Цаг үе
Аргентины дэд ерөнхийлөгч авлигын хэрэгт буруутгагджээ
Аргентин Улсын шүүх тус улсыг донсолгосон авлигын хэргээр дэд ерөнхийлөгч Кристина Фернандес де Киршнерт зургаан жилийн хорих ял оноолоо.
Өдгөө 69 настай Фернандес нь олон нийтийн ажил гүйцэтгэх гэрээг найзтайгаа байгуулах замаар улсын мөнгийг хууль бусаар шамшигдуулж, "хууран мэхэлсэн" хэрэгт буруутгагджээ. Гэвч тэрээр шоронд суух магадлал багатай юм. Фернандес нь Засгийн газраас олгосон тодорхой хэмжээний эрх дархтай байдаг бөгөөд давж заалдах процессыг уртасгах төлөвтэй байна. Мөн түүний төрийн албанд ажиллах эрхийг бүх насаар нь хасах хэдий ч хэргийг дээд шатны шүүхээр хэлэлцэх хүртэл тэрээр дэд ерөнхийлөгчийн албан тушаалыг үргэлжлүүлэн хаших болно. Прокуророос түүнд 12 жилийн хорих ял төлөвлөж байсан.
Фернандес хэлэхдээ түүний буруутгагдаж байгаа уг хэрэг нь улс төрийн зорилготой гэж мэдэгджээ. Шүүхийн шийдвэр гарсны дараа тэрээр өөрийгөө "шүүхийн мафийн хохирогч" гэж тодорхойлсон хэмээн “Ассошиатэд пресс” агентлаг мэдээлэв. Шүүхийн шийдвэр гарахаас өмнө тэрээр прокуроруудыг худал хэлж, өөрийг нь гүтгэсэн гэж буруутгаж байсан юм.
Энэхүү хэрэг нь Бүгд Найрамдах Аргентин Улсын дэд ерөнхийлөгчийн албан тушаалыг хаших явцад гэмт хэрэгт холбогдсон анхны тохиолдол болж байна. Прокурорууд Фернандесийг 2007-2015 онд Аргентины ерөнхийлөгчөөр ажиллаж байхдаа хууль бус түншлэлийг удирдаж байсан гэж мэдэгджээ. Тэд түүнийг өөрийн танил тал, найзуудаа ашиглан олон нийтийн гэрээ байгуулж мөнгө угаах, улсын хөрөнгийг шамшигдуулах схемийг зохиож, удирдсан гэж мэдэгджээ.
Барилгын компанийн эзэн, бизнесмен Лазаро Баезыг дээрх схемийн гол ашиг хүртэгч гэж буруутгаж байсан бөгөөд түүнд зургаан жилийн хорих ял оноосон. Тэрээр өнгөрсөн онд мөнгө угаасан хэргээр 12 жилийн хорих ял сонсоод байсан юм. Тус хэрэгт өөр 11 хүн холбогдсоноос тэдний долоог нь гэм буруутайд тооцож тус тус 3-6 жилийн хорих ял оноож, гурван хүнийг нь суллаж, нэг хүний хэргийг хэрэгсэхгүй болгожээ.
Прокурорууд Фернандесийн нэр дэвшсэн газар болох Санта Круз мужид зарласан олон нийтийн ажлын тендерүүдэд зөрчил илрүүлсэн гэж мэдэгдэв. Тус мужид төлөвлөгдсөн барилгын төслүүд хэзээ ч бүрэн гүйцэт дуусаагүй юм. Прокурор Диего Лучиани дээрх хууль бус ажиллагааг "улс орны хүрээнд болсон хамгийн том авлигын үйл ажиллагаа байж магадгүй" гэж тодорхойлсон. Мөн тэрээр Фернандесийн зохиосон мөнгө угаах схем нь Аргентин Улсыг дор хаяж 1 тэрбум долларын (818 сая фунт стерлинг) алдагдалд оруулсан гэж мэдэгджээ.
Фернандес нь түүний эсрэг яригдаж буй бүх мэдээллийг эрс няцаасан. Энэхүү хэрэг нь Аргентин Улсын иргэдийн дунд ихээхэн тархсан бөгөөд Фернандесийг дэмжигчид болон үзэн ядагчид гэж хуваагдахад хүргээд байгаа юм. Фернандесийн дэмжигчид нь түүний Буэнос-Айрес дахь байрны гадаах гудамжинд гарч, дэмжиж байгаагаа илэрхийлж, шүүмжлэгчидтэй нүүр тулан тэмцсээр байна.
9-р сарын 1-нд болсон эдгээр цуглаануудын нэгийнх нь үеэр Фернандес нь халдлагад өртсөн. 35 настай нэгэн эрэгтэй дэд ерөнхийлөгчийн толгой руу буу чиглүүлсэн боловч түүнийг онилох үед зэвсэг нь гацсан байна. Уг этгээдийг хүн амины хэрэг үйлдэхийг завдсан гэж буруутган шалгаж байна.
Хатагтай Фернандес нь шүүхээс буруутай гэж тогтоогдон шоронд хоригдох ял авсан хэдий ч шууд шоронд хоригдохгүй. Сонгогдсон сенаторын хувьд тэрээр тодорхой хэмжээний халдашгүй эрх эдэлдэг бөгөөд энэ нь түүнд Дээд шүүхэд давж заалдах хүртэл эрх чөлөөтэй байж, албан тушаалаа үргэлжлүүлэх боломжийг олгоод байна. Давж заалдах үйл явц олон жил үргэлжилж магадгүй тул 2023 оны сонгуульд тэрээр дахин сенатор, тэр байтугай ерөнхийлөгчийн сонгуульд ч нэр дэвших боломжтой юм.
Эх сурвалж: https://www.bbc.com
Цаг үе
Өнөөдөр ихэнх нутгаар цаг агаар тогтуун байна
Малчид, иргэд, тээвэрчдэд зориулсан мэдээ: Өнөөдөр ихэнх нутгаар цаг агаар тогтуун байна.
2024 оны арваннэгдүгээр сарын 22-ны 08 цагаас 20 цаг хүртэл: Баруун аймгуудын нутгаар үүлшинэ. Монгол-Алтайн уулархаг нутгаар цас орж, цасан шуурга шуурна. Бусад нутгаар багавтар үүлтэй, цас орохгүй. Салхи ихэнх нутгаар баруун өмнөөс секундэд 5-10 метр. Монгол-Алтайн уулсаар секундэд 13-15 метр хүрч ширүүснэ. Монгол-Алтайн уулархаг нутаг, Завхан голын эх, Хүрэнбэлчир орчмоор 9-14 хэм, Хангай, Хөвсгөлийн уулархаг нутаг, Идэр, Тэс голын хөндийгөөр 3-8 хэм хүйтэн, говийн бүс нутаг, Дорнод-Дарьгангын тал нутгаар 4-9 хэм, бусад нутгаар 2 хэм хүйтнээс 3 хэм дулаан байна.
УЛААНБААТАР ХОТ ОРЧМООР: Үүлшинэ. Цас орохгүй. Салхи баруун өмнөөс секундэд 5-10 метр. 1-3 хэм дулаан байна.
БАГАНУУР ОРЧМООР: Үүлшинэ. Цас орохгүй. Салхи баруун өмнөөс секундэд 5-10 метр. 0-2 хэм дулаан байна.
ТЭРЭЛЖ ОРЧМООР: Үүлшинэ. Цас орохгүй. Салхи баруун өмнөөс секундэд 5-10 метр. 0 хэм орчим байна.
2024 оны арваннэгдүгээр сарын 23-наас 2024 оны арваннэгдүгээр сарын 27-ныг
хүртэлх цаг агаарын урьдчилсан төлөв
Арваннэгдүгээр сарын 23-нд нутгийн баруун хагаст, 24-нд баруун аймгуудын нутгийн зүүн, төв, говь, зүүн аймгуудын ихэнх нутгаар, 25-нд нутгийн зүүн хэсгээр, 26-нд төв, говь болон зүүн аймгуудын нутгийн зарим газраар цас орж, цасан шуурга шуурна. Салхи ихэнх хугацаанд секундэд 6-11 метр, 23-нд нутгийн баруун хагаст, 24-26-нд говь, тал, хээрийн нутгаар секундэд 15-17 метр хүрч ширүүснэ. 23-нд нутгийн баруун хэсгээр, цаашдаа ихэнх нутгаар хүйтэрч Завхан голын эх, Хүрэнбэлчир орчмоор шөнөдөө 30-35 хэм, өдөртөө 16-21 хэм, Дархадын хотгор, Алтай, Хангай, Хөвсгөл, Хэнтийн уулархаг нутаг, Идэр, Тэс, Хараа, Ерөө, Туул, Тэрэлж голын хөндийгөөр шөнөдөө 24-29 хэм, өдөртөө 12-17 хэм, говийн бүс нутгийн өмнөд хэсгээр шөнөдөө 12-17 хэм, өдөртөө 2-7 хэм, бусад нутгаар шөнөдөө 18-23 хэм, өдөртөө 8-13 хэм хүйтэн байна.
Цаг үе
Газрын тосны хайгуулын Хэрлэнтохой XXVIII талбайд бүтээгдэхүүн хуваах гэрээ байгуулав
Монгол Улсын Засгийн газрын 2024 оны 10 дугаар сарын 23-ны өдрийн 137 дугаар тогтоолоор Газрын тосны хайгуулын Хэрлэнтохой XXVIII талбайд “Монголиа Фойсон Энержи” ХХК-тай Бүтээгдэхүүн хуваах гэрээг холбогдох хууль тогтоомжийн дагуу байгуулах эрхийг Ашигт малтмал, газрын тосны газарт олгосон юм.
Энэ хүрээнд Ашигт малтмал, газрын тосны газрын дарга Л.Баярмандал “Монголиа Фойсон Энержи” компанийн гүйцэтгэх захирал Мен Зи Ли нар Бүтээгдэхүүн хуваах гэрээг өнөөдөр үзэглэлээ.
Ёслолын арга хэмжээнд Ашигт малтмал, газрын тосны газрын Газрын тосны бүтээгдэхүүний газрын дарга Б.Түвшинжаргал, Төрийн захиргааны удирдлагын газрын дарга Ш.Ганхуяг, Газрын тосны хайгуулын хэлтсийн дарга Э.Мөнх-Ирээдүй, Аж үйлдвэр, эрдэс баялгийн яамны Эрдэс баялгийн бодлогын газрын Газрын тосны бодлого хариуцсан ахлах шинжээч А.Пүрэв болон яам, агентлагийн холбогдох газрын удирдлагуудаас гадна “Фойсон Энержи Холдингс Лимитед” компанийн хөрөнгө оруулагч “Бээжин Фуайер хөрөнгө оруулалт” компанийн захирал Луй Күн нарын бусад зочид төлөөлөгчид оролцов.
Монгол Улс газрын тосны бүтээгдэхүүний хэрэгцээгээ дотоодын эх үүсвэрээр хангахыг зорин, Дорноговь аймгийн Алтанширээ сумын нутагт Газрын тос боловсруулах үйлдвэрийг барьж, 2027 онд ашиглалтад оруулахаар ажиллаж байна. Иймд тус үйлдвэрийг түүхий тосоор хангах, нөөцийг нэмэгдүүлэхэд “Монголиа Фойсон Энержи” ХХК-ийн Хэрлэнтохой XXVIII талбайн хайгуулын ажил маш чухал үүрэгтэй гэдгийг Ашигт малтмал, газрын тосны газрын дарга Л.Баярмандал нээлтэд хэлсэн үгэндээ онцоллоо.
Мөн тэрбээр “Монгол Улсын урт, дунд хугацааны хөгжлийн бодлогод газрын тосны хайгуулын ажлыг эрчимжүүлж, нөөцийг өсгөх, олборлолтыг нэмэгдүүлэх зорилтыг тусгаж, эдийн засгийн үр өгөөж өндөртэй төслүүдэд хөрөнгө оруулагчдыг урьж, эрх зүйн таатай, тогтвортой орчин бүрдүүлэхэд онцгой анхаарч, олон шинэчлэл хийсэн энэ цаг үед та бид энэхүү гэрээг үзэглэж байна. Тиймээс газрын тосны салбарын төр засгийн бодлого, хууль тогтоомжтой уялдаж, хариуцлагатай уул уурхайн зарчмыг хэрэгжүүлж, орон нутагтайгаа харилцан ойлголцож, сум, орон нутгийн хөгжилд хувь нэмрээ оруулах, байгаль орчин, нийгмийн нөлөөллийг харгалзах, үйл ажиллагаагаа сурталчлан таниулах зэргээр гэрээгээр хүлээсэн үүргээ сайтар биелүүлж ажиллах”-ыг “Монголиа Фойсон Энержи” компанийн удирдлагуудад сануулж, эрэл хайгуулын ажилд нь амжилт хүссэн юм.
“Монголиа Фойсон Энержи” компанийн гүйцэтгэх захирал Мен Зи Ли хэлсэн үгэндээ “Монгол Улсын холбогдох бүх л хууль тогтоомжийг чанд мөрдөж, гэрээгээр хүлээсэн үүргээ биелүүлж ажиллана” гэдгээ илэрхийлэв.
Газрын тосны хайгуулын Хэрлэнтохой XXVIII талбайд “Монголиа Фойсон Энержи” ХХК-тай байгуулсан энэхүү гэрээ нь Монгол Улсын Засгийн газар газрын тосны хайгуулын шинэ талбайд 8 жилийн дараа хийж буй Бүтээгдэхүүн хуваах гэрээ юм.
“Монголиа Фойсон Энержи” ХХК нь хайгуулын 8 жилийн хугацаанд нийт 49,7 сая ам.долларын хөрөнгийг хайгуулын талбайн геологийн мэдээлэл цуглуулах, тайлал хийх, соронзон болон хүндийн хүчний судалгаа 20,000км2, 2 хэмжээст чичирхийллийн судалгаа 2000 тууш/км, 3 хэмжээст чичирхийллийн судалгаа 400 км2 талбайд тус тус хийж, хайгуулын 13 цооног өрөмдөх, дээжлэлт, цооногийн иж бүрэн судалгаа, туршилт, шингэн хагалбар, хайгуул, судалгаа, нөөцийн тайлан боловсруулах зэрэг ажлуудад зарцуулахаар төлөвлөсөн бөгөөд байгаль орчныг хамгаалах, нөхөн сэргээх ажилд 575,000 ам.долларыг зарцуулахаар төлөвлөсөн байна.
“Монголиа Фойсон Энержи” ХХК-ийн хөрөнгө оруулагч “Бээжин Фуайер хөрөнгө оруулалт” ХХК нь 2007 оноос хойш газрын тос, уламжлалт бус газрын тосны хайгуул, ашиглалтын чиглэлээр үйл ажиллагаа явуулж ирсэн олон улсын туршлагатай компани бөгөөд тус талбайд өрөмдлөг, шингэн хагалбар болон каротажийн ажлуудыг гүйцэтгэнэ гэж Ашигт малтмал, газрын тосны газраас мэдээллээ.
Цаг үе
Хог шатсан дуудлага нэмэгдэх хандлагатай байна
Он гарснаас хойш нийслэлийн хэмжээнд гал түймрийн 1700 гаруй дуудлага бүртгэгдэж, үүнээс 17 хувийг хогийн цэг, хогийн суваг шатсан дуудлага мэдээлэл эзэлж байна.
Сүүлийн өдрүүдэд энэ төрлийн дуудлага нэмэгдэх хандлагатай байна.
Иймд хогийн суваг, хогийн цэгт ил гал гаргахгүй, тамхины ишийг бүрэн унтрааж, аюулгүй байдлаа хангахыг Нийслэлийн Онцгой байдлын газраас онцгойлон анхааруулж байна.
