Цаг үе
Төрийн банк "Бизнес эрхлэгчдэд зориулсан сургалтын цахим платформ"-ыг нэвтрүүлээ
Төрийн банк 2021 оноос эхлэн Дундаж давхаргыг дэмжих зорилтын хүрээнд олон нийтэд санхүүгийн боловсрол олгох, бичил жижиг дунд бизнес эрхлэгчдэд санхүүгийн зөвлөгөө мэдээлэл өгөхөөр Инкубатор төвийг байгуулан ажиллаж байгаа билээ.
Тус Инкубатор төв нь бизнес эрхлэгчдэд санхүүгийн асуудлаа зөв тодорхойлох, бизнес санаагаа бодитой байдлаар бататгах, боломжит хэрэглэгчээ танин мэдэх, хөрөнгө оруулалтаа оновчтой удирдаж, эрсдэлээс бизнесээ сэргийлэх сургалтыг тогтмол явуулсаар ирсэн. Төрийн банк Санхүү эдийн засгийн их сургуультай хамтран бизнес эрхлэгчдэд зориулсан сургалтын цар хүрээгээ өргөжүүлэн “АНХАН ШАТ”-ны онлайн сургалтын платформыг 2024 оны 10 дугаар сарын 07-ны өдрөөс эхлэн зах зээлд нэвтрүүллээ.
Сургалтад хамрагдан, хичээлийн агуулгын хүрээнд шалгалт өгч тэнцсэн харилцагчид Өрхийн бизнесийн зээл, Гарааны бизнесийн эргэлтийн хөрөнгийн зээл болон Гарааны бизнесийн хөрөнгө оруулалтын зээлийн бүтээгдэхүүнээс өөрт тохирсон зээлийг судлуулан авах боломжтой болно.
Цахим платформыг хөгжүүлснээр бизнес эрхлэгчдийн цаг завыг хэмнэх ач холбогдолтой төдийгүй Монгол орны өнцөг булан бүрд байх харилцагчид орон зайнаас үл хамааран ижил түвшний мэдлэг олж аван үйл ажиллагаагаа өргөжүүлэх боломжоор хангагдаж байгаагаараа давуу талтай юм. Мөн цаашид Улаанбаатар хот, орон нутагт байгаа харилцагч, зээлдэгч нарын санхүү, бизнес, энтрепренершипийн мэдлэг, чадварыг хөгжүүлэх, сургалтын түвшнээс хамаарч тэдний эрхэлж буй бизнест бодитой дэмжлэг, үр дүн үзүүлэхэд чиглэсэн ахисан түвшний сургалтуудыг үе шаттайгаар зохион байгуулахаар ажиллаж байна.
Энэхүү платформ нь үйл ажиллагаагаа өргөжүүлэн тэлж, санхүүгийн зөвлөгөө мэдээлэл авах хүсэлтэй бүх бизнес эрхлэгчдэд нээлттэй байна. Харилцагч та цахим сургалтад ЭНД дарж хамрагдан, өөрийн бизнесийн онцлогт тохирсон зээлээ шийдвэрлүүлээрэй.
Цаг үе
“Улаанбаатар марафон-2026”-д 23 мянга гаруй хүн бүртгүүлээд байна
“Улаанбаатар марафон 2026” олон улсын гүйлтийг 11 дэх жилдээ Д.Сүхбаатарын талбайд зохион байгуулна.
Тус марафонд гүйх иргэдийг www.ulaanbaatar.marathon.mn цахим хуудсаар тавдугаар сарын 1-ний 17:00 цаг хүртэл бүртгэх юм.
Өнөөдрийн байдлаар 23 мянга гаруй оролцогч гүйхээр бүртгүүлээд байна.
Сүүлийн жилүүдэд гадаад, дотоодын мэргэжлийн болон сонирхогч гүйгчид олноор оролцох болсон. Энэ нь арга хэмжээний цар хүрээ тэлж, оролцогчдын тоо жил бүр нэмэгдэж байгааг харуулж байна.
Марафонд гүйх иргэд насны ангилал болон бэлтгэлийн түвшиндээ тохирсон зайгаа сонгон, тавдугаар сарын 1-ний 17:00 цагаас өмнө бүртгэлээ баталгаажуулаарай.
Цаг үе
ОХУ: Ялалтын баярын парадыг цэргийн техникгүй зохион байгуулна
ОХУ-ын нийслэл Москва хотод тавдугаар сарын 9-нд болох Ялалтын баярын цэргийн парадыг энэ жил цэргийн техникгүй зохион байгуулахаар болсон талаар Кремлийн хэвлэлийн төлөөлөгч Дмитрий Песков мэдэгдлээ.
Тэрбээр уг шийдвэр нь үйл ажиллагааны нөхцөл байдалтай холбоотойг онцолж, аюулгүй байдлын эрсдэлийг бууруулах зорилгоор ийм арга хэмжээ авч байгааг дурдсан байна. Мөн ОХУ-ын Ерөнхийлөгч Владимир Путин өмнө нь Киевийн дэглэмийг террорист үйл ажиллагаагаа идэвхжүүлж байгаа талаар мэдэгдсэнийг иш татжээ.
Ийм нөхцөлд болзошгүй аюул заналыг багасгахын тулд бүх шаардлагатай арга хэмжээг авч буйг Песков тэмдэглэсэн байна. Тэрбээр парад цуцлагдахгүй, харин товчруулсан хэлбэрээр зохион байгуулагдана гэдгийг тодотголоо.
Мөн өнгөрсөн жилийн парад нь ойт жилийн хүрээнд өргөн хүрээтэй зохион байгуулагдсан бол энэ жил ойт жил биш тул цар хүрээ багассан байгааг дурдсан байна.
Цаг үе
Нийслэлийн 2026 оны I ээлжийн цэрэг татлага тавдугаар сарын 1-нд эхэлнэ
2026 оны I ээлжийн цэрэг татлага нийслэлийн хэмжээнд тавдугаар сарын 1-ний өдрөөс эхэлнэ.
Энэ талаар НЗДТГ-ын Цэргийн штабын дарга Г.Ялалт мэдээлэл өглөө.
НЗДТГ-ын Цэргийн штабын дарга Г.Ялалт “Иргэнийг 2026 оны I ээлжийн хугацаат цэргийн албанд татах үйл ажиллагааны бэлтгэлийг хангаж байна. Цэрэг татлагыг тавдугаар сарын 1-3-ны өдрүүдэд нийслэлийн зургаан дүүргийн хэмжээнд тогтоосон байруудад зохион байгуулна. Энэ удаагийн цэрэг татлагын онцлог нь хөдөө орон нутагт зарлан дуудах мэдэгдэл авсан иргэд Улаанбаатар хотод түр оршин суугаа газрынхаа харьяа цэрэг татлагын байруудад очиж, оролцох боломжтой юм. Үүнийг Цэргийн албаны тухай хуулийн 12.7-д заасан байдаг. Иргэд хөдөө, орон нутагт цэрэг татлагад хамрагдаж амжаагүй бол нийслэлд цэрэг татлагын түр товчооны байруудаар хамрагдаж болно. Иргэн цэрэг татлагын товчоонд иргэний үнэмлэх, цэргийн үүрэгтний үнэмлэхээ авч очих ёстой. Ингээд эрүүл мэндийн бүх төрлийн үзлэгт орно. Хэрвээ иргэн цэрэг татлагад хамрагдах боломжгүй бол шалтгаанаа тодорхойлсон баримт бичгээ бүрэн бүрдүүлж ирэх хэрэгтэй. Тухайлбал, ар гэр, дүү нараа асран хамгаалдаг бол хорооныхоо тодорхойлолт, эрүүл мэндийн шалтгаантай бол хамгийн сүүлд эмчид үзүүлсэн зэрэг баримтыг авч очих нь зүйтэй. Мөн гаднын улсад сурч, ажиллаж байгаа бол холбоотой гэрээ, баримт бичгүүдийг хамгийн сүүлийн он сараар нь нотолгоо болгон авчрах хэрэгтэй. Бичиг баримт дутуугаас болж асуудал үүсдэг. Харуулах баримтгүй хүнийг бид нотолж цэргийн албанаас чөлөөлнө гэдэг тун хүндрэлтэй. Иргэд холбогдох баримт, өргөдлөө бүрэн бүрдүүлээд албанаас чөлөөлөх хүсэлтээ өгнө. Бид бичиг баримтад үндэслэн хуулийн дагуу авч үзэн, тухайн иргэнийг тус цэрэг татлагаас чөлөөлөх боломжтой байдаг.
2026 оны I ээлжийн цэрэг татлагад татагдсан иргэд хилийн болон дотоодын цэргийн ангид алба хаана. Энэ төрлийн цэргийн байгууллагад алба хаахад давуу талууд бий. Тухайлбал, хилийн цэрэгт татагдсанаар тухайн иргэн эх орныхоо хамгийн үзэсгэлэнтэй газруудад байрладаг застав, отрядуудад дархан хилээ манах үүрэг хүлээнэ. Харин дотоодын цэргийн анги салбарт цэргийн албаа нэр төртэй хаавал улираах урилгыг алба хаагчдад хүргүүлдэг. Дөрөвдүгээр сарын 30-ны өдөр дотоодын цэрэгт алба хаасан залуус маань халагдана. Тавдугаар сарын 1-ний өдөр хилийн цэрэгт алба хаасан байлдагч нар халагдана. Энэ өдөр албаа сайн хаасан эх орны залуучууд халагдаж, мөн хүсэл эрмэлзэл дүүрэн залуус цэрэгт татагдана” гэлээ.
