Улстөр нийгэм
ИНЕГ-ын дарга С.Мөнхнасан БНСУ-ын “ASIANA AIRLINES” компанийн төлөөллийг хүлээн авч уулзлаа
БНСУ-ын агаарын тээврийн хоёр дахь том компани болох “Asiana Airlines” компани 2019 онд Монгол дахь салбараа нээж, Улаанбаатар-Сөүл-Улаанбаатар чиглэлд шууд нислэг үйлдэж эхэлсэн. Сүүлийн жилүүдэд Монгол улс, БНСУ-ын харилцаа, хамтын ажиллагаа эрчимтэй хөгжиж, хоёр орны хооронд зорчих зорчигчдын урсгал нэмэгдэхийн хэрээр нислэгийн тоо болон чиглэлийг нэмэх зайлшгүй шаардлага үүсээд байгаа юм. “Asiana Airlines” компани өнөөдрийн байдлаар УБ-Сөүл-УБ чиглэлийн нислэгээ долоо хоногт нэг удаа үйлдэж байна. Тус компанийн төлөөллийг ИНЕГ-ын дарга С.Мөнхнасан хүлээн авч, уулзлаа.
“Asiana Airlines” компаний Гадаад харилцаа, хамтын ажиллагаа хариуцсан захирал Ким Тэ Ёб “Бид цар тахлаас хойшхи анхны гадаад уулзалтаа Монгол Улсын Иргэний нисэхийн ерөнхий газарт хийж байгаадаа их баяртай байна. Өнгөрсөн хоёр жилийн хугацаанд аль аль улсад нь коронавирусын нөхцөл байдал хүнд байсан ч УБ-Сөүлийн чиглэлийн нислэгээ зогсоохгүй байхыг хичээсэн. Одоогоор долоо хоногт нэг удаа нислэг үйлдэж байгаа бөгөөд цаашид нислэгийн тоо, суудлын тоогоо нэмэгдүүлэх хүсэлтэй байна. Мөн ОХУ болон Украин улсын нөхцөл байдлаас шалтгаалан агаарын замаар хэт их тойрох хүндрэл сүүлийн үед их болсон. Энэ асуудалд ИНЕГ-тай хамтарч ажиллах боломж бий гэж бодож байна. БНСУ-ын Шударга өрсөлдөөний хорооноос Монгол-Солонгос хоёр улсын хооронд үйлдэгдэх нислэг бол хязгааргүй зах зээл гэж үзэж байгаа. Манай улсын иргэд Монгол улсад аялалаар ирэх хүсэлт их байдаг. Энэ зунаас хоёр улсын харилцан аялал жуулчлалын тоо ч мөн нэмэгдэх төлөвтэй байгаа учир бидний шууд нислэгийн давтамж нэмэгдэх байх” гэсэн юм.
Харин ИНЕГ-ын дарга С.Мөнхнасан “Цар тахлын үед зөвхөн Монгол улс гэлтгүй дэлхий дахинд агаарын тээврийн салбар хүнд байдалд байлаа. Гэхдээ удахгүй сайхан цаг ирнэ гэж итгэж байна. Бид агаарын тээврийн компаниудын мэдээллийг цаг тухайд нь авч, нөхцөл байдалтай уялдуулан дараа дараагийн ажлуудаа төлөвлөж байгаа. “Asiana Airlines” компанийн хувьд зөвхөн УБ-Сөүл чиглэлийн нислэг бус Ази Европыг холбосон бусад төрлийн нислэгүүдээ Монгол улсын газар нутгаар дайран өнгөрүүлэх боломжтой. Хэрэв Монгол улсын агаарын замыг ашиглах тохиолдолд манай зүгээс ямар нэгэн хүндрэл бэрхшээлгүй, агаарын замыг аль болох шулуутгах талаар дэмжлэг үзүүлэхэд бэлэн байна. Аялал жуулчлалын тухайд судалгаа хийж, зах зээлээ зөв тодорхойлж, түүндээ суурилсан төлөвлөгөө гаргаснаар нислэг болон суудлын тоог нэмэгдүүлэх эсэх асуудлыг хэлэлцэх нь зүйтэй ” гэв.
Ийнхүү энэ удаагийн албан уулзалт дараа дараагийн хамтын ажиллагааны талаар харилцан санал солилцсон, үр дүнтэй уулзалт боллоо.
Эх сурвалж: ИНЕГ
Улстөр нийгэм
COP17-д хоол, хүнсний үйлчилгээ үзүүлж буй 30 байгууллагад зөвлөн тусалж байна
ХХААХҮЯ, НХХААГ, НМЭГ-ын улсын болон ахлах байцаагчид Цөлжилттэй тэмцэх тухай НҮБ-ын Конвенцын Талуудын 17 дугаар Бага хурал (COP-17)-ын хүрээнд Цэнхэр, Ногоон бүсэд үйл ажиллагаа явуулж буй 30 аж ахуйн нэгж, байгууллагын хоол үйлдвэрлэл, үйлчилгээний үйл ажиллагаанд энэ сарын 17-ны өдрөөс эхлэн зөвлөн туслаж ажиллаж эхэллээ.
Тухайлбал, улсын байцаагчид хоол хүнсний чанар, аюулгүй байдал, хүнсний түүхий эд, бүтээгдэхүүний хадгалалт, хэрэглэх хугацаа, хоол үйлдвэрлэлийн технологийн үйл ажиллагаа, хадгалалтын температурын горим, тоног төхөөрөмж, багаж хэрэгслийн цэвэрлэгээ, халдваргүйтгэл, ажилтнуудын хувийн болон үйлдвэрлэлийн эрүүл ахуй нөхцөл байдал чиглэлээр зөвлөн тусалж байна.
Мөн Катерингийн үйлчилгээний хүрээнд бэлэн хоол, хүнсний бүтээгдэхүүн тээвэрлэж буй авто тээврийн хэрэгслийн эрүүл ахуй, ариун цэвэр, температурын горим, тээвэрлэлтийн нөхцөл, түүнчлэн лац ломбын бүрэн бүтэн байдлыг шалгаж, аюулгүй байдлыг хангуулах, илэрсэн зөрчил, дутагдлыг газар дээр нь арилгуулах, хүнсний аюулгүй байдал, эрүүл ахуйн шаардлагыг хангах талаар мэргэжил, арга зүйн зөвлөгөө өгч, хэрэгжилтийг хангуулан ажиллаж байна.
Улстөр нийгэм
ОБЕГ НҮБ-Хабитаттай хот суурин газрын гамшгийн эрсдэлийг бууруулах чиглэлээр хамтарна
Онцгой байдлын ерөнхий газрын дарга, хошууч генерал Г.Ариунбуян COP17-д оролцож буй НҮБ-ын Хүн амын нутагшил, суурьшлын хөтөлбөрийн Ази, Номхон далайн бүсийн төвийн хөтөлбөрийн ажилтан Рой Кититэй хоёр талт уулзалт хийлээ.
Уулзалтаар хот суурин газрын гамшгийн эрсдэлийг бууруулах, иргэдийн гамшгийг даван туулах чадавхыг бэхжүүлэх, болзошгүй эрсдэлээс хамгаалах чиглэлээр хамтын ажиллагаагаа өргөжүүлэх талаар санал солилцжээ.
Түүнчлэн НҮБ-Хабитат хөтөлбөртэй хамтран хот суурин газрын гамшгийн эрсдэлийг бууруулах чиглэлээр шинэ төсөл, хөтөлбөр хэрэгжүүлэх боломжийг хэлэлцсэн байна.
Хошууч генерал Г.Ариунбуян Монгол Улсын Онцгой байдлын байгууллага болон НҮБ-ын хамтын ажиллагаа 2004 оноос эхлэлтэйг уулзалтын үеэр онцолжээ. Тухайн үед Монгол Улсын Засгийн газрын хүсэлтээр НҮБ-ын Гамшгийн үнэлгээ, зохицуулалтын баг Монгол Улсад ажиллаж, гамшиг, осолтой тэмцэх үндэсний чадавхад хөндлөнгийн үнэлгээ хийсэн байна.
Өдгөө Онцгой байдлын байгууллага НҮБ-ын Монгол дахь Суурин зохицуулагчийн газар болон НҮБ-ын төрөлжсөн байгууллагуудтай гамшгийн эрсдэлийг бууруулах, гамшгийн хор уршгийг арилгах, хүмүүнлэгийн тусламж үзүүлэх чиглэлээр хамтран ажиллаж байгаа юм.
Энэ удаагийн уулзалтаар талууд хамтын ажиллагааг хотын гамшигт тэсвэртэй байдлыг нэмэгдүүлэх, иргэдийн бэлэн байдлыг сайжруулах бодит төсөл, хөтөлбөрөөр өргөжүүлэх боломжийг онцлон хэлэлцжээ.
Улстөр нийгэм
Нийслэл COP17-ын Ногоон бүсэд хотын хөгжлийн төслүүдээ танилцуулж байна
Цөлжилттэй тэмцэх тухай НҮБ-ын конвенцын Талуудын 17 дугаар бага хурал буюу COP17-ын Ногоон бүсэд Улаанбаатар хотын хөгжлийн төсөл, хөтөлбөрүүдийг гадаад, дотоодын хөрөнгө оруулагчид, бизнес эрхлэгчид болон иргэдэд танилцуулж байна.
Ногоон бүсийн нийт 4000 ам метр талбайд 160 гаруй павильон ажиллаж байгаагаас нийслэл таван павильонд таван үндсэн чиглэлийн төсөл, хөтөлбөрөө дэлгэн үзүүлжээ.
Тухайлбал, Улаанбаатар хотыг тэлэх бодлогын хүрээнд дагуул хот, тусгай бүсүүдийн төлөвлөлт, нийтийн тээвэр болон авто замын хүртээмжийг нэмэгдүүлэх, түгжрэл, агаарын бохирдлыг бууруулах төслүүдийг танилцуулж байна.
Мөн нийслэлийн эрчим хүчний хангамжийг сайжруулах ногоон эрчим хүчний төслүүд, хог хаягдлыг дахин боловсруулах үйлдвэр, дөрвөн агро паркийн үйл ажиллагааг өргөжүүлэх боломж болон төр, хувийн хэвшлийн түншлэлээр хэрэгжүүлэх ногоон орон сууцны төслүүдийг танилцуулж байгаа юм.
Нийслэлийн Замын хөгжлийн төсөл, хөтөлбөрийн зохицуулагч Л.Хосбаяр COP17 нь Улаанбаатар хотод хэрэгжиж буй болон хэрэгжүүлэхээр төлөвлөсөн төслүүдэд гадаад, дотоодын хөрөнгө оруулалт татах, бизнесийн байгууллагуудтай хамтын ажиллагаа өргөжүүлэх боломж болж байгааг онцолжээ.
Тэрбээр бизнес эрхлэгч, хөрөнгө оруулагчдыг нийслэлийн төсөл, хөтөлбөрүүдтэй танилцаж, хотын хөгжилд хамтран ажиллах боломжийн талаар санал солилцохыг урьсан байна.
Нийслэл эдгээр төслөөр дамжуулан түгжрэл, агаар, орчны бохирдлыг бууруулах, дэд бүтцийн хүртээмжийг нэмэгдүүлэх, Улаанбаатарыг аюулгүй, ногоон хот болгон хөгжүүлэхэд хөрөнгө оруулагчидтай хамтран ажиллахаар зорьж байна.
