2025 оны есдүгээр сарын 22-ноос 
2025 оны аравдугаар сарын 01-нийг хүртэлх
10 хоногийн цаг агаарын урьдчилсан төлөв

Есдүгээр сарын 22-нд нутгийн төв хэсгээр, 23-нд нутгийн зүүн хагаст бороо, уулаараа нойтон цас орж, сэрүүхэн байна. 24-нөөс баруун аймгуудын нутгаар цаашдаа ихэнх нутгаар өдөртөө дулаарна.

Хур тунадас: 22-нд баруун аймгуудын нутгийн зүүн хэсэг, төв болон говийн аймгуудын ихэнх нутаг, зүүн аймгуудын нутгийн баруун хэсгээр, 23-нд нутгийн зүүн хагаст, 24-нд баруун аймгуудын нутгийн баруун, зүүн аймгуудын нутгийн зүүн хэсгээр, 25-нд баруун аймгуудын нутгийн баруун өмнөд хэсэг, 26-нд говийн бүс нутгаар, 27-нд говийн аймгийн нутгийн зүүн өмнөд, зүүн аймгуудын нутгийн өмнөд хэсгээр, 28-нд Алтай, Хангай, Хөвсгөл, Хэнтийн уулархаг нутгаар бороо, уулаараа нойтон цас орно. 

Салхи: Ихэнх нутгаар секундэд 5-10 метр, 22-нд говь, тал, хээрийн нутгаар, 23-нд зүүн аймгуудын нутгаар түр зуур секундэд 18-20 метр хүрч ширүүснэ.

Агаарын температур: 22-нд нутгийн баруун хагаст, 23-нд нутгийн зүүн хагаст сэрүүхэн байх боловч бусад хугацаанд Алтай, Хангай, Хөвсгөл, Хэнтийн уулархаг нутаг, Завхан, Заг Байдрагийн голуудын эх, Идэр, Тэс, Тэрэлж голын саваар шөнөдөө 3- 8 хэм хүйтэн, өдөртөө 8-13 хэм, говийн бүс нутгийн өмнөд хэсгээр шөнөдөө 3-8 хэм, өдөртөө 20-25 хэм, бусад нутгаар шөнөдөө 1 хэмийн хүйтнээс 4 хэм, өдөртөө 13-18 хэм дулаан байна.

Улаанбаатар хот орчмын 10 хоногийн цаг агаарын урьдчилсан төлөв

Хур тунадас: 22-23-нд бороо орно. Бусад хугацаанд бороо орохгүй.

Салхи: Ихэнх хугацаанд секундэд 5-10 метр. 22-23-нд баруун өмнөөс хойш эргэж секундэд 8-13 метр хүрч ширүүснэ.

Агаарын температур: 22-23-нд сэрүүсэж шөнөдөө Яармаг-Сонгины орчмоор 0-5 хэм хүйтэн, бусад хэсгээр 1 хэмийн хүйтнээс 4 хэм дулаан, өдөртөө 6-11 хэм, бусад хугацаанд дулаарч шөнөдөө 1-6 хэм, өдөртөө 13-18 хэм дулаан байна.

Монгол Улсад автотээврийн салбар үүсэж хөгжсөний 100 жилийн ойн баярын хурал Дорноговь аймагт боллоо.

Тухайлбал, Дорноговь аймгийн нутаг дэвсгэрээр эртний өртөө, цайны зам, торгоны зам дайран өнгөрч байсан төдийгүй эрт үед авто өртөө байгуулагдаж, 1956 онд Улаанбаатар-Замын-Үүдийг холбосон төмөр зам ашиглалтад орсноор тээврийн салбар хөгжиж эдүүгээ хамгийн урт төмөр замтай, босоо тэнхлэгийн авто зам, агаарын зам дайран өнгөрдөг, зам тээврийн дэд бүтэц хөгжсөн аймаг болжээ.

Өнөөдөр Тавантолгой-Зүүнбаян, Зүүнбаян-Ханги чиглэлийн төмөр зам, Тавантолгой-Ханги чиглэлийн хүнд даацын хатуу хучилттай авто зам гээд олон бүтээн байгуулалт өрнөж тээврийн салбар улам өргөжин тэлэх боломж бүрдээд байна.

Авто тээврийн салбарыг орон нутагт хөгжүүлэх, эдийн засгийн өсөлтийг тэтгэх, зам тээврийн сүлжээг өргөжүүлэх, технологид суурилсан үр ашигтай тээврийн үйлчилгээг бий болгоход бодлогоор дэмжин ажиллах болно хэмээн Зам, тээврийн сайд Б.Дэлгэрсайхан энэ үеэр онцоллоо.

Орон нутагт нийтийн тээврийг бий болгон хөгжүүлэх ажлын эхлэлийг тавьж Замын-Үүд, Сайншанд суманд хүүхдийн автобусыг шугаманд явуулан тогтмолжуулснаас гадна нийтийн тээврийн үйлчилгээг өргөжүүлэх, хүртээмжийг нэмэгдүүлэх зорилгоор орон нутгийн өмчит аж ахуйн тооцоот үйлдвэрийн газрыг байгуулан ажиллаж байна.

Монгол Улсын импортын ачаа тээврийн 75 хувийг Замын-Үүд боомтоор, 10 хувийг Ханги боомтоор, экспортын барааны 21.7 хувийг Замын-Үүд боомт, 25 хувийг Ханги боомтоор нэвтрүүлж байна.

Мөн энэ үеэр “Altangobi-Cup” автокросс уралдааны нээлт, баярын парадыг зохион байгуулав гэж Зам, тээврийн яамнаас  мэдээллээ.

Гадаадын иргэн, харьяатын газрын дарга Н.Ууганбаярын урилгаар Унгар Улсын Гадаад иргэдийн бодлого зохицуулах ерөнхий газрын дарга, хошууч генерал Сандор Гомбос тэргүүтэй төлөөлөгчид энэ сарын 19-22-ны өдрүүдэд Монгол Улсад хүрэлцэн ирээд байна.

Айлчлалын хүрээнд Унгар Улсын Гадаад иргэдийн бодлого зохицуулах ерөнхий газрын дарга Сандор Гомбос тэргүүтэй төлөөлөгчид өнөөдөр (2025.09.22) Гадаадын иргэн, харьяатын газрын үйл ажиллагаатай танилцан, уулзалт хийлээ. Уулзалтаар хоёр орны ижил чиг үүргийн байгууллагуудын хамтын ажиллагааны хүрээнд хийгдэх арга хэмжээ, албан хаагчдыг урт болон богино хугацааны сургалтад хамруулах, харилцан туршлага солилцох чиглэлээр санал солилцов.

Энэ үеэр ГИХГ-ын дарга Н.Ууганбаяр хэлэхдээ, Гадаадын иргэн, харьяатын газар Европын орнуудаас Унгар Улсын Гадаад иргэдийн бодлого зохицуулах ерөнхий газартай үр өгөөжтэй, идэвхтэй хамтран ажиллаж байгааг онцлов. Хоёр байгууллагын энэхүү хамтын ажиллагааны хүрээнд 2023 оноос эхлэн байгууллагын 10 гаруй албан хаагч Унгар Улсад богино хугацааны сургалтад хамрагдаж, тус улсын цагаачлал, шилжилт хөдөлгөөний салбарт хэрэгжүүлж буй бодлого, туршлагаас суралцсан нь албан хаагчдын чадавхыг бэхжүүлэхэд үнэтэй хувь нэмэр оруулж буйг тодотгосон юм. Цаашид тус сургалтын хөтөлбөрийг илүү нарийвчилж, практик дээр танилцах сургалтаас гадна Европын Холбооны гишүүн орнуудын цагаачлалын болон визийн бодлогыг онолын болоод судалгааны түвшинд судлах, баримт бичгийн хуурмаглалыг таних, судлах хөтөлбөрийг тусгах саналаа тэмдэглэв. Мөн энэхүү үр өгөөжтэй хамтын ажиллагаанд тулгуурлан Европын Холбооны бусад гишүүн орнууд, ижил чиг үүргийн байгууллагуудтай хамтын ажиллагаа эхлүүлэх, түншлэл тогтоох хүсэлтээ илэрхийлсэн юм.

Түүнчлэн энэ үеэр Монгол Улсын виз, оршин суух зөвшөөрөл олголт, цахим үйлчилгээний нэгдсэн системийн үйл ажиллагааг танилцуулж, харилцан мэдээлэл солилцлоо. Монгол Улсын Засгийн газраас хэрэгжүүлж буй цахим шилжилтийг эрчимжүүлэх бодлого, шийдвэрийн хүрээнд Гадаадын иргэн, харьяатын газар үйл ажиллагаандаа инновац, дэвшилтэт технологийг нэвтрүүлэн 2024 оноос виз, зөвшөөрлийн үйлчилгээ бүрэн цахимжсан. Үүнийг дагаад сүүлийн хоёр жилийн хугацаанд цахимаар үйлчилгээ авсан иргэдийн тоо 14 дахин өссөн үзүүлэлттэй байна.

Унгар Улсын Гадаад иргэдийн бодлого зохицуулах ерөнхий газрын дарга Сандор Гомбосын хувьд хоёр байгууллагын хамтын ажиллагаа улам өргөжиж буйд баяртай байгаагаа илэрхийлж, цаашид хоёр талын хамтын ажиллагааг үр дүнтэй үргэлжлүүлэн хүний нөөцийн чадавхыг бэхжүүлэх, туршлага солилцох сургалтын хөтөлбөрийг нарийвчилж, гүнзгийрүүлэх чиглэлд анхаарч ажиллахаар болсныг онцлов гэж Гадаадын иргэн, харьяатын газраас мэдээллээ.