Урлаг спорт
Баянхонгорт усан бассейн бүхий Спорт цогцолбор ашиглалтад орно
Баянхонгор аймагт улсын төсвийн хөрөнгөөр баригдсан усан бассейн бүхий спорт цогцолборын барилгын ажил 2012 онд эхэлсэн ч 2014 оноос ажил нь зогсонги байдалд орсон байдаг. Гэвч барилгын гүйцэтгэл ажлыг 2020 оноос эрчимтэй явуулснаар улсын комисс саяхан хүлээж аваад байгаа юм.
Биеийн тамир, спортын улсын хорооны захиалгаар ” RMB ” ХХК -ийн гүйцэтгэсэн тус усан бассейн бүхий спорт цогцолбор нь 550 хүний суудалтай спорт заал, 170 хүний суудалтай усан бассейнтай, 25х35м спорт заал, олон улсын стандартын таван замтай, 330 м кубын хүчин чадалтай усан бассейн, хүүхдийн мини бассейн, бялдаржуулах төв, бэлтгэлийн заал, оффис өрөө, сургалтын өрөө, эмч, багш дасгалжуулагч нарын тус тусын нийт үйл ажиллагаа явуулах 20 өрөө, 70 машины дулаан зогсоолтой юм.
Монгол Улсын хэмжээнд томоохонд тооцогдох Спортын ордны нээлтээ клубуудын улсын аварга шалгаруулах тэмцээнээр нээхээр төлөвлөж буйгаа УИХ-ын дарга Г.Занданшатар, УИХ-ын гишүүн Д.Ганбат, А.Адъяасүрэн нарт аймгийн Засаг дарга Д.Мөнхсайхан танилцуулав.
Тус ордноо түшиглэн Баянхонгор аймагт Монголын хүүхдийн спортын VII наадмыг зохион байгуулахаар болсны зэрэгцээ Монголын хүүхдийн спортын VII наадам анх удаа хөдөө орон нутагт усан спортын төрлөөр явагдах бүхий л боломж нөхцөл манай аймагт бүрдэснээрээ онцлог юм.
УИХ-ын дарга хонгор нутгийн хүүхэд залуусынхаа хөгжил, оролцоо, эрүүл мэндээ хамгаалах өрнүүн үйлсэд амжилт хүсэж, баяртай буйгаа илэрхийлэв.
Урлаг спорт
“УИХ-ын цом 2025” спортын тэмцээн эхэллээ
Жил бүр уламжлал болон зохион байгуулагддаг “УИХ-ын цом 2025” шилжин явах цомын төлөөх тэмцээн энэ сарын 24-ний өдөр эхэлсэн байна.
Улсын Их Хурал, түүний Тамгын газар болон Улсын Их Хуралд ажлаа шууд тайлагнадаг байгууллагын ажилтан, албан хаагчдын бие бялдарыг хөгжүүлэх, чөлөөт цагийг зөв боловсон өнгөрүүлэх зорилготойгоор жил бүр зохион байгуулагддаг энэхүү арга хэмжээг Санхүүгийн зохицуулах хороо 2025 онд зохион байгуулж байна. Тэмцээн таван төрлөөр явагдах бөгөөд нийт 13 байгууллагын 600 орчим тамирчин оролцож байна.
Тэмцээнд оролцож буй байгууллагуудын баг, тамирчид шатар, ширээний теннис, буудлага, волейбол, сагсан бөмбөг гэсэн таван төрлийн спортоор хурд, хүч, авхаалж самбаагаа сорин өрсөлдөж, шилдгүүдээ тодруулах юм.
Тэмцээнийг Улсын Их Хурлын Ерөнхий нарийн бичгийн дарга Б.Баасандорж нээж, Улсын Их Хурлын гишүүд, тэмцээнд оролцогч байгууллагуудын удирдлагууд оролцлоо хэмээн Улсын Их Хурлын Хэвлэл мэдээллийн газраас мэдээлэв.
Урлаг спорт
“Сөүлийн найрамдлын фестиваль” олон улсын арга хэмжээ үргэлжилж байна
БНСУ-ын Сөүл хотын захиргаанаас уламжлал болгон жил бүр зохион байгуулдаг “Сөүлийн найрамдлын фестиваль” олон улсын арга хэмжээ энэ сарын 25, 26-ны өдрүүдэд болж байна.
Уг фестивальд “Улаанбаатар театр” ОНӨТҮГ-ын уран бүтээлчид оролцож, Монгол Улсын үндэсний соёл, урлагийг сурталчилж байна.
Мөн Бээжин, Бангкок, Жакарта, Вьентьян, Веллингтон, Хаккайдо, Лима зэрэг 10 хотын 110 гаруй уран бүтээлчид оролцож, өөрсдийн улс, үндэстний соёл, урлагийг сурталчилж байгаа нь онцлог юм.
Ташрамд, Улаанбаатар болон Сөүл хотууд 1995 онд анх найрсаг харилцаа тогтоосон түүхтэй юм. Энэ онд хоёр хотын ах дүүгийн харилцаа тогтоосны 30 жилийн ой энэ жил тохиож байна. Хоёр хот соёл, урлаг, аялал жуулчлал, боловсрол, эрүүл мэнд зэрэг олон салбарт найрсаг харилцаа, хамтын ажиллагааг өргөжүүлж байгаа билээ.
Урлаг спорт
Хүүхдийн марафоныг Үндэсний цэцэрлэгт хүрээлэнд зохион байгуулна
Хүний эрхийн Үндэсний Комиссоос “Хүүхэд бүр ялагч-Хүүхэд бүр хамгаалагч” хүүхдийн марафоныг хоёр дахь удаагаа Үндэсний цэцэрлэгт хүрээлэнгийн “Цагдаа” талбайд 2025 оны тавдугаар сарын 31-ний өдөр зохион байгуулна. Гүйлтийн арга хэмжээ нь 6-17 насны ангиллаар зохион байгуулагдах тул оролцох боломжтой. Цахим бүртгэл 2025 оны 05 дугаар сарын 28-ны өдрийг хүртэл үргэлжилнэ.
Уг арга хэмжээ нь үе тэнгийн дээрэлхэлт, ялгаварлан гадуурхалтыг таслан зогсоох, түүний хор уршиг, сөрөг үр дагаврыг сурталчлан таниулах, хүүхдийн эрхийн зөрчлөөс урьдчилан сэргийлэх, зөв хандлага, соёлыг дэлгэрүүлэх зорилготой.
Арга хэмжээнд хүрэлцэн ирсэн хүүхэд бүр
- Барианд орж буй түүхэн мөчөө мэргэжлийн гэрэл зурагчны дуранд мөнхөлж
- Мэргэжлийн нүүр хувиргагчаар нүүрээ будуулан
- Үлгэр, киноны баатруудтай гэрэл зураг авхуулж
- Өөрийн хүсэл, мөрөөдлөө “Хүслийн хайрцаг”-т шивнэн
- Авьяаслаг хүүхдүүдийн урлагийн тоглолт, хүний эрхийн интерактив контент үзэж сонирхохоос гадна
- • The Open Mic арга хэмжээнд оролцох боломжтой
-
Шударга мэдээ2025/01/17
Тээврийн хэрэгслийн улсын дугаар авах хүсэлтийг carplate.ulaanbaatar.mn цахим си...
-
Цаг үе2025/05/30
Сэлбэ голын үерийн хамгаалалтын түшиц хананы ажлыг ирэх сард дуусгана
-
Цаг үе2019/07/17
Зарим газраар дуу цахилгаантай усархаг бороо орно
-
Цаг үе2025/03/17
Зайсангийн зүүн гүүр буюу шинэ гүүрний шон суурилуулах ажлын явц 40 хувьтай үргэ...