Урлаг спорт
Урлагийн гавьяат зүтгэлтэн Ц.Чулуунбат “Chuka & Friends: Хайр” тоглолтоо хийнэ
Төрийн Соёрхолт, Хөгжмийн зохиолч, Урлагийн гавьяат зүтгэлтэн Ц.Чулуунбат Олон улсын эмэгтэйчүүдийн эрхийг хамгаалах өдөрт зориулж “Chuka&Friends: Хайр” тоглолтоо гуравдугаар сарын 7-нд “UB palace”-ын концертын их танхимд хийх гэж байна.
Ц.Чулуунбат 1994 онд “Үгүйлэн санана”, 2008 онд “Миний гудамж”, 2013 онд “Содон аялгуу”, 2016 онд “Амьдралын бэлэг”, 2017 онд “Chuka 45” тоглолтуудаа хийж байсан бол энэ удаад зургаа дахь тоглолтоо ийнхүү толилуулахад бэлэн болоод байна.
Түүний тоглолтууд эх орон, хайр, найз нөхөд, бодрол төрүүлсэн халуун дулаан уур амьсгалтай болдог билээ.
Тоглолтонд Төрийн Соёрхолт “Харанга” хамтлаг, “Freezone” хамтлаг, дуучин Б.Наранбаатар /Наагий/, Б.Баярцэцэг, А.Хишигдалай нар оролцож ая дуугаа өргөх юм. Тасалбарыг 35.000₮, 60.000₮-өөр TICKET.mn сайтаас захиалах боломжтой.
Ташрамд дурдахад, түүний хөгжмийн урлагт 50 жил зүтгэсэн ой энэ жил тохиож байгаа юм.
Урлаг спорт
“Хангарди”спортын тэмцээн үргэлжилж байна
Урлаг спорт
ДБЭТ-ын гоцлол дууны анги үүсэн байгуулагдсаны 70-н жилийн ойн хэвлэлийн бага хурал өвөрмөц зохион байгуулагдана
Нэгэн жарныг үдэж, зуунаас зуунд өртөөлсөн театрын алтан хоолойтнууд 70-н жилийн бахархалт ойн баяраа хүндэтгэлтэйгээр ёслол төгөлдөр тэмдэглэх гэж байна.
ГОЦЛОЛ ДУУНЫ АНГИЙН 70-н жилийн ойн арга хэмжээний мэдээлэл өгөх хэвлэлийн бага хурлаа БИД сонирхолтой хэлбэрээр хийх гэж байна. Бид ширээний ард бус тайзан дээр дуулж, баярлаж, дурсамжтайгаар баярын хэвлэлийн бага хурлаа хийх болно. ДБЭТ-ын гоцлол дууны ангийн бүх алтан хоолойтнууд өөрсдийн эрхэмлэж хүндэлдэг багш нар болон, ахмад уран бүтээлчдийн төлөөлөл оролцох болно. Уран бүтээлч болгон энэ өдрийн бахархалт эрхмүүд байна. ХМБ-ын төлөөлөл болсон сэтгүүлчид та бүхэн хүссэн уран бүтээлчээ сонгоод нүүр тулж хүссэн асуултаа асууж, хамтдаа зургаа авхуулж, халуун кофе уунгаа ярилцах боломжтойгоор зохион байгуулах гэж байна.
Эрхэм хэвлэл мэдээллийн байгууллагын сэтгүүлчид та бүхнийг урьж байна.
Таныг хүндэтгэн урьсан ДБЭТ-ын гоцлол дуучид
ХЭЗЭЭ: 2022.11.29
ХЭДЭЭС: 11:30-12:30
Холбогдох утас: 8080-1656
Зохион байгуулагч: ДБЭТ, Apple production
Урлаг спорт
Шатар сонирхогчдын Улсын аварга шалгаруулах тэмцээний талаар мэдээлэл хийлээ
Монгол Улсын ардчилсан шинэ Үндсэн хууль батлагдсан түүхэн өдрийг тохиолдуулан УИХ-аас оюуны спортыг дэмжих зорилгоор Улсын Их Хурлын даргын ивээл дор жил бүр Шатар сонирхогчдын Улсын аварга шалгаруулах тэмцээнийг уламжлал болгон зохион байгуулдаг билээ.
Шатар сонирхогчдын Улсын аварга шалгаруулах 2023 оны 11 дэх удаагийн тэмцээний талаар УИХ-ын Тамгын газар, Монголын шатрын холбооноос 2022 оны 11 дүгээр сарын 16-ны өдөр хэвлэлийн бага хурал хийж, УИХ дахь Шатар сонирхогчдыг дэмжих лобби бүлгийн зохицуулагч Б.Наранбаатар, УИХ-ын Тамгын газрын Парламентын судалгаа, сургалтын хүрээлэнгийн зөвлөх, тэмцээний ерөнхий шүүгч Г.Алтан-Оч нар мэдээлэл өглөө.
Шатар бол хүнийг сэтгэн бодуулж сургадаг, логик сэтгэлгээг хөгжүүлдэг, тэвчээртэй болгодог, аливаа асуудлыг хүчээр бус арга ухаанаар даван туулах хүмүүжил олгодог онцгой спорт. Шатар сонирхогчдын Улсын аварга шалгаруулах тэмцээн 3 үе шаттай болдог бөгөөд зэрэг цолгүй, Монголын шатрын холбооны рейтингийн жагсаалтаар чансаа нь 2000-аас хэтрээгүй /эмэгтэй шатарчдын чансаа 1800 хүртэл/, зөвхөн насанд хүрсэн шатарчид оролцдог онцлогтой. Өнгөрсөн жилийн тэмцээнд 6030 шатарчин оролцсон байна.
Анхан шатны тэмцээн 2022 оны 11 дүгээр сарын 26-27-ны өдрүүдэд болж, Сум, дүүргийн аваргуудыг шалгаруулна.
Хагас шигшээ тэмцээн 2022 оны 12 дугаар сарын 17-18-ны өдрүүдэд болж, Аймаг, нийслэлийн аваргуудыг шалгаруулна.
Шигшээ тэмцээн 2023 оны 01 дүгээр сарын 07-08-ны өдрүүдэд Төрийн ордонд болж, Шатар сонирхогчдын Улсын аваргыг тодруулах юм.
Тэмцээний эрэгтэй, эмэгтэй ангилалд эхний 3 байр эзэлсэн шатарчид Шатрын спортын дэд мастер цол олгодог. Харин тэргүүн байр эзэлсэн шатарчид Ази тивийн шатрын аварга шалгаруулах тэмцээнд Монгол Улсаа төлөөлөн оролцох эрх авдаг юм хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээллээ.
Сэтгэгдэл