Цаг үе
Улаанбаатарт өдөртөө 15 хэм дулаан
Малчид, иргэд, тээвэрчдийн анхааралд: Дөрөвдүгээр сарын 24-нд ихэнх нутгаар дулаарах боловч, 25-нд баруун болон төвийн аймгуудын нутгаар, 26-нд говь болон зүүн аймгуудын нутгаар хүчтэй салхи, шороон шуургатай байхыг анхааруулж байна.
2025 оны дөрөвдүгээр сарын 24-ний 08 цагаас 20 цаг хүртэл:
Хур тунадас: Ихэнх нутгаар солигдмол үүлтэй. Алтай, Хангай, Хөвсгөлийн уулсаар ялимгүй хур тунадас орно. Бусад нутгаар хур тунадас орохгүй.
Салхи: Нутгийн баруун баруун хагаст баруун өмнөөс, зүүн хагаст баруун хойноос секундэд 5-10 метр, нутгийн зарим газраар секундэд 12-14 метр хүрч ширүүснэ.
Агаарын температур: Ихэнх нутгаар дулаарч Дорнод-Дарьгангын тал нутаг, Онон, Улз, Халх голын хөндийгөөр 3-8 хэм, Монгол-Алтай, Хангай, Хөвсгөл, Хэнтийн уулархаг нутаг, Тэрэлж голын хөндийгөөр 9-14 хэм, Их нууруудын хотгор, говийн бүс нутгийн баруун өмнөд хэсгээр 19-24 хэм, бусад нутгаар 13-18 хэм дулаан байна.
УЛААНБААТАР ХОТ ОРЧМООР: Багавтар үүлтэй. Хур тунадас орохгүй. Салхи зүүн өмнөөс секундэд 6-11 метр. Өдөртөө дулаарч 13-15 хэм дулаан байна.
БАГАНУУР ОРЧМООР: Багавтар үүлтэй. Хур тунадас орохгүй. Салхи зүүн өмнөөс секундэд 7-12 метр. Өдөртөө дулаарч 13-15 хэм дулаан байна.
ТЭРЭЛЖ ОРЧМООР: Багавтар үүлтэй. Хур тунадас орохгүй. Салхи зүүн өмнөөс секундэд 6-11 метр. Өдөртөө дулаарч 12-14 хэм дулаан байна.
2025 оны дөрөвдүгээр сарын 25-наас 29-нийг хүртэлх
цаг агаарын урьдчилсан төлөв
Дөрөвдүгээр сарын 25-нд баруун аймгуудын нутгийн хойд хэсэг, төвийн аймгуудын нутгийн зарим газраар, 26-нд төвийн аймгуудын нутгийн зүүн хэсэг, зүүн аймгуудын нутгийн зарим газраар, 27-нд зүүн аймгуудын нутгийн зүүн өмнөд хэсгээр бороо, нойтон цас, цас орж, зөөлөн цасан шуурга шуурна. Салхи 25-нд баруун, төв, говийн аймгуудын нутгийн зарим газраар 26-нд говь, тал, хээрийн нутгаар, 28-нд тал хээрийн нутгаар секундэд 15-17 метр хүрч ширүүсэж, шороон шуурга шуурна. Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Идэр, Тэс голын хөндийгөөр шөнөдөө 8-13 хэм хүйтэн, өдөртөө 3-8 хэм, говийн бүс нутгийн өмнөд хэсгээр шөнөдөө 1-6 хэм, өдөртөө 13-18 хэм, бусад нутгаар шөнөдөө 4 хэмийн хүйтнээс 1 хэм, өдөртөө 8-13 хэм дулаан байна. 27, 28-нд ихэнх нутгаар дулаарна.
Цаг үе
Дамбадаржаагаас Шадивлангийн зуслан чиглэлийн 5.3 км авто замыг шинэчилж байна
Энэ онд нийслэлийн хэмжээнд 36 байршилд 74 км авто замыг засаж, шинэчилнэ. Энэ хүрээнд Сүхбаатар дүүргийн 17 дугаар хороо, Дамбадаржаагийн авто замаас Шадивлангийн зуслан чиглэлийн 5.3 км авто замыг шинэчилж байна.
Зам засварын ажлын талаар нийслэлийн Замын хөгжлийн газрын Засвар арчлалтын хяналтын хэлтсийн дарга О.Энхбаатараас тодрууллаа.
Тэрбээр “Тус авто замын зорчих хэсгийг 8 метр өргөн, хоёр талын явган замыг 2 метр өргөн хийнэ. Мөн авто замын хашлагыг солихоос гадна суурийг цементээр бэхжүүлэх юм. Иргэдийг зусланд гарахаас өмнө буюу зургаадугаар сарын 1-нээс өмнө зорчих хэсгийн хучилтыг хоёр хувааж хийхээр төлөвлөсөн. Харин явган хүн болон бусад ажлыг зургаадугаар сарын 30-наас өмнө дуусгахаар төлөвлөж байна” гэв.
Мөн зуслангийн бүсийн замын хөдөлгөөн эрчимжихээс өмнө бусад замыг засварлах ажил үргэлжилж байна. Тодруулбал, өнгөрсөн долоо хоногт Шаргаморьтын зуслангийн замын нүхэн эвдрэлийг засварласан бол үргэлжлүүлэн Хандгайт, Баянбулаг, Жигжид, Гоодойн ам, Яргайт, Шадивлан, Их тамир зэрэг чиглэлийн замын нөхөн эвдрэлийг засварлана.
Зам хаах мэдээллийг тухай бүрт нь иргэдэд хүргэнэ гэдгийг мөн онцолж байлаа.
Цаг үе
Жонбук мужийн Боловсролын газрын даргыг хахууль авсан хэргээр шалгаж эхэлжээ
БНСУ-ын Жонбук мужийн Цагдаагийн газрын Авлига, эдийн засгийн гэмт хэрэгтэй тэмцэх хэлтсээс тус мужийн Боловсролын газрын дарга Со Гео Сок-ийг хахууль авсан хэргээр эрүүгийн хэрэг үүсгэн шалгаж эхэлжээ.
Тэрээр 2022 оны дөрөвдүгээр сард уг албан тушаалд нэр дэвших үедээ хүүхдээ боловсролын хяналтын мэргэжилтнээр томилуулах нэгэн багшийн хүсэлтийн хариуд хахууль авсан гэж буруутгагдаж байгаа юм. Түүнийг нийт 12 сая воны (30,2 сая төгрөг) хахууль бэлнээр болон дансаар шилжүүлэн авсан болохыг цагдаа нар тогтоогоод байна.
Цагдаагийн байгууллагаас “Бид нотлох баримт цуглуулах болон мөрдөн байцаалтын ажиллагааг эхлүүлэх шатандаа явж байгаа тул хэргийн талаар тодорхой тайлбар өгөх боломжгүй” гэж мэдэгдэв. Тайланд дурдсанаар Боловсролын газрын дарга Сок-д хахууль өгсөн багшийн эцэг, эх “Яагаад амлалтаа биелүүлэхгүй байгаа юм бэ” гэж хэд хэдэн удаа хандаж байсан бөгөөд энэ тухай ярианы бичлэг цагдаагийн байгууллагад очсон гэж таамаглаж байна.
Энэ талаар Боловсролын газрын дарга Сок “Би хэзээ ч авлига авч байгаагүй”, “Энэ бол хорлон гүтгэх кампанит ажил” гэж мэдэгджээ. Мөн тэрээр мэдээлэгчийг олж тогтоох болон “Хилс хэрэгт буруутгасан мэдээлэгчийг шүүхэд өгнө” гэсэн юм.
Гэхдээ мөрдөн байцаалтын явцаас шалтгаалаад ойрын хугацаанд Боловсролын газрын дарга Сок-ийг дуудаж байцаалт авах эсвэл албадан мөрдөн байцаалтад хамруулах магадлалтай байна. Өмнө нь тэрээр Жонбук их сургуулийн ерөнхий захирлаар ажиллаж байхдаа хамт ажилладаг профессороо хүчирхийлсэн хэрэгт сэжиглэгдэж, шүүхээс 5 сая воны торгууль ногдуулж байжээ.
Дээд шүүх хэргийг хэлэлцэх суудлын хуваарилалт хийсэн бөгөөд шүүх хурлыг сунжруулахгүй явуулах төлөвтэй байна. Боловсролын газрын дарга Сок-ийн бүрэн эрхийн хугацаа дуусах дөхөж байгаатай холбогдсон дарамт шахалт нэмэгдсээр байна.
Эх сурвалж: https://www.jmbc.co.kr
Цаг үе
Зорчигчийн галт тэрэгний цагийн хуваарьт өөрчлөлт орлоо
Улаанбаатар Төмөр зам ХНН-ээс 2025 оны дөрөвдүгээр сарын 28-ны өдрөөс эхлэн тавдугаар сарын 28-ны өдрийг дуустал зорчигчийн галт тэрэгний цагийн хуваарьт орсон өөрчлөлтийг танилцууллаа.
Үүнд:
1. Эрдэнэт:
- Улаанбаатар-Эрдэнэт чиглэлийн галт тэрэг Улаанбаатар хотоос дөрөвдүгээр сарын 28-ны өдрөөс эхлэн 18:55 цагт хөдөлж, Эрдэнэт өртөөд 08:30 цагт очно.
- Эрдэнэт-Улаанбаатар чиглэлийн галт тэрэг Эрдэнэт өртөөнөөс дөрөвдүгээр сарын 28-ны өдрөөс эхлэн 17:10 цагт хөдөлж, Улаанбаатар хотод 06:15 цагт ирнэ.
2. Сүхбаатар:
- Улаанбаатар-Сүхбаатар чиглэлийн галт тэрэг дөрөвдүгээр сарын 28-ны өдрөөс эхлэн Улаанбаатар хотоос 09:35, 18:55 цагт хөдөлж, Сүхбаатар өртөөд 18:50, 04:35 цагт очно.
- Сүхбаатар-Улаанбаатар чиглэлийн галт тэрэг дөрөвдүгээр сарын 28-ны өдрөөс эхлэн Сүхбаатар өртөөнөөс 19:56 цагт хөдөлж, Улаанбаатар хотод 06:15 цагт ирнэ.
- Дөрөвдүгээр сарын 29-ны өдрөөс эхлэн Сүхбаатар өртөөнөөс 05:55 цагт хөдөлж, Улаанбаатар хотод 15:20 цагт ирнэ.
3. Дархан:
- Улаанбаатар-Дархан чиглэлийн галт тэрэг Улаанбаатар хотоос 09:35, 18:55 цагт хөдөлж, Дархан өртөөд 16:35, 01:58 цагт очно.
- Дархан-Улаанбаатар чиглэлийн галт тэрэг Дархан өртөөнөөс 08:15, 23:20 цагт хөдөлж, Улаанбаатар хотод 15:20, 06:15 цагт ирнэ.
