Улстөр нийгэм
Д.Бат-Эрдэнэ: Сонгуулийн ил тод, нээлттэй, хяналттай зохион байгуулахад бүх талаар хамтран ажиллахад бэлэн
Сонгуулийн ерөнхий хороонд Ардчилсан нам, Монголын Уламжлалын Нэгдсэн нам, Монголын Социал Демократ нам, Монголын хүний төлөө нам, МИДАС төрийн бус байгууллага хамтран шаардлага ирүүлэв.
Нэг хүн нэг санал өгөх зарчмыг хангах, хурууны хээ давхцахаас сэргийлэх, сонгогчдын нэрийн жагсаалтыг онлайн болгох, санал авахад иргэний үнэмлэх шалгах, сонгогчдын нэрийн жагсаалт, бүртгэлийг шалгах, тулгах чиглэлээр намуудын төлөөллөөс бүрдсэн ажлын хэсэг байгуулах зэрэг шаардлагыг Ардчилсан намын дэд дарга Ж.Баярмаа танилцуулсан юм. Түүнчлэн хяналтын тооллогыг дэлгэцээр гаргах, видео бичлэг хийх эрх олгох, санал тоолох төхөөрөмжийн үйлдлийн систем болон программ хангамжийг мэргэжлийн хөндлөнгийн байгууллагаар баталгаажуулах, сонгогчдын боловсролыг дээшлүүлэх зэрэг шаардлага хүргүүлж байгаагаа мэдээллээ.
Сонгууль зохион байгуулах үйл ажиллагааны ил тод, нээлттэй байдлыг хангах зорилгоор нам, эвсэл, нэр дэвшигч, иргэд, ажиглагчдын оролцоог бүрэн хангаж ажиллана гэдгийг Сонгуулийн ерөнхий хорооны Тамгын газрын дарга Д.Бат-Эрдэнэ шаардлагыг хүлээн авахдаа танилцуулав. Сонгуулийн ерөнхий хороо нь шударга сонгуулийн төлөө нам, эвсэл, иргэд, төрийн болон төрийн бус аль ч байгууллагатай хамтран ажиллахад хэзээд бэлэн гэдгээ илэрхийлээд хууль бус үйл ажиллагаа, үйлдэл байгаа бол гагцхүү баримттай, бодитой мэдээлэл ирүүлэхийг хүслээ. Сонгуулийн автоматжуулсан системийг туршиж, баталгаажуулахад хяналт тавьж, нягтлан шалгах хүсэлтийг ээлжит сонгуульд оролцож байгаа бүх нам, эвсэлд хүргүүлсэн. Шалгаж, хянаж, баталгаажуулахад хамтран ажиллаж, эргэлзээг мухарлах боломжийг хангаснаар сонгогчдод үнэн зөв бодит мэдээлэл өгөх боломж бүрдэх юм гэдгийг онцлов.
Хуульд заасны дагуу давхардал, зөрчил байгаа эсэхийг нягтлан шалгуулах зорилгоор нийт сонгогчдын нэрийн жагсаалтыг сонгуульд оролцож буй улс төрийн нам, эвсэлд хоёр удаа хүргүүлэхээс гадна шаардлагад дурдсан сонгогчдын нэрийн жагсаалтын нэгдсэн санг ажиллуулах талаар Монгол Улсын Их Хурлын сонгуулийн тухай хуульд тодорхой зохицуулалтыг нэмэлт, өөрчлөлтөөр оруулж баталсан гэдгийг онцолсон. Өөрөөр хэлбэл, шаардлагад дурдагдсан нэг хүн нэг л удаа санал өгөх нь хуульд заасан сонгогчдын нэгдсэн сангийн тухай ойлголтод хамаарч байгааг тайлбарлав. Гадаад улсад байгаа иргэдээс авсан саналыг тоолох үйл ажиллагаа бүрэн нээлттэй, бөгөөд уг үйл ажиллагаанд нам, эвслийн ажиглагчид нээлттэй оролцоно. Мөн энэ удаагийн сонгуулиар хяналтын тооллогыг бүх хэсэгт 100 хувь зохион байгуулах бөгөөд гар аргаар тоолох үйл ажиллагаа нь хяналтын камерын дор зохион байгуулагдана, үүнд нам эвслийн ажиглагчдаас гадна хэвлэл мэдээллийн байгууллага иргэд нээлттэйг оролцох, хяналт тавих бүрэн боломжтойг танилцуулсан юм.
Сонгуулийн ерөнхий хороо сонгуульд оролцож талуудын шаардлагыг нээлттэй хүлээн авч, сонгогчдыг эргэлзүүлсэн, төөрөлдүүлсэн, худал мэдээллийг мухарлаж, сонгогчдод үнэн зөв, бодит мэдээлэл өгч нээлттэй ажиллана. Гагцхүү эх сурвалжаа нягталж шалгасан, бодитой мэдээлэл гомдол ирүүлж байхыг хүслээ гэж Сонгуулийн ерөнхий хорооноос мэдээллээ.
Улстөр нийгэм
Төрийн албан хаагчийн ёс зүйн сургалтад 300 албан хаагч оролцож байна
Төрийн албан хаагчийг ёс зүйн зөрчлөөс урьдчилан сэргийлэх, соён гэгээрүүлэх, холбогдох хууль тогтоомжийг мөрдүүлэх үндэсний хөтөлбөр хэрэгжиж байна.
Энэ хүрээнд төрийн албан хаагчийн ёс зүй, авлига, ашиг сонирхлын зөрчлөөс урьдчилан сэргийлэх зорилгоор нийслэлийн нутгийн захиргааны байгууллагын удирдах албан тушаалтнуудад зориулсан сургалт өнөөдөр нийслэлийн нутгийн захиргааны цогцолбор байранд болж байна.
Сургалтад нийслэл, дүүргийн Засаг даргын Тамгын газар болон нийслэлийн харьяа байгууллагын удирдах албан тушаалын 300 албан хаагч оролцож байгаа бөгөөд НЗДТГ-ын дарга П.Хадбаатар нээж, үг хэллээ.
Ёс зүйн хорооны дарга, Төрийн албаны зөвлөлийн гишүүн Ц.Амартөгс “Төрийн албан хаагчийн ёс зүй”, АТГ-ын Урьдчилан сэргийлэх, соён гэгээрүүлэх хэлтсийн ахлах ажилтан, ахлах комиссар Б.Тэрбиш “Авлига, ашиг сонирхлын зөрчлөөс урьдчилан сэргийлэх”, Удирдлагын академийн Эрх зүйн тэнхимийн эрхлэгч, доктор А.Алтанзул “Ёс зүйн зөрчил, эрх зүйн үндэслэл, хариуцлага” сэдвээр илтгэл хэлэлцүүлж байна.
Ёс зүйн хорооны дарга, Төрийн албаны зөвлөлийн гишүүн Ц.Амартөгс “Төрийн албан хаагчийн ёс зүйн тухай хууль 2023 онд батлагдсан. Тус хуулиар төрийн албан хаагчийн ёс зүйн хэм хэмжээ, нийтлэг үүрэг, хариуцлагыг тогтоож өгсөн. Тухайлбал, төрийн албан хаагч иргэдийн асуудлыг анхааралтай сонсож, хууль тогтоомжоор олгосон үйл ажиллагааны хүрээнд хариу өгдөг байх ёстой. Тиймээс төрийн албан хаагч мэргэжил болон харилцаа хандлагын хувьд ямар үүрэг хүлээж байна вэ гэдгийг сургалтаар хэлэлцэн таниулж байна. Мөн албан хаагч алдаа гаргах нөхцөл байдал хэрхэн үүсэж байна вэ гэдгийг тодорхойлж, алдаа, зөрчил гаргахгүй байлгахад сургалт чиглэлээ. Өнөөдрийн сургалтад оролцож байгаа нийслэл болон нийслэлийн харьяа байгууллагын удирдах албан тушаалтнууд эдгээр хэм хэмжээ, үүрэг, зарчмыг манлайлан мөрдүүлэхэд анхаарч байна” гэлээ.
Төрийн албан хаагчийн ёс зүйн тухай хуульд “Төрийн албан хаагч хүнлэг, энэрэнгүй байх, үнэнч, шударга байх, хариуцлагатай байх, манлайлах, хамтач байх ёс зүйн зарчмыг баримтална” хэмээн заажээ. Төрийн албан хаагчийн ёс зүй, байгууллагын соёлыг өдөр тутмын энгийн үйлдлээс эхэлж сайжруулдаг. Албан хаагч хувийн харилцаа, хандлага болон иргэдийн хүсэлтийг шийдэхэд сэтгэл гаргаж ажилладаг байх тал дээр анхаарах хэрэгтэйг сургалтын үеэр онцоллоо.
Төрийн албан хаагч ард түмэндээ чин сэтгэлээсээ үйлчилж, төрийн албаны нэр хүндийг эрхэмлэх, зан харилцаа, үг, үйлдлээрээ хүний эрх, эрх чөлөө, нэр төр, алдар хүнд, хууль ёсны ашиг сонирхлыг хүндэтгэх, албан үүргээ гүйцэтгэхдээ бусдад аливаа хэлбэрээр дарамт үзүүлэхгүй байх, ялгаварлан гадуурхахгүй байх зэрэг ёс зүйн нийтлэг хэм хэмжээг сахин мөрдөх үүрэгтэй. Эдгээр үүрэг, хэм хэмжээг өдөр тутмын үйл ажиллагаа, төрийн албан хаагчийн ёс зүйн хүрээнд байнгын мөрдөж занших ёстойг сургалтаар танилцуулж байна.
Улстөр нийгэм
Их, дээд сургуулиудын академик эрх чөлөөг хангаж, өмчийн хэлбэр харгалзалгүйгээр дэмжин ажиллана
Өнгөрсөн наймдугаар сард Боловсролын сайд П.Наранбаяр Монголын хувийн их дээд сургуулиудын холбооны төлөөлөлтэй уулзах үеэр ярилцсаны дагуу нэгдсэн байдлаар бүх хувийн их, дээд сургуулийн удирдлагуудтай уулзлаа.
Хувийн их, дээд сургуулийн удирдлагууд тулгамдаж буй асуудлуудаа хэлэлцэн нэгтгэж, төрийн дээд боловсролын салбар дахь оролцоо дэмжлэг болон эрх зүйн орчин, элсэлтийн босго, дээд боловсролын байгууллагуудын эрэмбэ, багшийн хөгжил болон нийгмийн баталгаа гэсэн чиглэлүүдээр санал хүсэлтээ илэрхийлэв. Тухайлбал, их, дээд сургуулийн онцлогийг харгалзаж үнэлэх замаар эрэмбэ тогтоох, төрийн зүгээс өмчийн хэлбэрийг ялгахгүйгээр адил тэгш бодлого хэрэгжүүлэх, салбарт хэрэгжиж буй хуулиудад өөрчлөлт оруулах шаардлагатай гэлээ.
Боловсролын сайд П.Наранбаяр их, дээд сургуулиудын академик эрх чөлөөг хангаж, өмчийн хэлбэр харгалзалгүйгээр дэмжин ажиллахаа онцолж, дээд боловсролын байгууллагуудын онцлог, чиглэлийг харгалзан ангилах байдлаар хөндлөнгийн байгууллагаар эрэмбэ тогтоолгох, элсэлтийн босгыг үе шаттайгаар өсгөн элсэгчдийг чанаржуулах бодлого баримтална хэмээв. Мөн бүх санал хүсэлтэд хариу өгч, нэгтгэж эрэмбэлэн үе шаттайгаар шийдвэрлэхээ хэллээ гэж Боловсролын яамнаас мэдээллээ.
Улстөр нийгэм
С.Амарсайхан: Цаг агаарын гэнэтийн аюултай үзэгдэлд бэлэн байх, хүлэмжийн хийг бууруулах томоохон сорилт тулгарч байна
Монгол Улсын Шадар сайд, УОК-ын дарга С.Амарсайхан өнөөдөр УИХ дах Байгаль орчныг хамгаалах бүлгэмийн гишүүдийг хүлээн авч уулзлаа.
Уулзалтаар "Уур амьсгалын өөрчлөлтийн Үндэсний хороо"-оос өнгөрсөн онд хийж, хэрэгжүүлсэн ажлын тайлан болоод цаашид хэрэгжүүлэх арга хэмжээний төлөвлөгөөг танилцуулсан юм.
Сүүлийн 80 жилд манай улсад агаарын температур 2.4 хэм өссөн, жилийн дундаж хур тунадас 7.3 хувь, нэг хүнд ногдох хүлэмжийн хийх ялгарал дэлхийн дунджаас 2.7 дахин нэмэгдсэн. Мөн сүүлийн 20 жилд гамшигт үзэгдлийн давтамж хоёр дахин нэмэгдээд байна. Үүнтэй холбоотойгоор өнгөрсөн жилийн зудын нөхцөл байдал гамшгийн хэмжээнд хүрч, 7.4 сая толгой мал хорогдсон. Энэ нь нийгэм, эдийн засагт ихээхэн хэмжээний хохирол учруулсан. Иймд цаг агаарын гэнэтийн аюултай үзэгдэлд бэлэн байх, үндэсний сөрөн тэсвэрлэх чадамжаа нэмэгдүүлэх, байгалийн нөхөн сэргээлт хийх, хүлэмжийн хийг хэрхэн бууруулах зэрэг томоохон сорилт тулгарч байгаа юм.
Гишүүдийн зүгээс цаг агаарын аюулт үзэгдлээс урьдчилан сэргийлэх арга хэмжээг сайжруулах, төр, иргэн, аж ахуйн нэгжүүдийн уялдаа холбоог хангах, уур амьсгалын өөрчлөлтөд дасан зохицон ажиллаж, амьдрах шийдлүүдийг оновчтой гаргах нь чухал гэдэг саналыг илэрхийллээ.
Уур амьсгалын өөрчлөлтөөс урьдчилан сэргийлэх чиглэлээр гадаад хамтын ажиллагаагаа өргөжүүлэх, УИХ-ын тогтоол, шийдвэрээ гаргаж, холбогдох яамдуудад хүргүүлэх, энэ чиглэлийн судалгаа шинжилгээний ажлыг эхлүүлэх шаардлагатай байгааг Монгол Улсын Шадар сайд, УОК-ын дарга С.Амарсайхан онцоллоо гэж ОБЕГ-аас мэдээллээ.
