Сонгууль хаянд тулж, улс төрийн намууд тун ч идэвхтэй байна. Ялангуяа Үндсэн хуулийн нэмэлт өөрчлөлт, Улс төрийн намуудын тухай хууль, Сонгуулийн хууль гэсэн гурван том хууль УИХ-ын босго даван орж ирсэн нь унтаа байдалд байсан намуудыг нойрноосоо сэрэх “сэрүүлэг” болон тачигналаа.

Хэдийгээр өөрсдийгөө Монголын улс төрийн хоёр дахь том хүчин гэж зарладаг ч сүүлийн хэдэн жил тамга тэмдэгний хэрүүлтэйгээ зууралдаж, нэг нэгнээ өдөр өнжихгүй шахам шүүхэд дуудан эв эвдэрч, тангараг тасрах дээрээ тулаад байсан АН-ынхан арай гэж нэг даргатай болж өнөөх дарга нь тамга тэмдэг, гэрчилгээгээ олж авав. Гэхдээ байдал бас л хүнд байгаа сурагтай. 

АН-ын дарга Лу.Гантөмөр сүүлийн үед ёстой орондоо ч орох завгүй уулзалттай байгаа юм байна. “АН ялагдсан, ад үзэгдсэн, амьдрал дордсон” хэмээн гомдол мэдүүлсэн гишүүдээс эхлээд “Энэ намыг тэжээж тэтгээд хохирсон” гэсэн бухимдагсад, “Алаад хядаад, авраад өгье” гэсэн сэлэм эргүүлэгсэд, “Би л нэр дэвшиж намаа авч гарна” хэмээн цээжээ дэлдэгсэд, ая тал засагчид түүнийг тойрон эргэлдэж сүүлийн хэдэн жил нам гүм байсан АН-ын байранд хөл багтахгүй шахам хүн цуглардаг болжээ. Үүнтэй зэрэгцэн  Ардчилсан эмэгтэйчүүдийн холбоо нэрийн дор нэгддэг тус намын бүсгүйчүүд ч бас бужигнаж эхэлсэн байна. Ирэх сонгуулиар эмэгтэйчүүдэд илүү боломж олгоно,19 эмэгтэйг нэрсийн жагсаалтаар  нэр дэвшүүлнэ гэсэн Засгийн газраас өргөн барьсан  хуулийн төсөл  тус намын хүүхнүүдийн дунд бүр ч том тэмцэл өрнүүлээд байна.

Өнөөдрийн байдлаар Ардчилсан эмэгтэйчүүдийн холбоо нь бас хоёр даргатай. С.Эрдэнэ намын тамгаа өвөртөлж, намаа хоёр, гурав хувааж байхдаа Ардчилсан Эмэгтэйчүүдийн Холбооны VI дээд чуулган зарлаад Б.Нэргүй гэгч хэнийг ч танихгүй нэг нөхрийг ерөнхийлөгч болгож орхисон. Гэтэл 2018 онд Ардчилсан эмэгтэйчүүдийн холбоо”-ны тэргүүнээр С.Одонтуяа сонгогдсон.

За ингээд АН дотор нэг нэртэй хоёр эмэгтэйчүүдийн холбооны Ерөнхийлөгч бий болчихоод бужигнаж байна. Уг нь Ардчилсан эмэгтэйчүүдийн холбоо Их хурлаа хийх ёстой байдаг. Гэтэл хоёр Ерөнхийлөгчийн хэн нь Их хурал зарлахыг мэдэхээ больж төөрөлдөж эхэлжээ. С.Одонтуяа уг нь холбоогоо өөр хүнд өгнө гэж ярьж байсан ч гэнэт амнаасаа буцаж, “Манай намд нэр дэвших ийм олон эмэгтэй байгаа юм уу” гээд хэлчихсэн нь бөөн хэрүүл тарьж орхих нь тэр. Үнэндээ АН-д С.Одонтуяа, З.Нарантуяа, А.Адьяасүрэн, хүний эрхийн хуульч Р.Булгамаа  гэсэн хэдхэн эмэгтэй л бий. С.Одонтуяа үүнийг ч сайн мэдэж байгаа. Харамсалтай нь эмэгтэйчүүд түүнийг сөрж босон Ардчилсан эмэгтэйчүүдийн холбооны суудлаас түүнийг унагаж, оронд нь дарга болж  жагсаалтаар нэр дэвших аян дайндаа гарчээ.

“С.Одонтуяа юу ч хийгээгүй. Хүүхэд нь койны хэрэгт холбогдсон. Эмэгтэйчүүдийг ялгаварлан гадуурахдаг. Бүхий л эрх мэдлийг гартаа оруулсан” хэмээн бөөн хов жив болж, дарга зарим нь уйлж яваа сурагтай. Ардчилсан эмэгтэйчүүдийн холбооны даргын төлөөх өрсөлдөөнд Бумбаяр зааны эхнэр Ц.Одонтунгалаг, 85 тэрбумын хөрөнгөтэй гэгдэх М-Ойл"-ын захирал Пунсалмаа нар оролцохоор бэлдэж эхэлжээ. Гэвч Ц.Одонтунгалаг ашиг сонирхолын зөрчил ихтэй, “Зорчигч тээврийн нэгтгэл” ОНӨААТҮГ-ын даргаар ажиллаж байх хугацаанд Д.Бумбаяр “Шадар дайван” ХХК-иараа “Зорчигч тээвэр-3” ОНӨААТҮГ-т автобусны дугуй нийлүүлж байжээ.

Жишээ нь, 2020 оны хоёрдугаар сард л гэхэд 6.4 сая төгрөгийн дугуй нийлүүлсэн нь шилэн дансанд бүртгэгджээ. Түүнчлэн, Д.Бумбаяр “Шадар дайван” ХХК-иараа Нийслэлийн ЕБС-иудад Үдийн цай нийлүүлдэг гэх мэт байнга хэл аманд орооцолддог. Харин “тасарсан” баян гэж нэрлэгддэг Пунсалмаа амьдралаас тасархай, мөнгөөр бүхнийг шийдэх гэж үздэг,мэдлэг боловсрол нимгэн хэмээн бусад нь чамлаж эхэлжээ. Ийнхүү АН-ын хүүхнүүдийн амь өрссөн, ам уралдуулсан тулаан эхлээд байна.