Бидэнтэй нэгдэх

Цаг үе

Айова хотын захирагчийг авлигын гэмт хэрэгт холбогдуулан баривчилжээ

Огноо:

,

АНУ-ын Айова муж улсын Армстронг суурингийн захирагч, цагдаагийн дарга зэрэг таван албан тушаалтныг олон жил үргэлжилсэн авлигын гэмт хэрэгт холбогдуулан баривчилсан талаар тус муж улсын аудитын газар болон прокурорын газраас мэдээлжээ.

Армстронг суурингийн албан тушаалтнууд олон арван сая долларын төсвийн хөрөнгийг шамшигдуулсан, мөн хэргээ нуун дарагдуулах зорилгоор хуурамч бүртгэл хөтөлсөн, суурингийн хөрөнгийг хувийн хэрэгцээнд ашигласан гэмт хэрэг үйлдсэн талаар прокурорын яллах дүгнэлтэд дурджээ.

Миннесота мужтай хил залгаа бөгөөд аялал жуулчлалын алдартай газар болох Окобожи амралтын бүсээс 40 милийн зайд орших суурингийн ард иргэдийг энэхүү баривчилгаа гайхшруулжээ.

Шүүгдэгчийн өмгөөлөгч нь тус албан хаагчдыг 2021 онд эрх бүхий байгууллагаас шалгаж буй талаар үндэслэл тайлбар авахаар ажиллаж буй талаар мэдээлжээ. Учир нь тус албан хаагчдын шалгагдаж буй зарим гэмт үйлдлийг 2017 оны 9 дүгээр сард хийсэн аудитын тайланд дурдаж, олон нийтэд ил болгосон байна.

“Мужийн аудитын тайланг үндэслэн энэ төрлийн гэмт хэрэгт албан тушаалтныг холбогдуулан шалгах нь төдийлөн түгээмэл биш юм. Иймээс энэхүү хэрэгт ямар учир шалтгааны улмаас албан тушаалтныг холбогдуулан шалгаж буй талаар би сайн ойлгохгүй байна.” хэмээн тус хотын нарийн бичгийн ажилтан асан Конни Такери, Мэри К.Статон нарын өмгөөлөгч Эд Бьёорнстад мэдээлжээ.

35 настай Мэри К.Статоныг өөрийн үйлдсэн хүндэвтэр гэмт хэрэгт холбогдуулан 2 дугаар сарын 26-ны өдөр эрх бүхий байгууллагад ирж хэргээ хүлээхийг шүүгч зөвшөөрсөн тул тэрээр барьцаа хөрөнгө байршуулж суллагдсан байна.

Харин Армстронг хотын захирагчаар сүүлийн арван жилийн ихэнх хугацаанд ажиллаж байсан 69 настай Грег Бум, түүний хүргэн бөгөөд цагдаагийн дарга Крейг Меррилл, 2016 онд тэтгэвэрт гарсан Таккери болон тус хотын нарийн бичгийн ажилтан Трейси Ланг нарыг баривчилжээ.

Грег Бум, Таккери, Трейси Ланг нарыг 2 дугаар сарын 12-ны өдөр баривчилсан байна. Тус гэмт хэрэгт холбогдон шалгагдаж баривчлагдсан явдалд сэтгэл дундуур байгаа Таккериг батлан даалтаар гаргахаар ажиллаж буй талаар түүний өмгөөлөгч Эд Бьюрнстад мэдээлжээ.

Мөрдөгчид 43 настай Крейг Мерриллийг Миннесота мужийн хил дээр баривчилсан байна. Түүнийг шилжүүлэн авах хүртэл Миннесота мужийн Мартин хотын шоронд саатуулжээ.

Айова мужийн Ерөнхий Прокурорын газрын хэвлэлийн төлөөлөгч Линн Хикс тус хэргийг олон жилийн турш мөрдөн шалгаж буй талаар мэдээлсэн байна.

Грег Бум, Таккери, Крейг Меррилл нар нь 2014 оноос 2020 оны хооронд санхүүгийн ашиг олох зорилгоор үргэлжилсэн гэмт хэрэг үйлдсэн бөгөөд 25 жил хүртэл хорих ял сонсож болзошгүй талаар прокурорын яллах дүгнэлтэд тусгагджээ.

Прокурорын газраас мэдээлснээр Грег Бум, Крейг Меррилл нарыг 10 гаруй мянган ам.долларын чекийг завшуулсан хэргээр нэгдүгээр зэргийн хулгайн гэмт хэрэгт холбогдуулан яллагдагчаар татсан байна. Грег Бум, Таккери нар нь төлбөрийн чекийг тус хотын бусад албан хаагч болон зээлийн картын компанид илгээсэн гэмт хэрэгт холбогдон мөн яллагдагчаар татагдсан юм. Энэхүү гэмт хэргийн нийт хохирол одоогоор тогтоогдоогүй юм.

Цагдаагийн газрын дарга Крейг Меррилл нь мөн хоёр удаа цагдаагийн албан хаагчийн зэвсэг, хэрэгслийг албан бус зорилгоор бусдын эсрэг ашигласан хэрэгт холбогдон шалгагдаж байна.

2016 онд зохион байгуулагдсан хандив цуглуулах үдэшлэгийн үеэр Крейг Меррилл нь хотын засвар үйлчилгээний ажилтан болон ойролцоо байсан нэг иргэнийг “цахилгаан гүйдлээр цохигч” ашиглан гэмтээжээ. Түүнчлэн тэрээр тус үйл ажиллагаанаас цуглуулсан хандивын хөрөнгийг зориулалтын бусаар зарцуулсан, мөн Айова мужийн хуулийг зөрчиж хотоос гадуур цалинтай амралт авсан байна.

Трейси Ланг нь 2017 онд иргэдээс ирсэн өргөдөл, хотын гудамжтай холбоотой санхүүгийн тайлан, хотын зөвлөлийн хуралдааны баримт бичгийг хуурамчаар үйлдсэн гэмт хэрэгт шалгагдаж байна.

2017 оны мужийн аудитын тайланд тайлбарласнаар хотын санхүүгийн менежмент шаардлагад нийцээгүй болно. Мөрдөгчдийн олж тогтоосноор нийтийн аж ахуйн үйлчилгээний төлбөрийн олон арван мянган ам.долларыг тооцоолоогүй эсхүл зохих ёсоор төлөөгүй байсан бөгөөд мөн зохисгүй цалин хөлсний зардал, татварын торгууль буруу ногдуулсны улмаас олон мянган ам.долларын зардал гаргасан байна.

Тус хотын албан хаагчид компьютерын алдаанаас шалтгаалан 2016 онд санхүүгийн тайлан болон нийтийн аж ахуйн үйлчилгээний ашиглалтын бүртгэл устгагдсан талаар Аудитын газарт мэдэгджээ. Үүнээс шалтгаалан нийтийн аж ахуйн үйлчилгээний ашиглалтын зардлыг тооцоолох боломжгүй болж ус ашиглалтын төлбөр аваагүй, мөн зарим хэрэглэгчдээс бохир усны татварыг зохих ёсоор цуглуулаагүй үйлдлийг Аудитын газраас тогтоосон байна.

Аудитын газраас шалгалт хийх явцад зохих ёсоор байршуулаагүй олон тооны төлбөрийн чек хотын захиргааны байрны өрөөний шаланд унасан байсныг олжээ.  Нийтийн аж ахуйн үйлчилгээний төлбөр төлөгдөөгүй талаар хэд хэдэн албан тушаалтан гомдол гаргасны дагуу Цагдаагийн газраас шалгалт хийсний үр дүнд хотын захиргааны байгууллагаас их хэмжээний хөрөнгө хураасан байна.

Грег Бум, Крейг Меррилл болон зарим албан хаагчид түүнийг байхгүй тохиолдолд хотын захиргааны санхүүгийн мэдээлэлд нэвтрэх боломжтой талаар хотын нарийн бичгийн ажилтан асан Мэри К.Статон Аудитын газарт мэдэгджээ. Түүний тайлбарлаж буйгаар цахим шуудан болон төлбөрийн хөрөнгө олон тохиолдолд алга болсон байна.

Грег Бум нь 2013 онд хотын захирагчаар сонгогдсон бөгөөд 2 жилийн дараа ажлаасаа чөлөөлөгджээ. Гэвч 2016 оны ээлжит бус сонгуулиар дахин сонгогдож, 2017 болон 2019 онуудад мөн сонгуульд ялалт байгуулсан юм.

Санхүүгийн тайланд тусгаснаар 2020 оны санхүүгийн жилд тус хот 1.4 сая ам.долларын орлого олж, 1.1 сая ам.долларын зарлага гаргасан байна.

Трейси Ланг ямар хэрэгт буруутгагдаж буй талаар дэлгэрэнгүй мэдээлэл авахыг хүсэж байгаа бөгөөд нэмэлт тайлбар өгөхгүй талаар түүний өмгөөлөгч Бетани Брандс мэдээлжээ. Харин Грег Бумын өмгөөлөгч тайлбар өгөөгүй байна.

Дэлгэрэнгүй унших

Сэтгэгдэл

Цаг үе

Улаанбаатарт өдөртөө 31 хэм дулаан

Огноо:

,

Малчид, иргэд, тээвэрчдийн анхааралд: Өнөөдөр ихэнх нутгаар халж, хуурайшилт нэмэгдэх тул гал түймрийн аюулаас сэрэмжтэй байхыг анхааруулж байна.

2024 оны тавдугаар сарын 21-ний 08 цагаас 20 цаг хүртэл: Үүлшинэ. Монгол-Алтай, Хөвсгөлийн уулархаг нутаг, Увс нуурын хотгороор бороо орно. Бусад нутгаар багавтар үүлтэй, бороо орохгүй. Салхи нутгийн хойд хэсгээр баруун өмнөөс баруун хойш эргэж, бусад нутгаар баруун өмнөөс секундэд 5-10 метр, нутгийн зарим газраар секундэд 12-14 метр хүрч ширүүсэж, шороон шуурга шуурна. Монгол-Алтайн уулархаг нутгаар 16-21 хэм, Увс нуур болон Дархадын хотгор, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчмоор 21-26 хэм, Орхон-Сэлэнгийн сав газар, говийн бүс нутгаар 32-37 хэм, бусад нутгаар 26..31 хэм дулаан байна.


УЛААНБААТАР ХОТ ОРЧМООР: Багавтар үүлтэй. Бороо орохгүй. Салхи баруун өмнөөс секундэд 6-11 метр. Өдөртөө 29-31 хэм дулаан байна.

БАГАНУУР ОРЧМООР: Багавтар үүлтэй. Бороо орохгүй. Салхи баруун өмнөөс секундэд 8-13 метр. Өдөртөө 29-31 хэм дулаан байна.

ТЭРЭЛЖ ОРЧМООР: Багавтар үүлтэй. Бороо орохгүй. Салхи баруун өмнөөс секундэд 6-11 метр. Өдөртөө 26-28 хэм дулаан байна.


2024 оны тавдугаар сарын 22-ноос 2024 оны тавдугаар сарын 26-ныг
хүртэлх цаг агаарын урьдчилсан төлөв

22-нд баруун болон зүүн аймгуудын нутгийн хойд, төвийн аймгуудын ихэнх нутгаар, 23-нд баруун болон говийн аймгуудын нутгийн зарим газар, төвийн аймгуудын ихэнх нутгаар, 24-нд нутгийн хойд хэсгээр, 25-нд нутгийн зүүн хагаст бороо орно. Салхи ихэнх хугацаанд секундэд 6-11 метр, 22-нд Алтайн уулархаг нутаг болон говь, тал, хээрийн нутгаар, 23-нд Алтайн салбар уулсаар, 24-нд говь, тал хээрийн нутгаар секундэд 14-16 метр хүрч ширүүсэж, шороон шуурга шуурна. Ихэнх хугацаанд нутгийн хойд хэсгээр сэрүүсэж, Монгол-Алтай, Хангай, Хөвсгөл, Хэнтийн уулархаг нутаг, Дархадын хотгор, Эг, Үүр, Тэрэлж, Онон, Улз, Халх голын хөндийгөөр шөнөдөө 1-6 хэм, өдөртөө 14-19 хэм, Завхан голын эх, Хүрэнбэлчир орчим, Идэр, Тэс, Орхон, Хараа, Ерөө, Туул голын хөндийгөөр шөнөдөө 6-11 хэм, өдөртөө 20-25 хэм, говийн бүс нутгийн өмнөд хэсгээр шөнөдөө 16-21 хэм, өдөртөө 31-36 хэм, бусад нутгаар шөнөдөө 10-15 хэм, өдөртөө 25-30 хэм дулаан байна.

Дэлгэрэнгүй унших

Цаг үе

"Нарантуул" захын уулзвараас "Өгөөмөр" зах хүртэлх авто замыг засварлаж байна

Огноо:

,

"Нарантуул" захын уулзвараас "Өгөөмөр" зах хүртэлх авто замд засвар, шинэчлэл хийх гэж байна. Тодруулбал, 2024 оны тавдугаар сарын 20-ны өдрийн 23:00 цагаас 2024 оны тавдугаар сарын 23-ны өдрийн 06:00 цагийн хооронд авто замыг хааж хэсэгчилсэн засвар, шинэчлэлтийн ажлыг хийж гүйцэтгэнэ.

Энэ ажлын хүрээнд хашлага өндөрлөж зорчих хэсгийн түвшинд тааруулах, зорчих хэсгийн худгийн таг өндөрлөх, асфальтбетон хучилт, тэмдэг тэмдэглэгээний ажлууд хийнэ. 

Иймд иргэд, жолооч та бүхэн бусад замыг сонгон хөдөлгөөнд оролцоно уу гэж Нийслэлийн Замын хөгжлийн газраас мэдээллээ. 

Дэлгэрэнгүй унших

Цаг үе

Хувийн хэрэглээний зориулалтаар улсын хилээр нэвтрүүлэхийг хориглосон эм бэлдмэлүүд

Огноо:

,

Яаралтай тусламжийн 7 хүртэл хоногийн эм, удаан хугацаанд нөхөх эмчилгээ шаардах чихрийн шижин, хорт хавдар, сэтгэцийн эмгэг, дархлалын олдмол хомсдол зэрэг өвчтэй хүмүүсийн хэрэглэх Зорчигчийн хувийн хэрэглээний эмийг улсын хилээр нэвтрүүлэх боломжтой.

Зорчигчийн хувийн хэрэглээний эмийг эмнэлгийн байгууллагын магадалгааг үндэслэж тоо хэмжээг нь тогтоож улсын хилээр нэвтрүүлдэг
Энэ тохиолдолд бол тусгай зөвшөөрөл шаардахгүй, ямар нэгэн татвар ногдуулахгүй. Хувийн хэрэглээний зориулалтаар улсын хилээр нэвтрүүлэхийг хориглосон дараах төрлийн эм бэлдмэлүүд байдаг.

Үүнд:

- судсаар сэлбэх шингэн,
- антибиотик  тариа,
- мансууруулах, сэтгэцэд нөлөөт эм,
- цусны бэлдмэл сийвэн орлох эм,
- нийтлэг дархлаажуулалтад хэрэглэх эм, бэлдмэл байдаг гэж Гаалийн Ерөнхий газраас мэдээллээ.

Дэлгэрэнгүй унших

Санал болгох