Цаг үе
Эрчим хүчний салбарын ерөнхий инженерүүдийн шуурхай хуралдаан боллоо
Эрчим хүчний дэд сайд М.Баярмагнайгаар ахлуулсан Эрчим хүчний салбарын үйлдвэр компаниудын ерөнхий инженерүүдийн шуурхай хуралдаан боллоо. Хуралдаанд 43 байгууллага цахимаар оролцож 2020-2021 оны өвөлжилтийн бэлтгэл ажлын явц, тулгамдаж буй асуудал, цаашид авах арга хэмжээний талаар хэлэлцэж, холбогдох үүрэг даалгавруудыг өгөв.
2020-2021 оны өвөлжилтийн бэлтгэл хангахад үндсэн болон туслах тоноглолын их засвар 1156, хөрөнгө оруулалтын 603, техник зохион байгуулалтын арга хэмжээ /ТЗБАХ/-ий ажил 508, нийт 2267 нэр төрлийн ажил хийхээр төлөвлөн ажиллаж байна.
Эрчим хүчний салбарын үйлдвэр компаниудын өвөлжилтийн бэлтгэл ажил 2020 оны наймдугаар сарын 25-ны өдрийн байдлаар дунджаар 67.5 хувь, санхүүжилт 44.2 хувийн гүйцэтгэлтэй байна.
Эрчим хүчний дэд сайд М.Баярмагнай ерөнхий инженерүүдэд дараах үүрэг даалгаврыг өглөө. Үүнд:
1. Эрчим хүчний салбарын үйлдвэр компаниудын 2020-2021 оны өвлийн бэлтгэл хангах их засвар, хөрөнгө оруулалт, ТЗБАХ-ний ажлуудыг эрчимжүүлэх, төлөвлөсөн хугацаанд өвлийн ачаалал эхлэхээс өмнө дуусгах, ажлын гүйцэтгэлийн чанарт анхаарах, гүйцэтгэлийн тайланг хоёр долоо хоног тутамд Эрчим хүчний яаманд ирүүлэх;
2. 2020-2021 оны өвлийн их ачааллын горимын саналаа “ДҮТ” ХХК-тай зөвшилцөх, “ДҮТ” ХХК ирүүлсэн саналыг хянаж, өвлийн их ачааллын горимыг эх үүсвэрүүдэд хийгдэж буй төсөл хөтөлбөрийн ажлын явцтай уялдуулан, зөв оновчтой төлөвлөх;
3. Улсын төсвийн хөрөнгө оруулалт, гадаад болон дотоодын зээлээр хэрэгжиж буй төсөл хөтөлбөрийн ажлуудыг яаралтай дуусгах, өвлийн ачаалал эхлэхээс өмнө залгах, ашиглалтад оруулах;
4. Эрчим хүчний нүүрс олборлогч уурхайнууд авахад бэлэн нүүрсний нөөцийг төлөвлөгдсөн хэмжээнд барьж ажиллах;
5. Дулааны цахилгаан станц, дулааны станцууд өвлийн их ачааллын үеийн нүүрсний аюулгүйн нөөцийг батлагдсан төлөвлөгөөний дагуу бүрдүүлэх;
6. Цахилгаан эрчим хүч түгээх тусгай зөвшөөрөл эзэмшигч компаниуд өөрийн эзэмшлийн шугам, дэд станцуудад үзлэг үйлчилгээг хийх, ашиглалт, аюулгүй ажиллагааны талаар мэдэгдэл хүргүүлэх, шаардлагын дагуу арга хэмжээг тогтоосон хугацаанд аваагүй бол цахилгаан хангамжийг түтгэлзүүлэх;
7. Эрчим хүчний сайдын 2019 оны 06 дугаар сарын 10-ны өдрийн 158 дугаар тушаалаар баталсан “Байгалийн гамшиг, гэнэтийн болон давагдашгүй хүчин зүйлийн шинжтэй нөхцөл байдал үүсэх тохиолдолд түлш, эрчим хүчний хангамжийн талаар мөрдөх журам”-д заасны дагуу гамшиг, осол, аваар, саатлыг мэдээллэж ажиллахыг тус тус үүрэгдлээ.
2020-2021 оны өвлийн их ачааллын горим ажиллагааг хүндрэлгүй даван туулахын тулд “ДЦС-4” ТӨХК-ийн турбогенератор 2, 3-ийг шинэчилж 46 МВт-аар хүчин чадлыг нэмэгдүүлэх, “Эрдэнэт ДЦС” ТӨХК-ийн 35 МВт-ын өргөтгөлийн ажлууд болон бусад үйлдвэрүүд, дамжуулах түгээх сүлжээний засвар шинэчлэлтийн ажлуудыг төлөвлөсөн хугацаанд нь ашиглалтад оруулахаар ажиллаж байна.
Эх сурвалж: ЭХЯ
Цаг үе
Нью-Йорк дахь холбооны барилгын гадна гал тавьж, гал нээсэн этгээдийг баривчилжээ
АНУ-ын Нью-Йорк хотын Манхэттен дүүрэгт байрлах холбооны захиргааны барилгын гадна гал тавьж, агаарын буугаар гал нээсэн хэрэг гарсны дараа сэжигтнийг газар дээр нь баривчилжээ.
Холбооны мөрдөх товчоо (FBI)-ны мэдээлснээр, 43 настай, АНУ-ын армийн ахмад дайчин Эндрю Аррабака гэгч этгээд 26 Federal Plaza барилгын гадна шатанд шатамхай бодис асгаж гал тавин, салют буудуулсны зэрэгцээ агаарын буугаар хэд хэдэн удаа буудсан байна. Уг барилгад АНУ-ын Цагаачлал, гаалийн алба (ICE), Холбооны мөрдөх товчоо (FBI) болон бусад холбооны байгууллагууд байрладаг юм.
Хэргийн улмаас гурван хүн хөнгөн гэмтэл авсны дотор холбооны хоёр ажилтан болон цагаачлалын шүүхийн сонсголд оролцохоор ирсэн нэг иргэн байсан гэж албаныхан мэдээлжээ. Холбооны хамгаалалтын албаныхан болон хамгаалалтын гэрээт ажилтан сэжигтнийг богино хугацаанд саатуулсан байна.
FBI-гийн мэдээлснээр, сэжигтэн баривчлагдах үедээ төрийн байгууллагын эсрэг байр суурь илэрхийлсэн бөгөөд түүний эзэмшилд сүх, хутга, алх, мачете зэрэг бусад зэвсэг байсан аж. Одоогоор мөрдөн шалгах ажиллагаа үргэлжилж байгаа бөгөөд хэргийг терроризм гэж ангилах эсэх талаар эцсийн шийдвэр гараагүй байна.
Цаг үе
Монгол Улсын гадаад худалдааны бараа эргэлт 16.5 тэрбум ам.долларт хүрчээ
Монгол Улс 2026 оны эхний хагас жилийн байдлаар дэлхийн 150 улстай худалдаа хийж, гадаад худалдааны нийт бараа эргэлт 16.5 тэрбум ам.долларт хүрсэн байна.
Үндэсний статистикийн хорооны урьдчилсан гүйцэтгэлээр, экспорт импортын хэмжээнээс 4.3 тэрбум ам.доллароор давж, гадаад худалдааны тэнцэл ашигтай гарчээ. Экспортын хэмжээ өмнөх оны мөн үеэс 57.9 хувиар өссөн дүн гарчээ.
Мөн мөнгөний нийлүүлэлт 2026 оны эхний зургаан сарын байдлаар 53.4 их наяд төгрөгт хүрч, өмнөх оны мөн үеэс 11.2 их наяд төгрөгөөр, буюу 26.6 хувиар өссөн үзүүлэлттэй гарсан байна.
Эдгээр үзүүлэлт нь 2026 оны эхний хагас жилийн урьдчилсан гүйцэтгэлд үндэслэсэн бөгөөд Үндэсний статистикийн хорооноос танилцуулжээ.
Цаг үе
Б.Пүрэвдагва: "Урт цагаан"-ыг залуучууд чөлөөт цагаа өнгөрүүлдэг, жуулчид зорьж ирдэг цэг болгоно
Нийслэлийн Чингэлтэй дүүргийн 3 дугаар хороонд “Урт цагаан” худалдаа, үйлчилгээний төвийн ашиглалтын шаардлага хангахгүй болсон барилгыг нурааж, далд зогсоол бүхий цэцэрлэгт хүрээлэн, үйлчилгээний төвийн цогцолбор барьсан. Тэгвэл тус хэсэгт жуулчдын урсгалыг нэмэгдүүлэх, залуучууд амралт чөлөөт цагаа өнгөрүүлэх боломжийг бүрдүүлэх зорилгоор үндэсний онцлог бүхий бүтээгдэхүүн, үйлчилгээ эрхлэгчдийг дэмжинэ гэдгээ Нийслэлийн Засаг дарга бөгөөд Улаанбаатар хотын Захирагч Б.Пүрэвдагва зарлалаа.
Тэрбээр “Жуулчид Монголыг зорьж ирээд үндэсний хоол болон “Street food” хайх, олохгүй байх зэрэг асуудал гардаг. Тиймээс “Урт цагаан” орчимд энэ төрлийн үйлчилгээ үзүүлдэг болох, мөн Монголын урчуудын гар урлалын бүтээгдэхүүнүүдийг худалдаалах үйлчилгээний хэсгүүдийг нэмэгдүүлнэ. Ингэснээр жуулчдын урсгал төвлөрөхөөс гадна залуучууд чөлөөт цагаараа соёлтой үйлчилгээг авах боломжтой болно” гэв.
Төрийн үйлчилгээний чанар хариуцсан зохицуулагч Б.Сэмжидмаа “Бид цаашид жуулчны гудамжийг улам хөгжүүлж, Улаанбаатар хотын жуулчдыг энэ гудамж руугаа татан, хотын төв рүү хүмүүсийн урсгал бий болгох зорилготой. Тиймээс үйлдвэрлэл, үйлчилгээ эрхэлж байгаа аж ахуй нэгж, иргэдийг бүтээгдэхүүн үйлчилгээний саналаа ирүүлэхийг урьж байна” гэлээ.
