Цаг үе
“Сэлэнгэ-2025” хээрийн сургууль амжилттай явагдаж өндөрлөлөө
Монгол Улс, ОХУ-ын Зэвсэгт хүчний хамтарсан “Сэлэнгэ-2025” хээрийн сургууль ОХУ-ын Буриадын Бурдун сургалтын төвд 14 хоногийн хугацаанд амжилттай зохион байгуулагдаж өндөрлөлөө.
Сургуулийн байлдааны буудлага, хаалтын ажиллагаа 08 дугаар сарын 28-ны өдөр зохион байгуулагдаж, Монгол Улсын талаас БХЯ-ны СБТГ-ын дарга бригадын генерал Ч.Гандирваа, ЗХЖШ-ын Ажиллагааны удирдлагын газрын дарга бригадын генерал Д.Дугаррагчаа, сургуулийн удирдагч Монгол Улсын Зэвсэгт хүчний Хуурай замын цэргийн штабын дарга бригадын генерал Ц.Буяндэлгэр, ОХУ-ын талаас ОХУ-ын баатар, хошууч генерал В.А.Белявский, ОХУ-ын Дорнод цэргийн тойргийн 36 дугаар армийн командлагчийн олон улсын асуудал эрхэлсэн туслах хурандаа И.С.Тараев, Буриадын удирдлага, иргэд олон нийтийн төлөөлөл болон хоёр орны цэргийн алба хаагчид оролцов.
Сургуулийн нэгдсэн байлдааны буудлагыг өмнөх жилүүдээс шинэлэг арга хэлбэрээр зохион байгуулсан бөгөөд Хуурай замын цэргийн бүрэлдэхүүнээс гадна цэргийн нисгэгчид агаарт байлдааны ажиллагаа явуулж, шүхэрчин дайчид тусгай үүргийг гүйцэтгэснээрээ онцлог болж чадсан юм. Энэ жилийн сургуулийг сургалтад түшиглэсэн байдлаар буюу орчин үеийн дайн байлдааны туршлага сургамжид үндэслэн жижиг бүлгийн тактикийн 14 хичээлийн цэгт сургалт бэлтгэлд хамруулж, хамтарсан дадлагыг 3 удаа явуулж, төгсгөлд нь байлдааны нэгдсэн буудлагыг амжилттай зохион байгуулж, хоёр орны цэргийн багийн зэвсэглэл, техникийн ёслолын жагсаал боллоо.
Сургуулийн хаалтын ажиллагааны үеэр БХЯ-ны СБТГ-ын дарга бригадын генерал Ч.Гандирваа хэлсэн үгэндээ жилээс жилд хамтарсан сургуулийн бодлого, төлөвлөлт илүү өргөн цар хүрээтэй болж, хамрах хүрээ, оролцох бүрэлдэхүүний тоо улам бүр өсөн нэмэгдэж нэр хүнд, ач холбогдол, зохион байгуулалтын хувьд ахиц дэвшил гарч буйг онцлон тэмдэглэж, энэхүү сургуулийг амжилттай зохион байгуулахын төлөө бүх талын хангалтыг зохион байгуулсан ОХУ-ын Дорнод цэргийн тойрог, 36 дугаар армийн удирдлага, бие бүрэлдэхүүнд талархал илэрхийллээ. Мөн тэрээр хоёр орны дайчин нөхөрлөлийн алтан гагнаас болсон энэхүү сургуулийг амжилттай зохион байгуулж, сургуулийн удирдагчаар ажилласан бригадын генерал Ц.Буяндэлгэр, хошууч генерал В.А.Белявский нарт тусгайлан баяр хүргэлээ.
Сургуулийн удирдагч бригадын генерал Ц.Буяндэлгэр “Зэвсэгт хүчний анги, салбаруудын харилцан ажиллагааг хангаж, төрлийн цэргүүд, түүний дотор цэргийн нисэх хүчин, тусгай хүчний цэргийн үүрэг гүйцэтгэх чадварыг нэмэгдүүлснээрээ өндөр үр дүнтэй сургууль болсныг тэмдэглэж, хээрийн сургуулийн байрлалын районыг байнгийн байрлал мэт ая тухтай төхөөрөмжилж, биднийг санаа зовох зүйлгүй сургалт бэлтгэлдээ л төвлөрөх боломжийг бүрдүүлж ажилласан элгэмсэг дотно дайчин нөхдөдөө баярлалаа гэв. Сургуулийн явцад сэтгэл зүй, соёл хүмүүжлийн олон талт арга хэмжээг бид хамтдаа зохион байгуулж, өнө мөнхийн хөрш орны цэрэг эрсийн нөхөрлөлийг уралдаан тэмцээн, соёл уламжлалаар дамжуулан улам бэхжүүлсэн нь энэ сургуулийн онцлох үйл явдлын нэг гэдгийг ч мөн тэрээр хэлсэн үгэндээ дурдав.
Үүний дараа хоёр орны хээрийн сургуулийн батальон захирагч нар болох хошууч С.Даваагомбо, дэд хурандаа Р.Тукаев “Сэлэнгэ”-ийн тугийг буулгаж, Монгол Улсын талд хүлээлгэн өгөв. Энэ нь 2026 онд тус сургуулийг Монгол Улсад зохион байгуулах буухиаг илэрхийлж буй ажээ.
Төгсгөлд нь туршлага хуримтлуулж, чадвар тэлсэн “Сэлэнгэ-2025” хээрийн сургуульд амжилттай оролцсон Монгол, Орос дайчид “Сэлэнгэ” болон “Олон улсын цэргийн нөхөрлөл” медалиар шагнагдаж, ёслолын жагсаалаар алхлаа гэж Зэвсэгт хүчний Жанжин штабаас мэдээллээ.
Цаг үе
Индонезид авлигын хэрэгтэй холбоотойгоор өндөр албан тушаалтнуудыг баривчилжээ
Индонезид авлигын эсрэг ажиллагаа эрчимжиж, Засгийн газрын өндөр албан тушаалтнуудыг баривчилжээ. “Аль Жазира”-гийн мэдээлснээр, тус улсын Цагаачлалын асуудал эрхэлсэн дэд сайд Силми Каримыг цагаачлалын бичиг баримтын бүрдүүлэлт, удирдлагатай холбоотой зөрчил гаргасан байж болзошгүй хэргээр саатуулсан байна. Түүнийг Авлигатай тэмцэх комиссын байранд 10 орчим цаг байцаасны дараа баривчилжээ.
Авлигатай тэмцэх комиссын төлөөлөгч Будии Прасетьогийн мэдээлснээр, уг хэрэг 2023-2024 онд Силми Карим тухайн үеийн Ерөнхийлөгч Жоко Видодогийн засаг захиргаанд Цагаачлалын асуудал эрхэлсэн ерөнхий захирлаар ажиллаж байх үед гарсан байж болзошгүй аж. Мөн энэ хэрэгт холбогдуулан өөр долоон сэжигтнийг тогтоосон гэж мэдэгдэв.
Үүнээс нэг өдрийн өмнө Индонезийн Ерөнхий прокурорын газар Ерөнхийлөгч Прабово Субиантогийн хүүхдийн хоол тэжээлийн дутагдалтай тэмцэх үнэгүй хоолны хөтөлбөрийг хариуцаж байсан Үндэсний хоол тэжээлийн агентлагийн дарга асан Дадан Хиндаяанаг авлигын хэрэгт холбогдуулан баривчилжээ. Тус хэрэгт мөн хоёр хүнийг саатуулсан байна.
Мөрдөн шалгах байгууллагын мэдээлснээр, үнэгүй хоолны хөтөлбөрийг сургуулиудад үйл ажиллагаа явуулдаг сангуудаар дамжуулан хэрэгжүүлдэг бөгөөд эдгээр санг хууль бус үйл ажиллагаанд ашигласан байж болзошгүй гэж үзэж байгаа юм.
Индонезийн Төрийн нарийн бичгийн дарга Прасетьо Хади сүүлийн хоёр өдөр дараалан өндөр албан тушаалтнууд авлигын хэрэгт холбогдсонд Засгийн газар санаа зовниж буйгаа илэрхийлжээ. Тэрбээр Авлигатай тэмцэх комисс болон Ерөнхий прокурорын газрын явуулж буй хуулийн ажиллагааг Засгийн газар хүндэтгэнэ гэж мэдэгдсэн байна.
Индонезид сүүлийн саруудад авлигын эсрэг ажиллагаа идэвхжиж, өнгөрсөн дөрөвдүгээр сард тус улсын Омбудсманы ерөнхий дарга албан тушаалдаа томилогдоод зургаахан хоногийн дараа хээл хахуулийн хэрэгт холбогдон баривчлагдсан юм.
Цаг үе
Эрхтэн шилжүүлэн суулгах салбарын олон улсын тэргүүлэх мэргэжилтнүүдийг хүлээн авч уулзав
Эрүүл мэндийн сайд Э.Батшугар Монгол Улсад зохион байгуулагдаж буй “ICOT V-2026” Олон улсын эрхтэн шилжүүлэн суулгах чуулганд оролцохоор хүрэлцэн ирсэн олон улсын эрдэмтэн, профессоруудын төлөөллийг хүлээн авч уулзлаа.
Уулзалтад Туркийн Эрхтэн шилжүүлэн суулгах сангийн ерөнхийлөгч, профессор Эюп Кахвежи, Испанийн Донор ба шилжүүлэн суулгалтын институтийн ерөнхийлөгч, профессор Марти Маньялич Видал, Туркийн Эрхтэн шилжүүлэн суулгах сангийн ерөнхий зохицуулагч Гамзе Илдирим, БНСУ-ын Сөүлийн Үндэсний Анагаах Ухааны Төвийн профессор, Азийн Эрхтэн шилжүүлэн суулгах нийгэмлэгийн ерөнхий нарийн бичгийн дарга, “Vitalink” байгууллагын захирал профессор Гюри Ан нар оролцлоо.
Талууд Монгол Улсад эрхтэн, эд, эс шилжүүлэн суулгах тусламж үйлчилгээний өнөөгийн байдал, тархины үхэлтэй донорын тогтолцоог бэхжүүлэх боломж, хүний нөөцийн чадавхыг дээшлүүлэх, эмч мэргэжилтнүүдийг олон улсын сургалт, судалгаанд хамруулах, эрхтэн хадгалалт болон шилжүүлэн суулгах дэвшилтэт технологийг нэвтрүүлэх чиглэлээр санал солилцлоо.
Эрүүл мэндийн сайд Э.Батшугар Монгол Улсад эрхтэн шилжүүлэн суулгах салбар сүүлийн жилүүдэд эрчимтэй хөгжиж байгааг онцолж, олон улсын байгууллага, тэргүүлэх мэргэжилтнүүдтэй хамтын ажиллагаагаа өргөжүүлэн, иргэдэд үзүүлэх тусламж үйлчилгээний чанар, хүртээмжийг нэмэгдүүлэхэд анхаарч ажиллахаа илэрхийллээ.
Мөн уулзалтын үеэр “ICOT V-2026” конгрессын хүрээнд хэрэгжүүлэх хамтарсан сургалт, эрдэм шинжилгээний хамтын ажиллагаа, туршлага солилцооны талаар хэлэлцэж, цаашдын хамтын ажиллагааны чиглэлүүдийг тодорхойлов.
Цаг үе
Улаанбаатар хот БНСВУ-ын Нинь Бинь мужтай хамтын ажиллагаагаа өргөжүүлнэ
Манай улс Бүгд Найрамдах Социалист Вьетнам Улс (БНСВУ)-тай хот байгуулалт, аялал жуулчлал, соёл, боловсрол, эдийн засгийн салбаруудад хамтын ажиллагаагаа жилээс жилд өргөжүүлж буй. Энэ хүрээнд нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин тус улсын Нинь Бинь мужийн Намын хорооны орлогч нарийн бичгийн дарга, Үндэсний Ассамблейн төлөөлөгчдийн тэргүүн Май Ван Туат тэргүүтэй төлөөлөгчдийг хүлээн авч уулзлаа. Уулзалтаар талууд цаашдын хамтын ажиллагааг өргөжүүлэх талаар санал солилцсон юм.
Уулзалтын эхэнд НЗД-ын орлогч А.Амартүвшин уулзалтад ирсэн төлөөлөгчдөд талархал илэрхийлэн “Улаанбаатар хотын хувьд танай улсын нийслэл Ханой хоттой 1980-аад оноос эхлэн олон салбарт хамтын ажиллагаагаа өргөжүүлэн хөгжүүлсээр байна. Нийслэл хотуудын энэхүү харилцаа өнөөдөр орон нутгийн түвшний хамтын ажиллагаагаар улам бүр баяжиж байгаад баяртай байгаа илэрхийлье.
Цаашид Улаанбаатар хот болон Нинь Бинь мужийн аж ахуйн нэгж, байгууллагуудыг харилцан холбож, бизнесийн орчин, зах зээлийн боломжийг нэмэгдүүлэх хүсэлтэй байна. Тухайлбал, дэвшилтэт технологид суурилсан үйлдвэрлэл, хөдөө аж ахуй, логистик, худалдаа, хөрөнгө оруулалтын салбар, хүнсний болон өргөн хэрэглээний бараа бүтээгдэхүүний үйлдвэрлэл дэх хамтын ажиллагааг бэхжүүлэх чиглэлд бүхий л талаар дэмжлэг үзүүлэн, хамтран ажиллахдаа таатай байх болно” гэлээ.
БНСВУ-ын Нинь Бинь мужийн Намын хорооны орлогч нарийн бичгийн дарга, Үндэсний Ассамблейн төлөөлөгчдийн тэргүүн Май Ван Туат “Манай муж нь 2030 он гэхэд хотын статустай болохоор зорьж буй. Үүнтэй холбоотойгоор бидний харилцаа, хамтын ажиллагаа улам өргөжиж, олон төсөл, хөтөлбөрүүд амжилттай хэрэгжинэ гэдэгт итгэлтэй байна.
Цаашид дээрх салбаруудад хамтын ажиллагаагаа өргөжүүлэхээс гадна дижитал шилжилт, төрийн үйлчилгээний шинэчлэл, суурьшлын бүсийн оновчтой төлөвлөлт, ногоон байгууламжийг нэмэгдүүлэх чиглэлээр харилцан туршлага солилцон, хамтран ажиллах хүсэлтэй байна” гэдгийг онцолж байв.
Ташрамд, Монгол Улс, БНСВУ хооронд дипломат харилцаа тогтоосны 72 жилийн ой энэ онд тохиож байна.
