Бидэнтэй нэгдэх

Үзэл бодол

У.Хүрэлсүх: Онцгой байдлын байгууллагыг орчин үеийн мэргэжлийн болгон хөгжүүлэхийг бүх талаар дэмжинэ

Огноо:

,

Онцгой байдлын албаны 18 жилийн ойн баярын хүндэтгэлийн хурал Соёлын төв өргөөнд болж, Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх нийт бие бүрэлдэхүүнд баяр хүргэн, ажлын амжилт хүсэн ерөөв.

Тэрбээр Орхон аймгийн Онцгой байдлын газрын Эрэн хайх, аврах ангийн аврагч-химичин, ахлах ахлагч Жамсрандоржийн Балданнямд “Онцгой байдлын албаны анхны сайдын нэрэмжит шагнал” болон 20 сая төгрөгийг гардуулав.

Ахлах ахлагч Ж.Балданням нь 17 жилийн хугацаанд аюулт үзэгдэл, ослын 129 дуудлагаар ажиллаж, 57 хүний амь насыг аварч, 67 буцалтгүй нэрвэгдэгчийг гарган, ой, хээрийн болон объектын гал түймэр унтраахад оролцож, аж, ахуйн нэгж, байгууллага, иргэд, улсын 780 сая төгрөгийн өмч хөрөнгийг авран хамгаалжээ.

Монгол Улсын Ерөнхийлөгч хүндэтгэлийн хурлыг нээж хэлсэн үгийг бүрэн эхээр нь хүргэж байна.


МОНГОЛ УЛСЫН ЕРӨНХИЙЛӨГЧ УХНААГИЙН ХҮРЭЛСҮХ:

“Эрхэм хүндэт генерал, офицер, ахлагч, ажилтан, алба хаагчид аа,
Онцгой байдлын байгууллагын тулгын чулууг тавилцсан эрхэм хүндэт ахмадууд аа,

Та бүхэнд Монгол Улсын аюулгүй байдал, ард иргэдийн амгалан тайван амьдралын нэгэн баталгаа болсон Онцгой байдлын байгууллагын болон, тус газрын харьяа Үндэсний аврах бригадын 55, Уул уурхайн аврах 09 дүгээр ангийн 70 жилийн ойн баярын мэнд хүргэе.

Одоогоос 18 жилийн өмнө эх орон, ард түмнийхээ амар амгалан, аюулгүй байдлын төлөө зүтгэж ирсэн Гал түймэртэй тэмцэх байгууллага, Иргэний хамгаалалтын байгууллага, Улсын нөөцийн байгууллага нэгдэн нэгэн тугийн дор жагсаж, гамшгаас хамгаалах нэгдсэн тогтолцоонд шилжсэнээр Онцгой байдлын байгууллага үүсэн байгуулагдсан билээ.

Эх орон, ард түмнээ гамшгийн аюул, эрсдлээс хамгаалахын төлөө алтан амиа зориулах тангарагтай, нэр хүнд, сахилга бат, ажил үйлсээрээ үлгэр дуурайл үзүүлж байдаг алба хаагчдаараа Монголын ард түмэн, төр, засаг үргэлж бахархдаг бөгөөд Та бүхнийг “Энх цагийн эгэл баатрууд” хэмээн хүндэтгэн хайрладаг билээ.

Өнгөрсөн хугацаанд онцгой байдлын байгууллагын удирдлагын тогтолцоо, хууль эрх зүйн орчин бүрэлдэж, техник, тоног төхөөрөмжийн хангалт, хүчин чадал нэмэгдэн, алба хаагчдын мэргэжлийн ур чадвар жилээс жилд өсөн хөгжиж байгаад сэтгэл хангалуун байна.

Тус байгууллагын түүхэн замнал та бүхний хичээл зүтгэл, идэвх санаачилга, гавьяат үйлс, туршлага, сургамжаар улам бүр зузаарсаар байна.

“Ковид-19” цар тахалтай хийсэн тэмцэл Онцгой байдлын байгууллагын удирдлага, алба хаагчдын бэлэн байдал, бэлтгэлжилтийг сорьсон томоохон шалгалт боллоо.

Цар тахлын үеийн хорио цээрийн дэглэмд ард иргэдийнхээ амь нас, аюулгүй байдлыг сахин хамгаалахын төлөө гэр бүл, үр хүүхдээ орхин, өдөр шөнөгүй хүчин зүтгэж, амь нас, эрүүл мэндээ үл хайрлан, тэргүүн шугамд ажилласан Та бүхэнд ард иргэдийнхээ нэрийн өмнөөс гүн талархал илэрхийлье. 

Мэргэжлийн байгууллагуудын чадавхыг нэмэгдүүлэн хүн ам, хүрээлэн буй орчны аюулгүй байдлыг хангах, уур амьсгалын өөрчлөлтийн нөлөөллийг багасгах, байгаль экологийн тэнцвэрт байдлыг хадгалах, гамшгийн хор хохирлыг бууруулах асуудал төрийн тэргүүний анхаарлын төвд байнга байдаг билээ.

Монгол Улсын Ерөнхийлөгчийн мөрийн хөтөлбөрийн “Ногоон хөгжил-Монголын ирээдүй” зорилтын хүрээнд байгаль орчноо хамгаалах, эрүүл экологитой газар нутгаа үр хойчдоо өвлүүлэн үлдээх зорилгоор “Тэрбум мод” үндэсний хөдөлгөөн, Хөвсгөл нуурын экосистемийг хамгаалах, бохирдлыг бууруулах, нуурт живсэн автомашин, техникүүдийн татан гаргах зэргийг санаачлагыг хэрэгжүүлж байна.

Үүнд Онцгой байдлын байгууллагын алба хаагчид та бүхэн манлайлан оролцож байгааг талархан тэмдэглэж байна. 

Хөвсгөл нууранд 36 жилийн өмнө живсэн “Сүхбаатар” хөлөг онгоцыг өнгөрсөн онд татаж гарган, нуурыг бохирдуулж байсан нэг том эх үүсвэрийг аюулгүй болгосон нь бидний хувьд томоохон сорилт байсан төдийгүй хамтарч, зориглоод ажиллавал бид чадна гэдгийг харуулсан, итгэл найдвар төрүүлсэн ажил боллоо.

Цаашид мод үржүүлэх, ойн сан, ой модны нөөцийг нэмэгдүүлэх, хүнсний хангамжийг сайжруулах, байгаль дэлхийгээ хамгаалах, ой, хээрийн түймрээс сэргийлэхэд та бүхний үүрэг, оролцоо хамгийн чухал болохыг цохон тэмдэглэж байна.

Төрийн цэргийн байгууллагын хувьд Онцгой байдлын байгууллагын алба хаагчдын цэргийн мэргэжлийн ур чадвар жилээс жилд өсөж байгаа нь сайшаалтай.

Цэргийн алба хаагчдын мэргэжлийн ур чадвар, бие бялдар, сэтгэл зүйн бэлтгэл, тэсвэр хатуужлыг сорьдог Монгол Улсын Ерөнхийлөгч, Зэвсэгт хүчний Ерөнхий командлагчийн нэрэмжит “Марш-тусгай бэлтгэлийн цогцолбор тэмцээн”-д Онцгой байдлын байгууллагын алба хаагчид дэд байрт шалгарсан бахдам амжилт үзүүллээ.

Та бүхэнд дахин баяр хүргэж, амжилт хүсье.

Онцгой байдлын албаны анхны сайд, Монгол Улсын Шадар сайдаар хоёр удаа томилогдон ажиллахдаа Онцгой байдлын байгууллагын суурийг та бүхэнтэй тавилцаж, хөгжүүлэн бэхжүүлэх үйлсэд санаа зорилго, итгэл сэтгэл нэгдэн хамтдаа зүтгэсэн он жилүүд миний амьдралын хамгийн дурсамжтай үе байдаг.

Та бүхэнтэй хамт гамшиг, ослын голомтод  үүрэг гүйцэтгэж байхад халширч шантарсан, зориг тэвчээр алдарсан нэг ч үгийг та бүхнээс сонсож байгаагүйгээ эргэн дурсахад бахархалтай сайхан байна.

Ийм л эх орны эр зоригтой охид, хөвгүүд байдаг учраас ард түмэн Та бүхнээр бахархдаг юм шүү.

Онцгой байдлын албаны тулгын чулууг тавилцсан үе үеийн удирдлага, энэ байгууллагатай ажил амьдралаа холбосон чөлөөнд байгаа алба хаагчид, ахмадууддаа баярын мэндийг өргөн дэвшүүлье.

Энэ ойн баярын өдөр Монгол төрийн тэргүүн зарлиг буулгаж, хурандаа генерал С.Равдангийн нэрэмжит, Цэргийн гавьяаны улаан тугийн одонт Үндэсний аврах бригадыг Сүхбаатарын одонгоор, Уул уурхайн аврах 09 дүгээр ангийг Алтан гадас одонгоор шагнаж, Онцгой байдлын албаны удирдах албан тушаалтнуудад генерал цол олгон, зарим шилдэг алба хаагчийг төрийн одон, медалиар шагналаа.

Эх орон, ард түмнийхээ итгэлийг зүтгэлээр хариулж, үүргээ нэр төртэй гүйцэтгэж байгаа Та бүхэндээ цэргийн дээд цол, төрийн одон, медалиар шагнуулсанд баяр хүргэж, цаашдын албанд тань улам өндөр амжилт хүсэн ерөөе.

Баярын энэ өдөр Онцгой байдлын асуудал эрхэлсэн анхны сайдын нэрэмжит шагнал бий болгож, эх орон, ард түмнийхээ төлөө онцгой гавьяа байгуулсан нэг алба хаагчид жил бүр олгож байх болсон нь нэн сайшаалтай.

Монгол Улсын Ерөнхийлөгч, Зэвсэгт хүчний Ерөнхий командлагч цаашид гамшгаас хамгаалах үндэсний чадавхыг бэхжүүлэх, гамшигтай тэмцэх, эрэн хайх, аврах, хор уршгийг арилгах, хойшлуулшгүй сэргээн босгох ажиллагааг дэлхий нийтийн хөгжлийн чиг хандлагад нийцүүлэх, эрх зүйн орчныг нь төгөлдөржүүлж, орчин үеийн мэргэжлийн байгууллага болгон хөгжүүлэх зорилтыг бүх талаар дэмжих болно.

Эрхэм хүндэт цэрэг эрс, Онцгой байдлын алба хаагчид Та бүхнийхээ онцгой хариуцлагатай бөгөөд нэр хүндтэй их үйлсэд амжилт бүтээлийн дээдийг хүсэн ерөөе.

Баярт энэ өдрийг тохиолдуулан эх орон, ард түмнийхээ төлөө зүтгэж байгаа Та бүхний бат бэх ар тал, ёс суртахууны өндөрлөг болж байдаг гэр бүл, төрөл төрөгсөд, үр хүүхдүүдэд тань чин сэтгэлийн талархал илэрхийлж, баярын мэнд хүргэе.

Мөнх хөх тэнгэрийн хүчин дор Монгол Улс мандан бадрах болтугай.

Монгол Улсын төлөө зүтгэе” гэлээ.

Дэлгэрэнгүй унших

Сэтгэгдэл

Үзэл бодол

Г.Чулуунбаатар: Зөвлөлдөх санал асуулгын асуулт дотор “шинээр Үндсэн хууль батлах” тухай агуулга огт байхгүй

Огноо:

,

Улс орны нийгэм, эдийн засгийн тулгамдсан асуудлыг иргэдийн туслалцаатайгаар тодорхойлох, асуудлын эрэмбэ, шийдвэрлэх арга зам, гаргах шийдвэрийн талаар иргэдтэй зөвлөлдөх, үндэсний зөвшилцлийг хангах зорилготой “Зөвлөлдөж шийдье” зөвлөлдөх санал асуулгын эхний үе шатны үйл ажиллагаа маргааш эхлэх гэж байгаатай холбогдуулан тус санал асуулгыг улсын хэмжээнд удирдан зохион байгуулах Зөвлөлдөх зөвлөлөөс өнөөдөр (2023.01.25) хэвлэлийн бага хурал хийлээ.

Хэвлэлийн бага хуралд Зөвлөлдөх зөвлөлийн дарга, академич Г.Чулуунбаатар, орлогч дарга, доктор Б.Отгонтөгс, гишүүн, доктор О.Мөнхсайхан, Үндэсний Статистикийн газрын Тооллого, өгөгдлийн шинжилгээний газрын дарга Ш.Ариунболд нар оролцлоо.

Зөвлөлдөх зөвлөлийн дарга Г.Чулуунбаатар хэвлэлийн бага хурлын эхэнд хийсэн мэдээлэлдээ, “Зөвлөлдөх санал асуулгын тухай” хуулийн дагуу хоёр үе шаттай явагдах “Зөвлөлдөж шийдье” зөвлөлдөх санал асуулгын эхний шат энэ сарын 30-ны дотор явагдаж дуусах бөгөөд зөвлөлдөх уулзалтын хэлбэрээр явагдах хоёр дахь үе шатны санал асуулга хоёрдугаар сарын 14-15-нд болно гэлээ. Тэрбээр, зөвлөлдөх санал асуулгын асуултуудыг боловсруулах чиг үүрэг хуулийн дагуу Зөвлөлдөх зөвлөлд байгааг дурдаад, тус Зөвлөл Улсын Их Хурлын 80 дугаар тогтоолын дагуу нэгдүгээр сарын 04, 11-ний өдрүүдэд зохион байгуулсан “Нийгэм, эдийн засгийн тулгамдсан асуудал, гарц, шийдэл” сэдэвт эрдэм шинжилгээний хурал, “Улс төр, эдийн засаг, эрх зүйн шийдэл-Нийгмийн зөвшилцөл” сэдэвт үндэсний чуулга уулзалтад оролцогчдоос гаргасан болон олон нийт, иргэний нийгмийн байгууллагууд, эрдэм шинжилгээ, судалгаа, сургалтын байгууллагын төлөөллүүдээс ирүүлсэн нийт 1100 орчим саналыг харгалзан үзэж, нэгтгэн нягталж, олон удаа тал бүрээс нь хэлэлцсэний эцэст үндсэн 22 асуултыг боловсруулж Үндэсний статистикийн хороонд хүргүүлээд байгааг мэдээлэв.

Хэвлэлийн бага хурлын үеэр сэтгүүлчид Монгол Улсын Үндсэн хуулийг шинээр батлах, эс бөгөөс дахин нэмэлт өөрчлөлт оруулах асуудал Зөвлөлдөх санал асуулгын асуултанд хэрхэн туссаныг сонирхож байлаа. Үүнд Зөвлөлдөх зөвлөлийн дарга Г.Чулуунбаатар, эрдэм шинжилгээний хурал болон үндэсний чуулга уулзалтын хүрээнд Үндсэн хуультай холбоотой асуудал гурван янзаар буюу 2019 оны нэмэлт, өөрчлөлтийг гүйцэт хэрэгжүүлэх, тодорхой нэмэлт өөрчлөлтийг Үндсэн хуульд дахин оруулах, шинэ Үндсэн хууль батлах гэсэн хувилбаруудаар хөндөгдсөн байсан тул бид хэлэлцэж, асуудлын томъёоллыг олон талаар ярилцсаны эцэст “шинэчлэн найруулах” гэсэн агуулга бүхий нэг л асуулт орж байгаа гэсэн юм. Зөвлөлдөх зөвлөлийн гишүүн, доктор О.Мөнхсайхан, асуултуудын боловсруулахдаа бид Үндсэн хууль болон Үндсэн хуульд нэмэлт өөрчлөлт оруулах журмын тухай хууль, холбгдох бусад хуулийн зохицуулалтын хүрээнд ажилласан хэмээгээд Зөвлөлдөх санал асуулгын асуулт дотор “шинээр Үндсэн хууль батлах” тухай асуудал огт байхгүйг онцлон дурдлаа.

Мөн сэтгүүлчид статистикийн мэдээлэл цуглуулах судалгааны санамсаргүй түүврийн аргачлал, эхний шатны санал асуулгад оролцуулах иргэдийн тоог 1570-аар тогтоосны шинжлэх ухааны үндэслэлийг сонирхож байв. Зөвлөлдөх зөвлөлийн дарга Г.Чулуунбаатар энэ талаарх мэдээлэлдээ, орчин үеийн статистик судалгаанд өргөн ашиглагдаж буй санамсаргүй түүврийн аргачлалыг Зөвлөлдөх санал асуулгад хэрэглэхээр Статистикийн Үндэсний хороо баталсан бөгөөд энэ аргачлалыг ашиглаж засаг захиргааны нэгжид суурилсан бүлэглэх аргаар сонгох 1570 хүн Монгол Улсын 18 болон түүнээс дээш насны нийт хүн ам, мөн хүн амын бүхий л бүлгийг төлөөлөх боломжтойг тайлбарлав хэмээн Улсын Их Хурлын Хэвлэл мэдээлэл, олон нийттэй харилцас хэлтсээс мэдээллээ.

Дэлгэрэнгүй унших

Үзэл бодол

Олон нийтийн сүлжээнд хүний эрхийг хамгаалах тухай хуулийн төслийг анхны хэлэлцүүлэгт шилжүүллээ

Огноо:

,

УИХ-ын 2022 оны намрын ээлжит чуулганы 2023 оны нэгдүгээр сарын 19-ний өдрийн үдээс өмнөх нэгдсэн хуралдаанаар Засгийн газраас 2023 оны нэгдүгээр сарын 18-ны өдөр өргөн мэдүүлсэн Олон нийтийн сүлжээнд хүний эрхийг хамгаалах тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх, эсэхийг хэлэлцлээ. Төсөл санаачлагчийн илтгэлийг Улсын Их Хурлын гишүн, Засгийн газрын гишүүн, Цахим хөгжил, харилцаа холбооны сайд Н.Учрал, Аюулгүй байдал, гадаад бодлогын байнгын хорооны санал, дүгнэлтийг Улсын Их Хурлын гишүүн  Н.Наранбаатар танилцуулав.

Технологийн хөгжилтэй зэрэгцэн бидний өдөр тутмын амьдрал цахим орчин, олон нийтийн сүлжээнд өрнөх болж, худалдаа наймаагаа хийх, мэдээлэл солилцох, үзэл бодлоо илэрхийлэх, хуваалцах зэрэг явдал нь ердийн үзэгдэл болж хэвшсэн байна. Технологийн дэвшил нь мэдээлэл, бараа, үйлчилгээ солилцоонд өндөр  хурд авчирч, холыг ойртуулж, хоёрыг уулзуулж байгаа хэдий ч үүнийг дагасан сөрөг үр дагавар, аюул эрсдэл үүсгэж байна.

Цахим орчинд үйлдэгдэж байгаа гэмт хэргийн тоо, хохирол асар хурдацтай өсөн нэмэгдэж байна. Цагдаагийн байгууллагын мэдээллээр зөвхөн 2022 онд цахим орчинд үйлдэгдсэн 8,563 гэмт хэрэг бүртгэгдсэн байна. Ганцхан жилийн дотор цахимаар залилах гэмт хэрэг 99.8 хувиар буюу 2 дахин, алдаатай гүйлгээ, андуурагдсан илгээмж, гээгдэл эд хөрөнгө, алдуул мал завших гэмт хэрэг 95.2 хувиар, кибер орчинд хууль бусаар халдах гэмт хэрэг 70.7 хувиар, хулгайлах гэмт хэрэг 37 хувиар, хүүхдийг садар самуунд уруу татах, бэлгийн эрх чөлөөний эсрэг гэмт хэрэг 18.5 дахин, бусдын эд хөрөнгийн авахаар заналхийлэх гэмт хэрэг 8.9 дахин өсчээ.  Энэ бүх тоо статистикийг дурьдаад өнгөрөх нэг хэрэг. Нугарч өссөн тоо хэмжээ, хувь бүрийн цаана монгол хүний амьдрал, хувь заяа, амь нас, эрүүл мэнд, хүүхдийн ирээдүй, насан туршид нь үл арилах сэтгэлийн шарх, гэмтэл үлдэж хоцорно гэдгийг төсөл санаачлагч илтгэлдээ дурдсан. Зөвхөн өнгөрсөн 2022 онд цахим орчинд үйлдэгдсэн гэмт хэргийн улмаас 19 тэрбум төгрөгийн хохирол учраад байгаа аж.

Цахим орчин дахь гэмт хэрэг огцом хурдан өсч байхад түүнээс урьдчилан сэргийлэх, шийдвэртэй тэмцэх ажил удаан байна, хуучинсаг байна. Шинэ орчны гэмт хэрэгтэй шинэ орчинд нь тэмцэх шаардлага байгааг тэрбээр дурдсан юм.

Олон нийтийн сүлжээнд хүний эрх, хууль ёсны ашиг сонирхлыг хамгаалах, ялгаварлан гадуурхалд өртдөггүй, үг хэлэх, үзэл бодлоо илэрхийлэх эрхээ баталгаатай эдэлдэг байх, эрүүл, аюулгүй орчныг бүрдүүлэх зорилгоор хуулийн төслийг боловсруулжээ. Мөн түүнчлэн олон нийтийн сүлжээнд үүсч болох эрсдлээс урьдчилан сэргийлэх, зөрчилтэй контентыг нэн яаралтай тодорхойлох, олж илрүүлэх, таслан зогсоох, цахим гэмт хэрэгтэй тэмцэх эрх зүйн үндсийг тодорхойлж, гэмт хэрэгтэй тэмцэх чадавхыг нэмэгдүүлэх нь энэ хуулийн зорилго гэлээ. Олон нийтийн сүлжээнд хүний эрхийг хамгаалах тухай хуулиар хүний захидал харилцааны нууцад халдахгүй. Олон нийтийн буюу 3 ба түүнээс дээш хэрэглэгчтэй цахим сүлжээнд нийтэд хүний эрхэнд халдсан, гэмт хэргийн шинж бүхий сөрөг агуулгатай контент нийтлэх, түгээх харилцаанд хамааруулж зохицуулсан. Хэрэглэгчийн эрх үүрэг, хүний эрхийг зөрчсөн, гэмт хэргийн агуулга бүхий контенттой тэмцэх тогтолцоог тогтоож өгчээ.

Олон нийтийн сүлжээний үйлчилгээ үзүүлж байгаа этгээд гэж хэнийг хэлэх, ямар эрх, үүрэгтэй байх, зөрчилтэй контенттой холбогдуулан хэрэглэгчээс ирсэн гомдол, мэдээллийг шийдвэрлэх, хэрэв Монгол Улсаас бүртгэлтэй 300,000 буюу түүнээс дээш тооны хэрэглэгчтэй бол төлөөлөгчийн газар нээж ажиллуулах, хэрэглэгчийг баталгаатай утасны дугаар, эсхүл цахим шуудангийн хаягаар баталгаажуулан бүртгэх, зөрчилтэй контентын талаарх олон нийттэй харилцах нэгжийн хүсэлт, шийдвэрийг хүлээн авч, 7 хоногийн дотор хянан шийдвэрлэх үүрэгтэй болохыг тусгасан байна.

Олон нийтийн сүлжээнд хүний эрхийг хамгаалах нь төр дангаар хийх боломжгүй тул технологийн салбарын мэргэжлийн шинжээч, судлаачид, олон улсад хүлээн зөвшөөрөгдсөн мэргэжлийн холбоод, төрийн бус байгууллага, Хүний эрхийн Үндэсний Комиссын идэвхтэй оролцох бололцоог хуульчлан баталгаажуулахаар төсөлд холбогдох зохицуулалтуудыг тусгасан байна.

Зөрчилтэй контентыг хянан шийдвэрлэх, олон нийтийн сүлжээний эрхлэгчтэй хамтран ажиллах нэгж байна. Хүний эрхийг зөрчсөн, гэмт хэргийн шинжтэй контентыг 24 цагаар тасралтгүй илрүүлж, оношлон тодорхойлж, нэн яаралтай горимоор сүлжээ эрхлэгчид нотлон мэдээлэх үүрэгтэй ажиллах юм байна.  Уг нэгжийг улсын төсвөөс нэмэлт зардал гаргахгүйгээр Кибер халдлага, зөрчилтэй тэмцэх нийтийн төвийн бүтцэд багтаан байгуулахаар хуулийн төслийг боловсруулжээ. Засгийн газрын яамд, холбогдох байгууллагуудаас санал авч, төсөл боловсруулах ажилд оролцоог нь ханган ажилласан байна. 

Түүнчлэн хувь хүний хуулиар тогтоосон алдар нэрийг хүндэтгэх зарчмыг бэхжүүлэх үүднээс Хүний хувийн мэдээлэл хамгаалах тухай хуульд хүний хувийн мэдээллийг хуулийн дагуу олон нийтэд хүргэхдээ мэдээллийн эзэнд нь мэдэгдэл хүргэх зарчмыг баримталж, нийтийн албан тушаалтан төрийн байгууллага хувь хүний мэдээлэлд хүндэтгэлтэй хандах, ямарваа байдлаар олон нийтийн сүлжээнд дэлгэдэг зохисгүй байдлыг бүрмөсөн хориглох болно. Үүний эхлэл болгож татварын ерөнхий хуульд нэмэлт өөрчлөлт оруулах хуулийн төслийг өргөн барьж байгаа бөгөөд, удаа дараа татварын зөрчил гаргасан хүний хувьд тухайн хүнд нь мэдэгдэл хүргэсэний үндсэн дээр зөвхөн нэр, татвар төлөгчийн дугаар, зөрчлийн мэдээллийн хамт олон нийтэд нийтэлж, мэдээлж болох тухай агуулгуудыг төсөлд тусгажээ.

Засгийн газраас Улсын Их Хурлаар нэн яаралтай хэлэлцүүлэхээр 2023 оны нэгдүгээр сарын 18-ны өдөр өргөн мэдүүлсэн Олон нийтийн сүлжээнд хүний эрхийг хамгаалах тухай хуулийн төсөл болон хамт өргөн мэдүүлсэн хуулийн төслүүдийн үзэл баримтлалыг хэлэлцэх эсэх асуудлыг Аюулгүй байдал, гадаад бодлогын байнгын хороо 2023 оны нэгдүгээр сарын 19-ний өдрийн хуралдаанаараа хэлэлцсэн байна. Байнгын хорооны хуралдаанд оролцсон гишүүд хуулийн төсөлтэй холбогдуулан асуулт асууж, үг хэлээгүй бөгөөд гишүүдийн олонх дээрх хуулийн төслийг үзэл баримтлалын хүрээнд хэлэлцэхийг дэмжиж, Улсын Их Хурлын чуулганы нэгдсэн хуралдаанаар хэлэлцүүлэх нь зүйтэй гэж үзсэн байна.

Төсөл санаачлагчийн илтгэл, Байнгын хорооны санал, дүгнэлттэй холбогдуулан Ё.Баатарбилэг, Ц.Мөнх-Оргил, Э.Батшугар, М.Оюунчимэг, Д.Цогтбаатар, Ц.Мөнхцэцэг, Ц.Сандаг-Очир нар асуулт асууж, Цахим хөгжил, харилцаа холбооны сайд болон ажлын хэсгээс хариулт авсан.

Төслүүдийг хэлэлцэх нь зүйтэй гэсэн саналын томьёоллоор санал хураалт явуулахад өнөөдрийн чуулганы нэгдсэн хуралдаанд оролцсон Улсын Их Хурлын 43 гишүүний 60.5 хувь нь дэмжсэн, иймд анхны хэлэлцүүлэгт бэлтгүүлэхээр Аюулгүй байдал, гадаад бодлогын байнгын хороонд шилжүүллээ.

Дэлгэрэнгүй унших

Үзэл бодол

Зам, талбай цэвэрлэх тусгай зориулалтын машин нь 6-8 хүний ажлыг гүйцэтгэнэ

Огноо:

,

Зам, талбай цэвэрлэх тусгай зориулалтын, бага оврын шинэ машинуудын талаар холбогдох албаныхан мэдээлэл өглөө.

Д.Бат-Эрдэнэ: Хамгийн боломжит үнээр оруулж ирсэн

Зам, талбайн цэвэрлэгээний машины сонгон шалгаруулалтад шалгарч, худалдан авалт, тээвэрлэлтийг хариуцан гүйцэтгэсэн “Батсээр” ХХК-ийн захирал Д.Бат-Эрдэнээс зарим зүйлийг тодрууллаа.

-Шинээр оруулж ирсэн зам, талбайн цэвэрлэгээний машины талаар танилцуулахгүй юу?

-Зам, талбайн цэвэрлэгээний эдгээр машин нь БНХАУ-ын “Greenhub” маркийнх. Монголын эрс тэс уур амьсгалтай нөхцөлд ажиллахад нэн тохиромжтой. Бүхээг дотроо агааржуулагч, халаалттай тул өвөл, зуны улиралд дааруулахгүй, халууцахгүй. Ашиглалтын хувьд ч давуу талууд бий. Машины урд талын хоёр шүүрээр явган хүний зам, талбай болон нуухны хог хаягдлыг шүүрдээд соруулж авдаг, усны хошуутай тул тоос шороо бужигнуулахгүй. Өвөлдөө дагтаршаагүй цас, хялмааг мөн шүүрдэн соруулж цэвэрлэнэ. Мөн хогийн саваа автоматаар буулгаж хог хаягдлаа асгах тул ажилчдын цаг завыг хэмнээд зогсохгүй, хөдөлмөрийг ч хөнгөвчилнө.

-Энэхүү машины үнэ 125 сая төгрөг. Худалдааны веб сайтууд дээрх адил төстэй машин хямд байна гэсэн мэдээлэл гарч байна. Энэ үнэ хэр үндэслэлтэй вэ?

-Хот тохижилтын үйлчилгээнд ашиглаж байгаа ийм машинуудыг 2019 онд 145 сая төгрөгөөр оруулж ирж байсан. Тэр үеэс хойш ачаа тээврийн төлбөр нэмэгдсэн.  Тухайлбал, Эрээнээс Замын-Үүд хүртэлх тээврийн зардал хамгийн багаар бодоход найм дахин өссөн. Дээр нь нэг контейнэрт ийм гурван л машин багтана. Нөгөө талаас, БНХАУ-д дотоодын тээвэр зогссон, үйлдвэрүүд ажиллаагүй гээд давагдашгүй хүчин зүйл олон байлаа. Яг ийм үзүүлэлттэй, энэ машиныг одоогийн нөхцөлд 125 сая төгрөгөөр оруулж ирнэ гэдэг хамгийн боломжит үнэ. Машины сонгон шалгаруулалттай холбоотой мэдээлэл,  зарласан хугацаа, шалгуур зэрэг мэдээллийг https://www.tender.gov.mn/ веб сайтаас харж болно шүү дээ.

Түүнээс гадна “Алибаба” зэрэг худалдааны веб сайт дээр байгаа үнээр баримжаалан хямд гэж үзээд байгаа. Машины хүчин чадал, үзүүлэлт, чанар, зориулалт нь өөр, мөн нэг бүрийнх нь үнийг сонгоод харахад ч өөр, тээвэр, яриа хэлцэл гээд олон хүчин зүйл нь харьцуулах боломжгүй байдаг.

С.Батболд: Шинэ машинуудыг жилийн дөрвөн улиралд, олон зориулалтаар ашиглана

Хот тохижилтын газар ОНӨААТҮГ-ын Ерөнхий инженер С.Батболд нар зам, талбайн цэвэрлэгээний машины үзүүлэлт, онцлогийн талаар “Одоо ашиглаж байгаа машинуудтай харьцуулахад хогийн сав нь 500 литр, усны сав нь 150 литрийн багтаамжтай болж нэмэгдсэн. Мөн хогийн савыг автоматаар буулган хог хаягдлаа асгадаг зэрэг давуу талтай болж сайжирсан байна. Жилийн дөрвөн улиралд зам, талбай болон  нуухын цэвэрлэгээг хийх боломжтой. Яг манайх шиг газар цэвэрлэгээ, арчилгааны олон зориулалтаар ашиглах тоноглолтой, хүчин чадалтай” гэв.

М.Цэрэндондов: Хөдөлмөрийг хөнгөвчилж, цаг хэмнэж байна

Хот тохижилтын газар ОНӨААТҮГ-ын зам, талбайн үйлчлэгч М.Цэрэндондов “Бид хариуцсан зам талбайнхаа нуухыг цэвэрлэхэд 2-3 цаг зарцуулдаг. Цаг агаар муудсан, цас орсон үед бүр ч илүү ачаалалтай ажиллана. Цэвэрлэгээнд энэ машиныг ашиглахад явган зам, нуухны цэвэрлэгээг маш их хөнгөвчилж, нэг өдөрт 6-8 хүний хийх ажлыг гүйцэтгэдэг. Тэгэхээр ажилчид, албан хаагчдын хөдөлмөрийг хөнгөвчлөөд зогсохгүй цаг завыг хэмнэж, бүтээмжийг нэмэгдүүлж байна” хэмээлээ.  

Дэлгэрэнгүй унших
сурталчилгаа
Цаг үе16 цаг 34 минут

"Зөвлөлдөж шийдье" зөвлөлдөх санал асуулгын эхний шатны мэ...

Цаг үе16 цаг 36 минут

УБТЗ уурхайчдын вагон захиалгыг 100 хувь хангаж байна

Улстөр нийгэм16 цаг 39 минут

Шадар сайд С.Амарсайхан ИБУИНХУ-ын Шадар сайд бөгөөд Хууль зүйн сайд...

Цаг үе16 цаг 52 минут

Авлигатай тэмцэх ажлыг хэрэгжүүлэх санал, дүгнэлт боловсруулах Ажлын...

Урлаг спорт16 цаг 56 минут

ЗГ: Олимпын наадамд бэлтгэх Үндэсний хорооны бүрэлдэхүүнийг шинэчлэн...

Шударга мэдээ16 цаг 59 минут

МИАТ: Энэ сарын 30-наас эхлэн Бээжин чиглэлд тогтмол нийслэг үйлдэнэ...

Цаг үе17 цаг 2 минут

Вьетнам улсад аяллын шугамаар зорчиж буй иргэдийн анхааралд!

Үзэл бодол17 цаг 12 минут

Г.Чулуунбаатар: Зөвлөлдөх санал асуулгын асуулт дотор “шинээр ...

Цаг үе17 цаг 35 минут

Өнөөдөр ихэнх нутгаар цаг агаар тогтуун байна

Цаг үе17 цаг 37 минут

Үс шинээр үргээлгэх буюу засуулбал эд мал арвидна

Санал болгох