Улстөр нийгэм
Дорнод аймаг дахь Бүсийн оношилгоо, эмчилгээний төвд зочилж, үйл ажиллагаатай нь танилцлаа
Монгол Улсын Ерөнхийлөгч Халтмаагийн Баттулга өнөөдөр Дорнод аймагт ажиллах үеэрээ тус аймаг дахь Бүсийн оношилгоо, эмчилгээний төвөөр зочилж, үйл ажиллагаатай нь танилцлаа.
Дорнод аймаг нь 82 мянган хүн амтай, аймгийн нийт хүн амын 60 гаруй хувь нь үйлчилгээ авах үйлчлүүлэгчдийн тоо өдөрт 800-900 байдаг байна.
94 жилийн түүхтэй бүсийн төв найман алба, 22 тасгийн зохион байгуулалттайгаар 500 ажиллагсадтай үйл ажиллагаагаа явуулж байгаа бөгөөд жилдээ дунджаар амбулаториор 135 мянган удаагийн үзлэг хийж, 12 мянган иргэнийг хэвтүүлэн эмчилж, 11 мянган удаагийн түргэн тусламжийн дуудлагад үйлчилж, 2,300 тохиолдолд мэс засал хийж байгаа талаар эмнэлгийн удирдлага Монгол Улсын Ерөнхийлөгчид танилцууллаа.
Тухайлбал, дурангийн мэс заслын эзлэх хувь жилээс жилд нэмэгдэж, нийт мэс заслын 28 хувийг эзэлж байна. 2,000 эхэд төрөх тойрны тусламж үзүүлж, эх барихын тусламжид эхийн эндэгдэлгүй ажиллаж байгаа нь тус эмнэлгийн онцлох амжилт юм.
2020 оны эхний хагас жилд Хэнтий, Сүхбаатар аймгуудын 5,190 иргэнд амбулаторийн тусламж үйлчилгээ үзүүлсэн нь нийт үйлчлүүлэгчийн 6.5 хувийг, эмнэлэгт 297 хүн хэвтэн эмчлүүлсэн нь 5 хувийг тус тус эзэлж байгаа гэлээ.
Мөн тус төв нь орон нутгийн эмнэлгүүдээс анхдагч болж бүрэн тоноглогдсон хагалгааны вакум өрөө ашиглалтад оруулсан байна. Ингэснээр мэс заслын тусламж үйлчилгээнд шинэ дэвшилтэт технологиудыг нэвтрүүлэн ажиллах боломж нээгдэж мэс заслын дараах нас баралт, хүндрэл 2 дахин бууруулсан амжилттай ажиллаж байна.
Гэвч тус төвийн барилга 1973 онд баригдсан учраас иргэдэд эмнэлгийн тусламж, үйлчилгээг хэвийн хүргэхэд хүндрэлтэй болж эхэлсэн талаар эмнэлгийн удирдлага хэлж байна.
Дараа нь Монгол Улсын Ерөнхийлөгч Халтмаагийн Баттулга “Улаанбаатар төмөр зам” ХНН-ийн Баянтүмэн тасгаар зочилж, үйл ажиллагаатай нь танилцав.
81 жил тасралтгүй тээврийн үйл ажиллагаа явуулж байгаа тус тасгаар дамжин хар тугалга, цайрын баяжмал экспортолж, зүүн бүсийн гурван аймгийн хэрэгцээний нефть, нефтийн бүтээгдэхүүнийг импортолж байна.
Монгол Улсын Ерөнхийлөгчийг Баянтүмэн тасагт ажиллах үеэр “Улаанбаатар төмөр зам” ХНН, “Монголын төмөр зам” ТӨХК-ийн удирдлагууд Баруун-Урт-Чойбалсан чиглэлд баригдах 205 км төмөр замын төслийн бэлтгэл ажлын талаар танилцууллаа.
Монгол Улсын Ерөнхийлөгч Баянтүмэн тасгаас хөдөлж, төмөр замын бүтээн байгуулалтын төсөлд оролцож буй бетон дэр үйлдвэрлэгч “Ган хийц” ХХК-ийн үйлдвэрийн талбайд зочилж, тус компанийн ажилтнуудад ажлын амжилт хүсэв.
Мөн өдөр Монгол Улсын Ерөнхийлөгч Халтмаагийн Баттулга Зэвсэгт хүчний 327 дугаар ангид ажиллаж, ангийн удирдлагатай уулзсан юм.
Монгол Улсын Ерөнхийлөгчийн Дорнод аймаг дахь томилолт үргэлжилж байна.
Улстөр нийгэм
Ерөнхий сайд татварын орчныг тогтвортой байлгаж, улаанбуудайн дотоодын зах зээлийг хамгаалахаа тариаланчдад илэрхийллээ
Монгол Улсын Ерөнхий сайд Г.Занданшатар Монголын тариаланчдын үндэсний холбооны тэргүүн, удирдах зөвлөлийн гишүүд, болон тариаланчдын төлөөлөлтэй уулзаж, салбарын өнөөгийн байдал, тулгамдсан асуудлын талаар санал солилцлоо.
Тариалалтаас урьтаж салбарын төлөөлөлтэй уулзаж байгаагаа Ерөнхий сайд Г.Занданшатаронцлоод, олон улсын зөрчилдөөнт нөхцөл байдалтай энэ цагт стратегийн бүтээгдэхүүн улаанбуудай, хүнсний ногоо, жимс жимсгэнийн тариалалтад Засгийн газар онцгой анхаарч, дэмжихээ илэрхийллээ. Засгийн газраас татварын тогтвортой орчин бүрдүүлж, улаан буудайн дотоодын зах зээлийг хамгаалах бодлогыг тууштай хэрэгжүүлнэ гэлээ.
Тус холбооныхон хүнсний улаанбуудай, хүнсний ногооны урамшуулал болон бордооны хөнгөлөлтийн санхүүжилтийг хаврын тариалалтаас өмнө шийдвэрлэх, тариалалт, уринш боловсруулалт, ургац хураалт зэрэг тариалангийн технологит хугацаанд шатахуун, шатах тослох материалын хангамжийг нэмэгдүүлэх, тасалдалгүй нийлүүлэхэд анхаарах, тариалангийн үйлдвэрлэлд шаардлагатай импортоор худалдан авч буй техник, тоног төхөөрөмж, бордоо, ургамал хамгааллын бодисыг гаалийн болон нэмэгдсэн өртгийн албан татвараас чөлөөлүүлэх саналаа илэрхийллээ.
“Хүнсний хувьсгал”, “Цагаан алт” хөтөлбөр, Атрын IV аяны хүрээнд хэрэгжүүлж буй төрийн бодлогын үр дүнд газар тариалангийн салбарын хөгжил урагшилж байна. 2025 онд гангийн улмаас ургац алдсан, гэхдээ энэ жил хангалттай уринш хийсэн, ургац сайн авна гэдэгтээ итгэлтэй байна гэж Сэлэнгэ аймгийн Тариаланчдын холбооны тэргүүн, "Түмэнбут" ХХК-ийн захирал Х.Даваахүү хэллээ.
Энэ онд улсын хэмжээнд 372.7 мянга га-д үр тариа, 16.4 мянган га-д төмс, 18.3 мянган га-д хүнсний ногоо,121.9 мянган га-д малын тэжээл, 104.1 мянган га-д тосны ургамал нийт 633.4 мянган га-д тариалалт хийж, 474.8 мянган тонн үр тариа, 180.6 мянган тонн төмс, 273.9 мянган тонн хүнсний ногоо, 287.0 мянган тонн малын тэжээл, 69.1 мянган тонн тосны ургамал хураан авах зорилт дэвшүүлсэн. Энэ зорилтыг хангахад тариаланчдыг онцгойлон дэмжиж ажиллахыг Хүнс, хөдөө аж ахуй, хөнгөн үйлдвэрийн яамны албан тушаалтнуудад Ерөнхий сайд үүрэг болголоо. Тухайлбал, сайн чанарын үрээр хангах, тариаланчдаас 100 мянган тн хүнсний улаанбуудай худалдан авч нөөц бүрдүүлэх, тариалалтын талбайн хэмжээг нэмэгдүүлж ажиллахыг даалгалаа. Мөн газар тариалангийн бүсэд газар зохион байгуулалтын төлөвлөгөө гаргаж, малчидтай хариуцлагын гэрээ байгуулах, тариалангийн талбайд мал оруулахгүй байхад анхаарч ажиллахыг орон нутгийн удирдлагуудад сануулав.
Хөдөө аж ахуйн корпорацын өөрчлөн зохион байгуулалтад Монголын тариаланчдын үндэсний холбоо зэрэг мэргэжлийн холбоо, төрийн бус байгууллагын ажил хэрэгч саналыг хүлээн авч, хамтран ажиллах шаардлагатайг Ерөнхий сайд хэллээ. Засгийн газраас энэ оны хаврын тариалалтад зориулж 130 тэрбум төгрөгийн эргэлтийн хөрөнгийн хөнгөлөлттэй зээлийн хүүгийн татаасыг олгохоор шийдвэрлээд буй юм.
Улстөр нийгэм
Эцэг, эхчүүдийг насанд хүрээгүй хүүхдэдээ суррон худалдан авч өгөхгүй байхыг уриаллаа
НИТХ-ын дарга бөгөөд Нийслэлийн гэмт хэргээс урьдчилан сэргийлэх салбар зөвлөлийн дарга А.Баяр иргэдийн аюулгүй байдлыг хангах үүднээс скүүтэр, мопедыг 16 нас хүрсэн иргэнд түрээслүүлэх зохицуулалт хийхээ мэдэгдсэн билээ.
Тэгвэл дахин сурронтой холбоотой уриалгыг гаргалаа.
Учир нь Гэмтэл согог судлалын үндэсний төвд өнгөрсөн 2025 онд суррон ангиллын тээврийн хэрэгсэлтэй зам, тээврийн осолд 2820 хүн холбогдсоноос 1953 нь эрэгтэй, 867 нь эмэгтэй байна.
Харин амиа алдсан 5 тохиолдол бүртгэгдсэнээс 4 нь эрэгтэй, 1 нь эмэгтэй байна.
Дээрх ослын ихэнх хувь Улаанбаатар хотод бүртгэгдээд байна.
Иймд НИТХ-ын дарга бөгөөд Нийслэлийн гэмт хэргээс урьдчилан сэргийлэх салбар зөвлөлийн дарга А.Баяр эцэг, эхчүүдийг насанд хүрээгүй хүүхдээ суррон унуулахгүй, худалдан авч өгөхгүй байхыг уриаллаа.
Ингэснээр эцэг, эхчүүд үр хүүхдээ зам тээврийн ослоос хамгаалаад зогсохгүй осол аваар гаргаж бусдад гэмтэл учруулахаас урьдчилан сэргийлж чадна гэдгийг онцоллоо гэж НИТХ-ын Хэвлэлийн албанаас мэдээллээ.
Улстөр нийгэм
“Эрдэнэс Тавантолгой”-н хувьцаа, ногдол ашгийг өвлүүлэх болон хувьцаа нэмж эзэмшүүлэх шийдвэрийн төсөл боловсруулж танилцуулна
“Эрдэнэс Тавантолгой” ХК-ийн талаар авч хэрэгжүүлэх зарим арга хэмжээний талаар Монгол Улсын сайд, ЗГХЭГ-ын дарга С.Бямбацогт Засгийн газрын хуралдаанд танилцууллаа.
“Эрдэнэс Тавантолгой” ХК-ийн нийт 12 тэрбум хувьцааны
·8.8 тэрбум буюу 73.5 хувийг төрийн өмчийн хувьцааны эрхийг хэрэгжүүлэгч “Эрдэнэс Монгол” ХХК,
·Долоон сая буюу 0.06 хувийг 488 үндэсний аж ахуйн нэгж,
·3.2 тэрбум буюу 26.4 хувийг Монгол Улсын 3.4 сая иргэн тус тус эзэмшиж байна.
Хувьцаа өвлөх эрхийн зохицуулалт, буцаан эзэмших боломжийг нэг удаа сэргээн олгох эсэх, 2024 оноос хойш төрсөн 124 мянган иргэний асуудлыг шийдвэрлэх шаардлагатай байгааг танилцуулгадаа дурдлаа.
“Эрдэнэс Тавантолгой” ХК-ийн 2025 онд хуваарилсан ногдол ашиг олгох ажлыг холбогдох хууль тогтоомжийн дагуу хэрэгжүүлж ажиллах, мөн 2025 оны ногдол ашгийг улсын хэмжээний томоохон төсөл, хөтөлбөрт, тухайлбал Дулааны цахилгаан станц барих төсөлд хөрөнгө оруулах чиглэлээр иргэдээс санал авах асуудлыг зохион байгуулах эсэх талаар Засгийн газрын хуралдаанаар хэлэлцэж, хувьцаа, ногдол ашгийг өвлүүлэх болон хувьцаа нэмж эзэмшүүлэх асуудлаар холбогдох шийдвэрийн төсөл боловсруулан ирэх долоо хоногийн Засгийн газрын хуралдаанд танилцуулахыг Монгол Улсын сайд, ЗГХЭГ-ын дарга С.Бямбацогтод даалгалаа.
