Цаг үе
Сэтгэлзүйн үйлчилгээний стандартад санал авч байна
2024 оны есдүгээр сарын 1-нээс мөрдөгдөж буй Хүүхэд хамгааллын тухай хуулийн /шинэчилсэн найруулга/ хэрэгжилтийг хангах зорилгоор Гэр бүл, хөдөлмөр, нийгмийн хамгааллын яамнаас Стандартчилал, хэмжил зүйн газартай хамтран “Сэтгэл зүйн үйлчилгээний стандарт”, “Бэлгийн хүчирхийллийн хохирогч хүүхдэд үзүүлэх хамгаалах, нөхөн сэргээх үйлчилгээний стандарт”-ыг боловсруулж, санал авч байна.
Бэлгийн хүчирхийлэлд өртсөн хохирогч хүүхдэд үзүүлэх хамгаалах, нөхөн сэргээх үйлчилгээний стандартын зорилго нь хохирогч хүүхдийг хамгаалах, нөхөн сэргээх үйлчилгээ, үйлчилгээний орчныг тодорхойлох, хэрэг хянан шийдвэрлэх үйл ажиллагаанд тавих нийтлэг шаардлага, хэм хэмжээг тогтоож мөрдүүлэхэд оршино.
Хамрах хүрээний хувьд бэлгийн хүчирхийллийн хохирогч хүүхдийг хамгаалах, нөхөн сэргээх үйлчилгээ ба хэрэг хянан шийдвэрлэх үйл ажиллагааг хүүхдийн эрхэд суурилсан, хохирогч/даван туулагч төвтэй, мэргэжлийн түвшинд үзүүлэх, үйлчилгээний чанар хүртээмжид хяналт тавих, үнэлэх, мэргэжил арга зүйн зөвлөгөө өгөхөд хэрэглэгдэнэ.
Сэтгэл зүйн үйлчилгээний стандартын зорилго нь хүчирхийллийн хохирогч хүүхдэд хүчирхийллээс үүссэн нөхцөл байдлыг даван туулж, хэвийн амьдралдаа эргэн ороход нийгэм сэтгэл зүйн дэмжлэг үзүүлэх, сэтгэцийн эрүүл мэндийг хамгаалахад тавих шаардлагыг тогтооно.
Өнөөдрийн хэлэлцүүлэгт хүүхэд, гэр бүлийн салбарын мэргэжилтнүүд, Шүүх шинжилгээний үндэсний хүрээлэн, цагдаагийн байгууллага, хүүхэд хамгааллын чиглэлээр ажилладаг төрийн бус байгууллагын төлөөлөл оролцлоо гэж Гэр бүл, хөдөлмөр, нийгмийн хамгааллын яамнаас мэдээллээ.
Цаг үе
Жолооны эрхгүй хүн автомашин жолоодох зөрчил буурахгүй байна
2024 оны III улиралд улсын хэмжээнд 2.443.823 зөрчлийн хэрэг бүртгэгдсэн нь өмнөх оны мөн үетэй харьцуулахад 2.2 хувиар өссөн ба 71.3 хувь нь нийслэлд, 28.7 хувь нь орон нутагт бүртгэгджээ.
Нийт зөрчлийн хэргийн дийлэнх буюу 92.8 хувийг Замын хөдөлгөөний аюулгүй байдлын тухай хууль зөрчих зөрчил эзэлж байгаа бол олон нийтийн газарт зүй бусаар биеэ авч явах зөрчил 3.8, Автотээврийн тухай хууль зөрчих зөрчил 1.6, хүний биед халдах зөрчил 0.6, гэр бүлийн хүчирхийлэл 0.4 хувийг тус тус эзэлж байна.
Замын хөдөлгөөний аюулгүй байдлын тухай хууль зөрчих зөрчлийн дийлэнх хувийг жолооч замын хөдөлгөөний дүрэм зөрчиж бусдын эрүүл мэнд, эд хөрөнгөд хохирол учруулсан зөрчил эзэлж байна. Тодруулбал,
-Жолооч замын хөдөлгөөний дүрэм зөрчиж бусдын эрүүл мэнд, эд хөрөнгөд хохирол учруулсан 17125,
-Согтуурсан, мансуурсан үедээ тээврийн хэрэгсэл жолоодсон 16409,
-Жолоодох эрхгүй, эсхүл эрх нь дуусгавар болсон хүн тээврийн хэрэгсэл жолоодсон 12164,
-Жолоодох эрхгүй, эсхүл эрх нь дуусгавар болсон хүн согтуурсан, мансуурсан үедээ тээврийн хэрэгсэл жолоодсон 3768 зөрчил бүртгэгджээ.
Өмнөх оны мөн үетэй харьцуулахад жолооны эрхгүй хүн автомашин жолоодсон зөрчил 23.6 хувиар, жолооч замын хөдөлгөөний дүрэм зөрчиж бусдын эрүүл мэнд, эд хөрөнгөд хохирол учруулсан зөрчил 36.7 хувиар тус тус өссөн байна. Харин жолооны эрхгүй хүн согтуугаар тээврийн хэрэгсэл жолоодсон зөрчил 55.7 хувиар буурчээ.
Мөн хугацаанд танхайрах, хуурамч дуудлага, мэдээлэл өгөх, гэр бүлийн хүчирхийлэл үйлдэх, эд хөрөнгө устгах, гэмтээх, олон нийтийн газарт зүй бусаар биеэ авч явах, хүүхдийн эрхийг зөрчих зөрчил өссөн байна. Тухайлбал, танхайрах зөрчил 49.4, хүүхдийн эрхийн зөрчил 26.6 хувиар тус тус өссөн бөгөөд бусад зөрчилтэй харьцуулахад гаралт нь хамгийн их хувиар өссөн дүнтэй байна.
Зөрчлийн улмаас бусдад 76 тэрбум төгрөгийн хохирол учирч, 45 тэрбум төгрөгийн хохирол нөхөн төлөгджээ.
Цаг үе
Их багтаамжийн 31 урт автобусыг үйлчилгээнд нэвтрүүллээ
Нийтийн тээврийн салбарын парк шинэчлэлийн хүрээнд өнгөрсөн есдүгээр сарын сүүлчээр БНХАУ-ын “Yutong Bus” компанийн үйлдвэрлэсэн 31 ширхэг угсраа автобусыг үйлчилгээнд нэвтрүүлээд байна.
Тодруулбал, иргэд олноор зорчдог “М:1-Таван шар-Офицеруудын ордон”, “М:2-Зунжин худалдааны төв-МУБИС-Сүхбаатарын талбай”, “М:3-Архивын ерөнхий газар-120 мянгат-Сүхбаатарын талбай” чиглэлд урт автобуснууд үйлчилгээнд явж байна.
Шинэ урт автобусны нийт багтаамж 125 ба түүнээс дээш хүн тээвэрлэх хүчин чадалтай, 41 суудалтай. Манай орны цаг агаарт тохирсон агааржуулалтын систем, хяналтын камеруудтай. Төлбөрийн олон төрөлт карт уншуулах боломжтой. Тусгай хэрэгцээт иргэнд зориулсан зохион байгуулалтыг шийдэж өгсөн зэрэг онцлогтой.
Үйлчилгээнд явж байгаа өмнөх цэнхэр урт автобуснуудын насжилт 2025 оны хоёрдугаар сард дуусах учир насжилт хэтрэхээс өмнө шинэ урт автобуснуудаар парк шинэчлэлт хийгээд байна.
Цаг үе
Гадаад хэргийн яамны уулзвараас Олимпын гүүр хүртэлх замыг хааж, шинэчилнэ
