Шударга мэдээ
Либери улсын сангийн сайд асанг баривчлах шүүхийн шийдвэр гарчээ
Либери улсын сангийн сайд асан Самуэл Тве 500 сая долларын (389 сая фунт) авилгын хэрэгт холбогдож, түүнийг баривчлах шүүхийн шийдвэр гарчээ.
Самуэл Тве болон Ерөнхийлөгч асан Жорж Веагийн засгийн газарт ажилладаг байсан гэх дөрвөн албан тушаалтнууд нь ажиллаж байх хугацаандаа засгийн газраас хулгай хийсэн хэргээр буруутгагдаж байна.
Өмнө нь авлигын хэргээр АНУ-аас шийтгэл хүлээж байсан ноён Тве тус яллах дүгнэлтийг өөрт нь болон бусад албан тушаалтнуудын эсрэг явуулж буй "улс төрийн зорилготой ан" хэмээжээ.
Зургаан жилийн эрх мэдэл нь нэгдүгээр сард дуусгавар болсон Веагийн засгийн газар нь авлига болон санхүүгийн буруу менежменттэй холбоотой хэргүүдээс болж ихээхэн зовинолтой байдаг байв.
Ерөнхийлөгч Жосеф Боакай ажлаа хүлээж авахдаа авлигатай хатуу тэмцэнэ хэмээн амлаж байсан.
Өнгөрсөн даваа гарагт дээрх таван албан тушаалтнуудыг эдийн засгийг сүйтгэсэн, төсвийн мөнгийг хууль бусаар зарцуулсан, гэмт хэргийн хуйвалдаан зохион байгуулсан болон бусад хэрэгт буруутгажээ. Үүний дараагаар Монровиа хотын шүүхээс тэднийг баривчлах шийдвэр гарав.
Тэдгээр хүмүүсийн гурав нь болох Үндэсний аюулгүй байдлын зөвлөх асан Жефферсон Кармох, Улсын яллагч Ньенати Туан, Санхүүгийн тагнуулын газрын (“FIA”) нягтлан бодох бүртгэлийн дарга Мозес Купер нар батлан даалтад гарах боломжгүй байсан тул Либерийн төв шоронд саатуулагдаж байна.
Одоогоор тэдгээр албан тушаалтнууд болон тэдний хуулийн төлөөлөгчид уг хэргийн талаар одоогоор ямар нэгэн тайлбар өгөөгүй байна.
Харин Ноён Тве болон “FIA”-гийн дарга асан Стэнли Форд нар одоог хүртэл баривчлагдаагүй ба цагдаа нар тэдний яг хаана байгааг мэдэхгүй байна.
Энэ хэрэг нь Экс сангийн сайдын авлигын хэрэгт буруутгагдаж байгаа анхны тохиолдол биш бөгөөд өнгөрсөн арванхоёрдугаар сард АНУ-аас түүнийг болон хоёр сенаторыг "хээл хахууль авах, санал болгох зэргээр албан тушаалаа урвуулан ашигласан" хэргээр шийтгэж байсан.
Ноён Тве энэ мэдээллийг тухайн үед үгүйсгэсэн бөгөөд даваа гаригт гарсан ялын дүгнэлтийн хариуд өөрийн Фейсбүүк хуудсандаа “Өнөөдөр миний эсрэг улс төрийн зорилготой ангуучлал эхэллээ, Сүүлийн зургаан жилийн хугацаанд би улс төрийн гол бай болж, худал хуурмаг буруутгалуудтай их тулгарсан.” хэмээжээ.
Ерөнхийлөгч Боакай өнгөрсөн нэгдүгээр сард сонгуульд ялалт байгуулсны дараа албан тушаалдаа томилогдож авлигатай тэмцэхийн тулд хөрөнгөө мэдүүлж, ерөнхийлөгчийн тамгын газарт аудит хийхийг тушаажээ. Үүний үр дүн нь хараахан гараагүй байгаа ба тэрээр Аудитын ерөнхий хороо болон Авлигатай тэмцэх хороог чадавхижуулан ажиллаж байгаа аж.
Эх сурвалж: https://www.bbc.com
Шударга мэдээ
Нийслэлийн агаарын бохирдол ихтэй бүсийн 52 мянган өрхөд цахилгаан болон хийн түлшний хэрэглээг нэвтрүүлнэ
НИТХ-ын Зөвлөлийн хуралдаан өнөөдөр боллоо. Зөвлөлийн хуралдаанаар хэлэлцэх асуудлыг НИТХ-ын дарга, Зөвлөлийн дарга А.Баяр танилцуулж, хуралдааныг эхлүүлэв.
Хэлэлцэх асуудлын дарааллын дагуу “Нийслэлийн агаарын чанарыг сайжруулах гэр хорооллын өрхөд цахилгаан халаагуур болон бүх төрлийн хийн түлшээр ажилладаг төхөөрөмж суурилуулах, түүний хэрэглээнд үнийн урамшуулал олгох журам”ыг батлах тухай хэлэлцлээ. Нийслэлийн Агаар, орчны бохирдолтой тэмцэх газрын дарга Д.Мөнхбаатар танилцуулга, мэдээлэл хийв.
Нийслэлийн агаарын чанарыг сайжруулах ногоон бүсийн өрх сууцаа дулаан алдагдалгүй болгож, хатуу түлш буюу нүүрсийг хэрэглээнээс халах зорилготой уг төслийн хүрээнд гэр, орон сууцаа дулаалж, дулаан алдагдалгүй болгох, хатуу түлшийг хэрэглээнээс халсан өрхүүдэд нэг удаа тоног төхөөрөмж үнэгүй суурилуулах болон бүх төрлийн хийн түлш болон цахилгаан халаагуурын хэрэглээний үнийн урамшуулал олгох талаар тусгажээ. Ингэхдээ сарын хэрэглээнээс хамаарч нэг өрхөд сард 50-250 мянган төгрөгийн урамшуулал олгох байна. Эхний ээлжид нийслэлийн агаарын бохирдол ихтэй бүсийн 52 мянган өрхөд цахилгаан болон хийн түлшний хэрэглээг нэвтрүүлэхээр төлөвлөжээ.
Түүнчлэн тухай бүсийн айл өрхүүдийн хэдэн хувь нь байшинд амьдардаг, гэрт амьдардаг, дулаалгыг хэрхэн хийх, аль өрхөд цахилгаан, аль өрхөд хийн түлшний төхөөрөмж суурилуулах талаар нарийн судалгааг ажлын хэсэг гаргаж хийх байна. Мөн дулаалгыг нийслэлийн зүгээс хийх бөгөөд тухайн өрх гадна фасад болон үүдний амбаарын хэсгийг заавал хариуцах байна.
Харин НИТХ-ын төлөөлөгч, Зөвлөлийн гишүүн Т.Отгонболд “Нийслэлийн 52 мянган өрхийг ямар шалгуураар сонгосон, алслагдсан дүүргүүдийн өрхийг хэрхэн хамруулах, төсөл хэрэгжсэн эхэлсэн тохиолдолд наад зах нь хийн буюу газ ашиглах, төхөөрөмжийг зөв хэрэглэх тал дээр хэн хяналт тавих вэ. Урамшуулалд хэчнээн төгрөг зарцуулах вэ” гэдгийг тодруулав. Мөн НИТХ-ын төлөөлөгч, Зөвлөлийн гишүүн Б.Дөлгөөн “Айл өрхүүдэд хэдий хугацаанд урамшуулал өгөх, урамшууллыг хэрэглээнд бус дулааны алдагдлыг буруулах зорилгоор хийсэн дулаалгын материал, төхөөрөмжийн үнэд ч юм уу өгөх боломжтой юу. Тэгвэл урамшууллаас илүү эдийн засгийн хэмнэлт хийх боломжтой” хэмээн тодрууллаа.
Нийслэлийн Агаар, орчны бохирдолтой тэмцэх газрын дарга Д.Мөнхбаатар дараах хариултыг өглөө. Тодруулбал, айл өрхүүдийг сонгохдоо бүсээр нь буюу агаарын бохирдол ихтэй хэсгийг сонгосон бөгөөд Нийслэлийн Засаг дарга, дүүрэг, хороодын Засаг дарга болон өрх гэсэн гурвалсан гэрээг байгуулна. Гэрээний дагуу хяналтын ажлын хэсэг ажиллах байна. Ялангуяа хийн түлшний төхөөрөмж суурилуулах ажилд Азийн сантай хамтарч сургалт явуулахаар төлөвлөж байгаа бөгөөд сургалтад зөвхөн өрхөөс гадна онцгой, цагдаа, төрийн албан хаагчид, салбарын мэргэжилтнүүдийг хамруулах байна. Түүнчлэн НИТХ-ын төлөөлөгч, Зөвлөлийн гишүүн О.Зундуйдорж хийн хэрэглээний талаар иргэд дутуу дульмаг мэдлэг, мэдээлэлтэйгээс үүдэн сөрөг ойлголттой буюу айдастай байгаа. Тиймээс энэхүү төслийн хариуцагчид болон салбар мэргэжлийн байгууллагууд иргэдийг зөв мэдээллээр хангах чухал байна гэдгийг онцлон санал хэллээ. Улмаар Зөвлөлийн хуралдаанаар “Нийслэлийн агаарын чанарыг сайжруулах гэр хорооллын өрхөд цахилгаан халаагуур болон бүх төрлийн хийн түлшээр ажилладаг төхөөрөмж суурилуулах, түүний хэрэглээнд үнийн урамшуулал олгох журам”ыг батлах тухай болон бусад асуудлыг НИТХ-ын ээлжит III хуралдаанаар хэлэлцэхийг дэмжлээ.
Шударга мэдээ
Санал өгөөгүй тохиолдолд ногдол ашиг шууд таны данс руу шилжинэ
"Эрдэнэс Тавантолгой" ХК-ийн хувьцааны ногдол ашгийн үлдэгдлийг хэрхэн хүлээн авах тухай санал асуулга явагдаж байна.
1072 хувьцааны ногдол ашгийн үлдэгдлийг ямар хэлбэрээр хүлээн авах тухай санал асуулгад E-Mongolia вэб порталаар нэвтэрч, санал асуулгад идэвхтэй оролцоорой.
Саналыг 2025 оны 04 дүгээр сарын 04-09-ний өдрүүдэд хүлээн авах ба та энэ хугацаанд саналаа өөрчлөх боломжтой!
Харин 2025 оны 4 дүгээр сарын 10–16-ны өдрүүдэд таны өгсөн саналд үндэслэн баталгаажуулалт хийх юм.
Санамж: Санал өгөөгүй тохиолдолд ногдол ашиг шууд таны данс руу шилжинэ.
Шударга мэдээ
IT компаниудад татварын хөнгөлөлт үзүүлэх журмыг Засгийн газарт өргөн барина
Мэдээллийн технологийн салбарыг хөгжүүлэх зорилгоор Монгол Улс IT компаниудад татварын болон татварын бус хөнгөлөлт, дэмжлэг үзүүлэх бодлого баримталж байна.
Энэ хүрээнд УИХ-аас Мэдээллийн технологийн үйлдвэрлэлийг дэмжих тухай хуулийг баталж, салбарын бодлого, шийдвэрийг боловсруулах зорилго бүхий Үндэсний зөвлөл байгуулсан.
Тус зөвлөл дараах гол баримт бичгүүдийг боловсруулаад байна. Мэдээллийн технологийн үйлдвэрлэл, дэвшилтэт технологийг хөгжүүлэх үндэсний стратеги, виртуал бүсийн үйл ажиллагааны журам, татварын болон татварын бус дэмжлэг үзүүлэх журмыг боловсруулжээ.
Стратеги төлөвлөгөөг Үндэсний зөвлөлийн гишүүдийн олонхын саналаар дэмжиж, дөрөвдүгээр сарын 7-ны өдөр баталсан бол виртуал бүсийн үйл ажиллагааны журам, татварын болон татварын бус дэмжлэг үзүүлэх журмыг эцэслэж, Засгийн газарт өргөн барихад бэлэн болоод байна.
Үндэсний зөвлөлийг Ерөнхий сайд Л.Оюун-Эрдэнэ удирдаж байгаа бол дэд даргаар Цахим хөгжил, инновац, харилцаа холбооны сайд Ц.Баатархүү, нарийн бичгийн даргаар Мэдээллийн технологийн үндэсний паркийн захирал О.Золзаяа нар ажиллаж байгаа юм.
Түүнчлэн хувийн хэвшлийн болон их, дээд сургуулиудын төлөөлөл Үндэсний зөвлөлийн бүрэлдэхүүнд багтан ажиллаж буй.
Энэхүү бодлого, дэмжлэг нь Монгол Улсын мэдээллийн технологийн салбарыг тэлж, инновац, өндөр технологийг хөгжүүлэхэд чухал түлхэц болно гэж оролцогчид үзэж байна.
Эх сурвалж: Цахим хөгжил, инновац, харилцаа холбооны яам
