Улстөр нийгэм
Ерөнхий сайд Л.Оюун-Эрдэнэ Сингапурын хамтын ажиллагааны байгууллагын төлөөлөгчдийг хүлээн авч уулзлаа
Монгол Улсын Ерөнхий сайд Бүгд Найрамдах Сингапур Улсад өнгөрөгч долдугаар сард албан ёсны айлчлал амжилттай хийгээд ирсэн.
Энэхүү айлчлалын хүрээнд яригдсан асуудлуудын дагуу Сингапурын хамтын ажиллагааны байгууллагын төлөөлөгчдийн баг Монгол Улсад хүрэлцэн ирж ажиллаж байна. Өнөөдөр Ерөнхий сайдад Сингапурын Хамтын ажиллагааны байгууллагын гүйцэтгэх захирал Конг Вай Ман бараалхлаа.
Ерөнхий сайд Л.Оюун-Эрдэнэ айлчлалын яриа хэлэлцээр ажил хэрэг болж буйг онцлоод Сингапурын хамтын ажиллагааны байгууллагын төлөөлөгчдийн баг Монгол Улсад хүрэлцэн ирсэнд баяртай байна гэлээ.
Ерөнхий сайдын Сингапурт хийсэн айлчлалын үеэр талууд дөрвөн чиглэлд хамтран ажиллахаар тохиролцсон. Үүнээс эхний гурван чиглэлийн хамтын ажиллагаа ийнхүү эхлээд байна.
Нэгдүгээрт, Монгол Улсын онцлогт нийцсэн нийцсэн хуримтлалын нэгдсэн сангийн тогтолцоо би болгох чиглэлээр зөвлөх үйлчилгээ авахаар Хуримтлалын нэгдсэн сангийн сайн туршлага бүхий Сингапур Улсын Сингапурын хамтын ажиллагааны байгууллага хамтран ажиллах Санамж бичиг байгуулсан. Мөн Монгол Улсад Хуримтлалын нэгдсэн сан бий болгоход дэмжлэг үзүүлэх, зөвлөх үйлчилгээ авах техникийн нөхцөлийг боловсруулж Дэлхийн банкинд хүргүүлээд байна. Монгол Улсад Хуримтлалын нэгдсэн сан бий болгоход дэмжлэг үзүүлэх зөвлөх үйлчилгээ авах ажлын хүрээнд ажлын даалгавар боловсруулж Дэлхийн банкинд хүргүүлж батлуулсан. Энэхүү ажлын даалгаврын дагуу зөвлөх үйлчилгээний 1 ба 2 шатны зардлын тодорхой хэсгийг ($230’000) Дэлхийн банкнаас санхүүжүүлэхээр болоод байна.
Хоёрдугаарт, Төрийн өмчийн компаниудын менежментийг сайжруулах хүрээнд МИАТ ХК дээр түшиглэн Сингапур Улстай хамтран ажиллаж байна. Энэ нь Хөшгийн хөндийд Олон улсын нисэх онгоцны буудлыг түшиглэсэн шинэ хот байгуулах зорилттой уялдаж байгаа юм. Энэ боломжийг газар дээр нь судлахаар Сингапурын “Сурбана Журонг” компанийн төлөөлөгчид манай улсад ажиллаж байна.
Гуравдугаарт, хот төлөвлөлтийн асуудал. Монгол Улс нэг хүн амд ногдох газар нутгийн хэмжээгээр дэлхийд нэгт ордог. Гэтэл нийт хүн амын 50 гаруй хувь нь газар нутгийнхаа 0,3 хувь буюу Улаанбаатар хотдоо төвлөрөн амьдарч түгжрэл, агаарын бохирдол, сургууль, цэцэрлэг, орон сууцны хүртээмж зэрэг олон асуудал үүсээд байна. Энэ хүрээнд Барилга хот байгуулалтын яам, Сингапурын хамтын ажиллагааны байгууллага хооронд “Хотын зохион байгуулалт хөтөлбөр”-ийг хэрэгжүүлж, цуврал сургалтууд хийхээр төлөвлөн ажиллаж байна.
Уулзалтын төгсгөлд Ерөнхий сайд Л.Оюун-Эрдэнэ эдгээр хамтын ажиллагааг хөгжүүлэхэд бүх талаар дэмжиж, бодит үр дүнд хүрэхийн төлөө нягт хамтран ажиллахаа илэрхийллээ. Сингапурын хамтын ажиллагааны байгууллагын гүйцэтгэх захирал Конг Вай Ман Ерөнхий сайдыг хүлээн авч уулзсанд талархал илэрхийлээд айлчлалын мөрөөр Сингапур Улсаас томоохон судалгааны баг Монгол улсад ирж ажиллаж хуримтлалын сан, хот төлөвлөлт, төрийн өмчит компанийн менежмент, агаарын тээвэр зэрэг салбаруудад судалгаа хийж, танилцаж байна, энэ бүхнийг цогцоор нь авч үзэж, шинэчлэн, сайжруулах хувилбарыг гаргахаар ажиллаж байна гэлээ.
Улстөр нийгэм
“Зэс-Оюу” 220 кВ-ын хуваарилах байгууламжийг ашиглалтад орууллаа
Монгол Улсын эрчим хүчний системийн найдвартай ажиллагааг нэмэгдүүлж, өсөн нэмэгдэж буй цахилгаан эрчим хүчний хэрэгцээг хангах зорилготой “Зэс-Оюу” 220 кВ-ын хуваарилах байгууламжийг ашиглалтад орууллаа.
Энэхүү байгууламжийг 2022 онд Оюу толгойн уурхайг эрчим хүчний нэгдсэн сүлжээнээс хангах гэрээ байгуулсны дараа, 2023 оны тавдугаар сард Эрчим хүчний яамны тавьсан хүсэлтийн дагуу “Оюу толгой” ХХК-ийн хөрөнгө оруулалтаар барьжээ.
Шинэ байгууламж ашиглалтад орсноор Монгол Улсын төвийн эрчим хүчний системийг БНХАУ-ын Өвөр Монголын Өөртөө Засах Орны эрчим хүчний системтэй зэрэгцээ ажиллагаанд холбох техникийн боломж бүрдэж байгаа юм.
Үүний үр дүнд өвлийн оргил ачааллын үед Өвөр Монголоос 80 МВт хүртэлх цахилгаан эрчим хүчийг нэмэлтээр импортлон өмнөд бүсийн зарим хэрэглэгчийг хангах бөгөөд төвийн бүсийн эрчим хүчний системийн ачааллыг бууруулах боломжтой болно.
“Зэс-Оюу” 220 кВ-ын ил хуваарилах байгууламжийн төсөл нь Эрчим хүчний яам, Цахилгаан дамжуулах үндэсний сүлжээ ТӨХК, Диспетчерийн үндэсний төв, “Оюу толгой” ХХК, Өвөр Монголын Эрчим хүчний групп болон дотоодын гүйцэтгэгч байгууллагуудын хамтын ажиллагааны үр дүнд хэрэгжжээ.
Төслийн бүтээн байгуулалтад үндэсний 20 гаруй компани, 2000 гаруй инженер, техникийн ажилтан оролцож, нийт 600 мянга гаруй хүн/цагийн ажлыг осол, гэмтэлгүйгээр гүйцэтгэсэн байна.
Улстөр нийгэм
Дамбадаржаагийн 63 МВт-ын дулааны станцын бүтээн байгуулалт 62 хувийн гүйцэтгэлтэй байна
Чингэлтэй дүүргийн 19 дүгээр хороо, Дамбадаржаа дэд төвд барьж буй 63 МВт-ын хүчин чадалтай дулааны станцын барилга угсралтын ажил 62 хувийн гүйцэтгэлтэй үргэлжилж байна.
Тус станц нь Дамбадаржаа болон Сэлбэ дэд төвийн дулаан хангамжийг сайжруулах зорилготой бөгөөд "Гэр хорооллыг хөгжүүлэх хөрөнгө оруулалтыг дэмжих" хөтөлбөрийн хүрээнд хэрэгжиж байгаа юм.
Төслийн нийт санхүүжилтийн 40 хувь буюу 9.38 сая ам.долларыг Нийслэлийн Засаг даргын Тамгын газар, 60 хувь буюу 14.08 сая ам.долларыг Азийн хөгжлийн банк санхүүжүүлж байна. Барилга угсралтын ажлыг 2025 оны дөрөвдүгээр сард эхлүүлсэн бөгөөд ерөнхий гүйцэтгэгчээр "Хятадын хоёрдугаар металлурги групп корпораци" ажиллаж байгаа аж.
Улаанбаатар хотын Нэгдсэн төсөл хэрэгжүүлэх нэгжийн Ерөнхий инженер Г.Жанлавцогзолын мэдээлснээр, үндсэн зуухны барилга, нүүрсний агуулах, захиргаа, аж ахуйн байр, химийн ус бэлтгэлийн барилга, конвейрийн байгууламж, механик цех зэрэг үндсэн барилга байгууламжийн ажлууд 60-аас дээш хувийн гүйцэтгэлтэй байна.
Мөн нийт 75 нэр төрлийн үндсэн болон туслах тоног төхөөрөмжийг талбайд бүрэн хүлээн авч, угсралтын ажлыг үргэлжлүүлж байгаа бөгөөд аравдугаар сард үндсэн барилга угсралтын ажлыг бүрэн дуусгаж, зуухны туршилт, тохируулгыг эхлүүлэхээр төлөвлөжээ. Станцыг энэ онд ашиглалтад оруулахаар ажиллаж байна.
Дамбадаржаа дэд төвийн хэмжээнд нийт 71 га талбайд хэрэгжиж буй 19 бүтээн байгуулалтын ажил зэрэгцэн үргэлжилж байгаагаас 2.8 км авто замыг ашиглалтад оруулаад байна. Инженерийн болон нийгмийн дэд бүтцийн бусад ажлууд ч төлөвлөгөөний дагуу үргэлжилж байгаа юм.
63 МВт-ын хүчин чадалтай дулааны станц ашиглалтад орсноор төвлөрсөн дулаан хангамжид холбогдоогүй гэр хорооллын 5000 орчим өрхийг дулаанаар хангах боломж бүрдэхээс гадна Дамбадаржаа, Сэлбэ дэд төвийг тогтвортой дулаанаар хангана. Мөн нийслэлийн дулаан хангамжийн хүчин чадлыг нэмэгдүүлж, шинээр хөгжиж буй орон сууцны хорооллуудын найдвартай дулаан хангамжийг бүрдүүлэх, өвлийн оргил ачааллын үеийн ачааллыг бууруулахад чухал хувь нэмэр оруулах юм.
Улстөр нийгэм
Олон улсын сурагч солилцооны хөтөлбөрт таван хотын 62 төлөөлөгч оролцжээ
“Олон улсын сурагч солилцооны хөтөлбөр 2026” арга хэмжээ амжилттай зохион байгуулагдаж, хаалтаа хийлээ. Энэ жилийн хөтөлбөрт Улаанбаатар хоттой ах дүүгийн болон найрамдалт харилцаатай Тайландын Бангкок, БНХАУ-ын Хөх хот, ОХУ-ын Эрхүү, БНСУ-ын Намянжү, Японы Мияконожо хотын нийт 62 сурагч, багш, төлөөлөгч оролцжээ.
Оролцогчид долоо хоногийн хугацаанд Монгол Улсын түүх, соёл, өв уламжлал, мөн нийслэл Улаанбаатар хотын хөгжил, бүтээн байгуулалттай танилцсан байна.
Хаалтын арга хэмжээнд нийслэлийн Засаг даргын орлогч Г.Жаргалсайхан оролцож, хөтөлбөрөөр дамжуулан Монгол Улсын баялаг түүх, өв соёл, үндэсний уламжлал, Улаанбаатар хотын хөгжил, бүтээн байгуулалтыг олон улсын хүүхэд, залуучуудад таниулахыг зорьсныг онцоллоо.
Мөн таван хотын сурагчид Монголын уламжлал, орчин үеийн хөгжилтэй танилцаж, шинэ найз нөхөдтэй болсон нь хөтөлбөрийн хамгийн үнэ цэнтэй үр дүн гэдгийг тэмдэглэв.
Тус хөтөлбөр нь хүүхэд, залуучуудын нөхөрлөл, харилцан ойлголцлыг бэхжүүлэх, соёлын солилцоог өргөжүүлэхийн зэрэгцээ Улаанбаатар хотын гадаад харилцаа, хамтын ажиллагааг хөгжүүлэх ач холбогдолтой болж өндөрлөжээ.
-
Цаг үе2021/02/01
Улс орнууд авлигатай хийх тэмцэлдээ хүч нэмсээр байна
-
Шударга мэдээ2022/03/17
Улсын хэмжээнд 2022 онд нийт 32358 иргэнд 3937.3 га газрыг гэр бүлийн хэрэгцээни...
-
Цаг үе2023/10/10
Монголбанк есдүгээр сард 2.9 тонн үнэт металл худалдан авлаа
-
Шударга мэдээ2024/10/14
Улсын бүртгэлд бүртгэгдсэн жоргүй олгох эмийн жагсаалт