгжүүлнэ

Огноо:

,

Хөдөлмөр эрхлэлтийн үндэсний зөвлөлийн үндэсний зөвлөлийн 2024 оны 03 дугаар тогтоолоор “Хөдөлмөрийн харилцааны хөтөлбөр”-ийг баталсан.

Хөдөлмөрийн харилцааны хөтөлбөр нь жижиг, дунд аж ахуйн нэгж, байгууллага, ажил олгогчид хөдөлмөрийн болон хөдөлмөрийн аюулгүй байдал, эрүүл ахуй, нийгмийн даатгалын хууль тогтоомжийн талаар зөвлөх үйлчилгээ үзүүлэх, зөвлөгөө мэдээлэл өгөх, сургалт зохион байгуулах, хөдөлмөрийн харилцааны мэдээллийн онлайн үйлчилгээ үзүүлж, аж ахуйн нэгж, байгууллагад ажил олгогч, ажилтны хоорондын хөдөлмөр эрхлэлтийн харилцааг төлөвшүүлэхэд хөдөлмөрийн харилцааны хууль тогтоомжийн хэрэгжилтийг дэмжихэд чиглэх юм.

Хөтөлбөрийн хүрээнд Хөдөлмөрийн харилцааны талаар зөвлөх үйлчилгээнд 50 хүртэл ажилтантай жижиг, дунд аж ахуйн нэгж, байгууллага хамрагдана. Ажил олгогчид чиглэсэн хөдөлмөрийн харилцааны сургалтад аж ахуйн нэгж, байгууллагын ажилтны тоо харгалзахгүйгээр хүсэлтийг үндэслэн хамруулна. Хөтөлбөрт хамрагдсан аж ахуйн нэгж, байгууллага 2 жилд нэгээс илүүгүй удаа хөдөлмөрийн харилцааны асуудлаар зөвлөх үйлчилгээ үзүүлэх арга хэмжээнд, ажил олгогчид чиглэсэн хөдөлмөрийн харилцааны сургалтад жилд хоёроос илүүгүй хамрагдах эрхтэй.

Түүнчлэн Төрийн болон орон нутгийн өмчит үйлдвэрийн газар, төсөвт байгууллага, төрийн бус байгууллагыг хөтөлбөрийн хөдөлмөрийн харилцааны зөвлөх үйлчилгээний арга хэмжээнд хамруулахгүй бөгөөд хамрагдах аж ахуйн нэгж, байгууллагын өмчлөгч нь Монгол Улсын иргэн байна.

Хөтөлбөрийн хүрээнд хөдөлмөрийн харилцааны дараах чиглэлээр зөвлөх үйлчилгээ үзүүлнэ:

-Хөдөлмөрийн дотоод журам, цалин хөлсний журам, ажилтны мэдээлэл авах, хадгалах, ашиглах журам зэрэг дотоод хэм хэмжээг боловсруулах;

-Хөдөлмөрийн гэрээ, түүний төрөл, хэлбэр, хэрэглээ, хөдөлмөрийн маргаан зохицуулах;

-Цалин хөлс, үндсэн болон нэмэгдэл, нэмэгдэл хөлс тооцох;

-Ажил, амралтын цагийн зохицуулах;

-Хөдөлмөрийн аюулгүй байдал, эрүүл ахуй, хөдөлмөрийн нөхцөл, хөдөлмөрийн аюулгүй байдал, эрүүл ахуйн стандарт, урьдчилан сэргийлэх арга хэмжээний төлөвлөх;

-Нийгмийн даатгалын хууль тогтоомжийн хэрэглээний талаар ажил олгогчдод мэргэжлийн зөвлөх үйлчилгээ;

-Хөдөлмөрийн харилцааны бусад асуудал зэрэг болно.

Хөдөлмөрийн харилцааны хөтөлбөрт хамрагдах хүсэлтэй хөтөлбөрийн 2 дугаар зүйлд заасан шаардлага хангасан аж ахуйн нэгж, байгууллага, ажил олгогч нь харьяалах аймаг, дүүргийн Хөдөлмөр, халамжийн үйлчилгээний газар, хэлтэст хүсэлт гарган хамрагдах боломжтой юм.

Тус хөтөлбөрийг хэрэгжүүлэх хүрээнд “Мэргэшсэн зөвлөх”-үүдийг бэлтгэх сургалтыг Хөдөлмөр, нийгмийн хамгааллын яам, Хөдөлмөр, халамжийн үйлчилгээний ерөнхий газар хамтран зохион байгуулж байна гэж Хөдөлмөр, нийгмийн хамгааллын яамнаас мэдээллээ. 

Дэлгэрэнгүй унших

Цаг үе

Улаанбаатарт өдөртөө 17 хэм дулаан

Огноо:

,

Малчид, иргэд, тээвэрчдийн анхааралд: 17-нд нутгийн хойд хэсгээр, 18-нд Хангайн уулархаг нутгаар бороо, нойтон цас орж, ихэнх нутгаар сэрүүсэж, нутгийн өмнөд хэсгээр салхи, шороон шуургатай байхыг анхааруулж байна.

2024 оны тавдугаар сарын 17-ны 08 цагаас 20 цаг хүртэл: Ихэнх нутгаар солигдмол үүлтэй. Баруун болон зүүн аймгуудын нутгийн зарим газар, төвийн аймгуудын нутгийн өмнөд хэсгээр бороо, уулаараа нойтон цас орно. Бусад нутгаар хур тунадас орохгүй. Салхи нутгийн өмнөд хэсгээр баруун өмнөөс баруун хойш эргэж, бусад нутгаар баруун хойноос секундэд 7-12 метр, говь, тал, хээрийн нутгаар секундэд 15-17 метр, түр зуур секундэд 24 метр хүрч ширүүсэж, шороон шуурга шуурна. Ихэнх нутгаар сэрүүсэж Дархадын хотгор, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз голын хөндийгөөр 13-18 хэм, говийн бүс нутгийн өмнөд хэсгээр 32-37 хэм, говийн бүс нутгийн хойд хэсэг, Дарьгангын тал нутгаар 23-28 хэм, бусад нутгаар 18-23 хэм дулаан байна.


УЛААНБААТАР ХОТ ОРЧМООР: Үүлшинэ. Бороо орохгүй. Салхи баруун хойноос секундэд 5-10 метр, зарим үед секундэд 12-14 метр хүрч ширүүснэ. Сэрүүсэж 15-17 хэм дулаан байна.

БАГАНУУР ОРЧМООР: Үүлшинэ. Бага зэргийн бороо орно. Салхи баруун хойноос секундэд 6-11 метр, зарим үед секундэд 13-15 метр хүрч ширүүснэ. Сэрүүсэж 16-18 хэм дулаан байна.

ТЭРЭЛЖ ОРЧМООР: Үүлшинэ. Бага зэргийн бороо орно. Салхи баруун хойноос секундэд 5-10 метр, зарим үед секундэд 12-14 метр хүрч ширүүснэ. Сэрүүсэж 14-16 хэм дулаан байна.


2024 оны тавдугаар сарын 18-наас 2024 оны тавдугаар сарын 22-ныг
хүртэлх цаг агаарын урьдчилсан төлөв

18-нд баруун болон төвийн аймгуудын нутгийн өмнөд, говийн аймгуудын нутгийн хойд хэсгээр, 19-нд нутгийн зүүн өмнөд хэсгээр, 21-нд баруун аймгуудын нутгийн зарим газар, төвийн аймгуудын нутгийн баруун хэсгээр бороо, уулаараа нойтон цас орно. Салхи ихэнх хугацаанд секундэд 6-11 метр, 18-нд говь, тал, хээрийн нутгаар, 19-нд нутгийн зүүн хэсгээр, 21-нд нутгийн зарим газраар секундэд 15-17 метр хүрч ширүүсэж, шороон шуурга шуурна. 18-нд нутгийн зүүн хэсгээр сэрүүхэн байх боловч, 19-нөөс ихэнх нутгаар дулаарч, Монгол-Алтай, Хангай, Хөвсгөл, Хэнтийн уулархаг нутаг, Дархадын хотгор, Завхан голын эх, Хүрэнбэлчир орчим, Тэс, Эг, Үүр, Орхон, Сэлэнгэ, Хараа, Ерөө, Туул, Тэрэлж, Онон, Улз голын хөндий, Дорнод-Дарьгангын тал нутгаар шөнөдөө 1-6 хэм, өдөртөө 18-23 хэм, говийн бүс нутгийн өмнөд хэсгээр шөнөдөө 10-15 хэм, өдөртөө 29-34 хэм, бусад нутгаар шөнөдөө 5-10 хэм, өдөртөө 23-28 хэм дулаан байна.

Дэлгэрэнгүй унших

Санал болгох