Урлаг спорт
“Улирал ба зохиолч” сэтгүүлийн шагналыг сэтгүүлч Ө.Рагчаасүрэн хүртлээ
“Хүмүүний ертөнцийн сэтгэлийн гэгээрэлд уримуй” уриатай уран зохиолын шилдэг цоморлог “Улирал ба зохиолч” сэтгүүлийн 2022 оны шагналыг Монгол Улсын Соёлын Гавьяат зүтгэлтэн, сэтгүүлч Ө.Рагчаасүрэнд гардууллаа.
Түүнийг Иван Крамскойн “Танихгүй эмэгтэй”, Ц.Энхжин “Холбоо нуур”, Л.Гаваа “Кино механикч”, Павел Педатов “Анх удаа одонгоор шагнуулсан түшмэлийн өглөө” зэрэг сонгодог уран зургуудын тухай танин мэдэхүй-уран сайхны нийтлэл бичсэний учир ийнхүү онцолж дээрх шагналын эзнээр тодруулсан байна.
Шагналыг Монгол Улсын Соёлын Гавьяат зүтгэлтэн, Д.Нацагдоржийн шагналт яруу найрагч, “Улирал ба зохиолч” сэтгүүлийн Ерөнхий эрхлэгч Д.Нямаа гардуулав.
Ахмад сэтгүүлч Ө.Рагчаасүрэнгийн хувьд хоёр жилийн өмнөөс “Улирал ба зохиолч” сэтгүүлд булан эрхэлж, дэлхийн сонгодог уран зургуудын тухай дагнан бичиж эхэлжээ. Тэрбээр өдгөө Дархан-Уул аймагт ажиллаж, амьдарч байгаа бөгөөд Монголын хэвлэлийн хүрээлэнгийн хойд бүс хариуцсан зохицуулагчийн ажлыг хавсран гүйцэтгэж байна.
Урлаг спорт
“Парис-2024”-д ажиллах сайн дурынхныг бүртгэж эхэллээ
“Парис-2024” зуны олимп болон паралимпын наадмын үеэр сайн дурын 45 мянган хүн ажиллана. Тэдгээр сайн дурын ажилтны бүртгэх ажлыг Зохион байгуулах хорооноос эхлүүлсэн байна.
Энэ оны тавдугаар сарын 3 хүртэл үргэлжэх тус бүртгэлд хамрагдахын тулд дараах гурван шаардлагыг хангасан байх шаардлагатай аж. Үүнд:
- 2024 оны нэгдүгээр сарын 1-ний байдлаар 18 нас хүрсэн байх,
- Франц, англи хэлний аль нэгээр ярьж чаддаг байх,
- 2024 оны долдугаар сарын 12-ноос есдүгээр сарын 10-ны хооронд дор хаяж 10 өдөр ажиллах боломжтой байх,
Хэрэв та эдгээр шаардлагыг хангаж байгаа, сайн дурын ажилтнаар өөрийгөө сориод үзэхийг хүсэж байвал https://www.paris2024.org/en/volunteers хаягаар зочлон мэдээлэл авах боломжтой гэж зохион байгуулагчдын зүгээс мэдэгдэжээ.
Урлаг спорт
Катар Улсын Доха хотноо “Welcome тo Mongolia” арга хэмжээг зохион байгууллаа
Монгол Улсын Засгийн газар 2023, 2024, 2025 оныг “Монголд зочлох” аялал жуулчлалын жил болгон зарласан, мөн энэ онд Монгол, Катарын хооронд дипломат харилцаа тогтоосны 25 жилийн ой тохиож буйтай холбогдуулан Монгол Улсыг Катар Улсад сурталчлан таниулах зорилготой соёлын арга хэмжээг 2023 оны гуравдугаар сарын 6-ний өдөр Монгол Улсаас Катар Улсад хавсран суугаа Элчин сайдын яам Монгол Улсын Гадаад харилцааны яам, Соёлын яам, Байгаль орчин, аялал жуулчлалын яам, Катар Улсын соёл урлагийн сан “КАТАРА”-тай хамтран “Welcome to Mongolia” сэдвийн дор Доха хотноо зохион байгуулав.
Энэхүү арга хэмжээнд Монголын Үндэсний урлагийн их театр, Монгол Улсын гавьяат жүжигчин, Соёлын элч Э.Анхбаяр, “Queen model agency”-гийн загвар өмсөгчид, уран зураач С.Чулуунбаатар, М.Уламбаяр нар оролцож, Монголын ардын болоод орчин үеийн урлаг мөн дэлхийн сонгодог урлагийн номерууд болон байгаль, аж ахуйг харуулсан уран зургийн үзэсгэлэнг КАТАРА-гийн Драмын театрт толилууллаа.
Арга хэмжээг Монгол Улсын Ерөнхийлөгчийн Тамгын газрын дарга Я.Содбаатар нээж хэлсэн үгэндээ Монгол, Катарын найрсаг сайн харилцаанд тулгуурлан хоёр орны хамтын ажиллагааг боломжит бүхий л салбарт нэн ялангуяа иргэд хоорондын харилцаа, соёл, урлагийн хамтын ажиллагааг өргөжүүлэн хөгжүүлэхэд энэхүү арга хэмжээ чухал ач холбогдолтой болж байгааг онцлон тэмдэглэв.
Тоглолтыг КАТАРА соёлын сангийн удирдлага, Катарын Эмирийн ордон, Зөвлөлдөх зөвлөл /Парламент/, Гадаад хэргийн яамны төлөөлөл, Доха хотноо суугаа гадаад улс орнуудын Элчин сайдын яамд, олон улсын байгууллагын төлөөлөгчид болон катарын иргэд зэрэг 300 гаруй зочин үзэж сонирхсон бөгөөд арга хэмжээний төгсгөлд КАТАРА соёлын сангийн дарга Др.Халид Аль-Сулайти Монголын урлагийн багийг 2030 онд Катар Улсад болох Азийн наадмын нээлтэд тоглохыг албан ёсоор урилаа гэж Гадаад харилцааны яамнаас мэдээллээ.
Урлаг спорт
“Welcome to Mongolia” арга хэмжээ Эль-Кувейт хотноо боллоо
Монгол Улсын Засгийн газар 2023, 2024, 2025 оныг “Монголд зочлох” аялал жуулчлалын жил болгон зарласантай холбогдуулан Монгол Улсыг Кувейт Улсад сурталчлан таниулах зорилготойгоор Монголын өдрүүд арга хэмжээний соёлын арга хэмжээг Монгол Улсаас тус улсад суугаа Элчин сайдын яам санаачилж, 2023 оны 3 дугаар сарын 9-ний өдөр Гадаад харилцааны яам, Соёлын яам, Байгаль орчин, аялал жуулчлалын яам, Кувейтийн Соёл, урлаг, утга зохиолын Үндэсний зөвлөлтэй хамтран “Welcome to Mongolia” сэдвийн дор Эль-Кувейт хотноо зохион байгуулав.
Арга хэмжээнд Монголын Үндэсний урлагийн их театр, Монгол Улсын гавьяат жүжигчин, Соёлын элч Э.Анхбаяр, “Queen model agency”-гийн загвар өмсөгчид, уран зураач С.Чулуунбаатар, М.Уламбаяр нар оролцож, Монголын ардын болоод орчин үеийн урлаг мөн дэлхийн сонгодог урлагийн номерууд, Монголын байгаль, аж ахуйг харуулсан уран зургийн үзэсгэлэнг Абдулхуссейн АбдулРида театрт толилууллаа.
Тоглолтыг Кувейт Улсын Гадаад хэргийн яамны төлөөлөл, Соёл, урлаг, утга зохиолын Үндэсний зөвлөлийн Ерөнхий нарийн бичгийн дарга Др. Мухаммад Аль-Жасаар, Эль-Кувейт хотноо суугаа гадаад улс орнуудын Элчин сайдын яамд, олон улсын байгууллагын төлөөлөгчид болон кувейтийн иргэд зэрэг 500 гаруй зочин үзэж сонирхов.
“Монголын өдрүүд” нь Монгол орны ахуй, байгаль, ардын болоод орчин үеийн соёл урлаг, түүхийг кувейтийн ард түмэнд таниулах, соёлын хамтын ажиллагааны суурийг тавихад чухал ач холбогдолтой арга хэмжээ болж өндөрлөв гэж Гадаад харилцааны яамнаас мэдээллээ.
-
Улстөр нийгэм2021/09/29
Үндсэн хуулийн цэцийн их суудлын хуралдааны талаар мэдээлэл танилцуулав
-
Шударга мэдээ2020/05/15
УОК-ын дарга зүүн гурван аймгийн засаг дарга нарт үүрэг өгөв
-
Цаг үе2022/07/25
Гэр хорооллын дахин төлөвлөлтөөр 300 айлын орон сууц ашиглалтад орлоо
-
Цаг үе2020/07/07
Үс шинээр үргээлгэх буюу засуулахад тохиромжгүй
Сэтгэгдэл