Улстөр нийгэм
УИХ-ын Тамгын газрынхан 2020 оны үйл ажиллагааны үр дүнгийн тайлангаа хэлэлцлээ
УИХ-ын Ерөнхий нарийн бичгийн дарга Л.Өлзийсайхан, УИХ-ын Тамгын газрын Тэргүүн дэд дарга Н.Цогтсайхан, Дэд дарга Э.Баттулга нар (2021.03.09-10) УИХ-ын Тамгын газрын газар, хэлтсүүдийн 2020 оны үйл ажиллагааны тайланг хоёр өдрийн турш сонсож, хэлэлцлээ.
УИХ-ын Тамгын газар нь Хууль, эрхзүйн газар, түүний харьяа Эрхзүйн дүн шинжилгээний хэлтэс, Хуралдаан зохион байгуулах хэлтэс, Байнгын хорооны асуудал хариуцсан хэлтэс; Хяналт шалгалт үнэлгээний газар, түүнйи харьяа Хяналт шалгалтын хэлтэс, Төсвийн хяналт, шинжилгээний хэлтэс; Дотоод аудитын алба, Гадаад харилцааны хэлтэс Захиргаа, хүний нөөцийн хэлтэс, Санхүү, хангамж үйлчилгээний хэлтэс, Мэдээллийн технологийн хэлтэс, Хэвлэл мэдээлэл, олон нийттэй харилцах хэлтэс, Парламентын судалгааны хүрээлэн гэсэн бүтэц бүрэлдэхүүнтэйгээр Улсын Их Хуралд мэргэжил аргазүй, техник, зохион байгуулалтын дэмжлэг, туслалцаа үзүүлэх үндсэн чиг үүрэгтэйгээр үйл ажиллагаагаа явуулж байна.
Тайлан хэлэлцэх арга хэмжээнд Газар, хэлтсүүдийн дарга нар 2020 оны үйл ажиллагааны тайлангаа илтгэж, удирдлагууд тайлантай холбогдуулан асуулт асууж, хариулт авснаас гадна цахимаар оролцсон ажилтнууд санал хүсэлтээ илэрхийллээ.
Зарим газар, хэлтсийн тайлангаас үзвэл Хууль, эрхзүйн газрын хувьд өнгөрөгч онд Байнгын, дэд, түр хороо болон нэгдсэн хуралдаанаар 600 хууль, тогтоолын төсөл, 25 тайлан илтгэл, мэдээлэл, хяналт шалгалтын дүнг хэлэлцүүлэх бэлтгэл ажлыг хангаж, нэгдсэн хуралдааныг 63 удаа, Байнгын, дэд, түр хорооны хуралдааныг 226 удаа, Улсын Их Хурлын даргын захирамж, байнгын хорооны тогтоолоор байгуулагдсан 147 ажлын хэсгийн хуралдааныг 303 удаа тус тус зохион байгуулж, мэргэжил, арга зүйн туслалцаа үзүүлж ажилласан байна.
Хуралдаан зохион байгуулах хэлтэс гэхэд 148 боть 26.482 хуудас хууль, тогтоолын хувийн хэрэг, 26 боть, 5051 хуудас хуралдааны тэмдэглэл, 35 боть, 6302 хуудас Байнгын хороодын баримт бичиг, мэдээ мэдээлэл, тайлан танилцуулга, 6 боть 1608 хуудас ажилтнуудын гүйцэтгэлийн төлөвлөгөө тайлан, 13 боть 2318 хуудас батлагдсан хууль тогтоолын эхийг архивын нэгж болгон архивт шилжүүлжээ.
Мэдээллийн технологийн хэлтсийн хувьд цар тахлын нөхцөлд Улсын Их Хурлын чуулганы нэгдсэн хуралдааныг цахимаар явуулах техникийн шийдлийг боловсруулан амжилттай нэвтрүүлсэн. Энэ хүрээнд MyParliament цахим системд онлайн санал хураалтын модулийг шинээр нэмж хөгжүүлж, онлайн хэлэлцүүлгийн программыг албан ёсны эрхтэйгээр ашиглаж байна. Мөн хуулийн төсөл боловсруулах, хэлэлцүүлэх цахим системийг хөгжүүлэн, Улсын Их Хурлын үйл ажиллагаанд нэвтрүүлж, хуулийн төсөл боловсруулах lawmaker.parliament.mn, хуулийн төсөлд санал авах lawforum.parliament.mn гэсэн 2 дэд хэсэгтэйгээр ажиллуулж эхэлсэн талаар тайландаа онцоллоо.
Хэвлэл мэдээлэл, олон нийттэй харилцах хэлтэс нийгмийн сүлжээний шинэ сувгуудыг ашиглах, хөгжүүлэхийг чухалчилж, мэдээ мэдээллийн агуулга, хэлбэр, хүртээмжийг нэмэгдүүлэхийг 2020 оны гол зорилтоо болгон ажилласны зэрэгцээ Монгол Улсын Засгийн газраас баталсан “Монгол бичгийн үндэсний хөтөлбөр-III”-ийг хэрэгжүүлэх хүрээнд хууль, тогтоомжийн эмхэтгэл “Төрийн мэдээлэл”-ийг үндэсний монгол бичгээр хэвлэж эхэлсэн байна.
Тайлангийн хурал газар, хэлтэс, нэгжүүдийн хувьд харилцан бие биенийхээ үйл ажиллагаанд үнэлэлт дүгнэлт өгсөн, нэг нэгнээ сонссон, шинэ санал, санаачилга гаргасан, өнгөрсөн оны алдаа, оноогоо хэлэлцэж, ирэх жилүүдийн зорилго, төлөвлөгөөгөө дэвшүүлж, үйл ажиллагаагаа уялдуулах боломжийг олгосон, үр дүнтэй арга хэмжээ болсныг Тамгын газрын удирдлагууд онцоллоо хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.
Улстөр нийгэм
Бурхан Халдун хайрхны тэнгэрийг тахих төрийн тахилга боллоо
Тахилгад Монгол Улсын Ерөнхийлөгч Ухнаагийн Хүрэлсүх төрийг төлөөлөн оролцлоо. Тахилгын өмнөх орой “Тэнгэр үзэлтний мөнх тэнгэр нэгдсэн хороо” НҮТББ-ын бөө нар лус, галын тахилга, хайрхны тэнгэрийг тахих ёслол үйлдлээ.
Төрийн нэрийн өмнөөс бөө нараар зан үйл хийлгэдэг түүхэн уламжлал байсныг судлаачид Монголын нууц товчооны 272 дугаар зүйл, Жужан, Хятан Улсын тухай түүхэн эх сурвалжуудыг харьцуулан судалж тогтоосон. Иймээс Ерөнхийлөгч У.Хүрэлсүх энэ удаагийн тахилгад бөө нарыг оролцуулах шийдвэрийг өнгөрсөн тавдугаар сард гаргасан юм. Энэ дагуу төрийн тахилгад шилмэл 99 бөө оролцож, тус тусын зан үйлээ үйлдлээ.
Мөн орой Хэнтий, Төв аймгийн лам нар Итгэл, Ганданлажаа, Өлзийхутаг буулгах сан болон Долоон бурхан од тус бүрт тахилгын ном хурлаа.
Тахилгын өдөр Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх төрийн бэлгэдлийг илэрхийлж, хүндэт харуулын цэргүүдээр хамгаалуулан тахилга үйлдэх талбайд хүрэлцэн ирлээ.
Дараа нь Монгол Улсын Төрийн далбаа, Хэнтий, Төв аймгийн туг, Эзэн Богд Чингис хааны хөрөг, Төрийн долоон эрдэнийг тахилын ширээнээ залж байрлууллаа. Төрийн хонжин тэргүүтэй Хүндэт харуулын цэргүүд Бүх цэргийн Их хар сүлд, Өмнө, Өрнө, Умар, Дорнын элч сүлдийг залсны дараа Их сүлдэч зул, арц, хүж асаан хүндэтгэл үзүүллээ.
Ерөнхийлөгч У.Хүрэлсүх, хамаг монголчуудын дээд шүтээн Хэнтий хан, Бурхан Халдун уул бол Эзэн богд Чингис хааны сүр хүч, суу алдрыг тэтгэгч Сүлд тэнгэрийг оршоосон, үеийн үед тахиж, өнө мөнхөд шүтэх зарлигтай хайрхан гэдгийг онцоллоо.
Оройн дээд шүтээн Эзэн Богд Чингис хааны айлтгалтай Бурхан Халдун хайрхны цадиг түүх бол төрт ёс, түүхэн уламжлал, түмэн олны сүсэг бишрэл, төр, шашны эрхэм ёс, байгаль дэлхийгээ шүтэн дээдлэх ардын ухаан, өв соёл, зан заншлын цогц илэрхийлэл болохыг тэмдэглэлээ.
Иймээс Их хааны айлтгал, Их Монгол Улсын өнгөрсөн, одоо, ирээдүй гурван цагийн алтан хэлхээг бататган илэрхийлэх үүднээс Бурхан Халдун уулын хүндэтгэлийн цогцолборыг төрийн тэргүүний зарлигаар шинээр бүтээж, Их Монгол Улс байгуулагдсаны 820 жил, Эзэн Богд Чингис хааны мэндэлсэн морин жил ёслол төгөлдөр нээж байгааг сонордууллаа.
Ерөнхийлөгч, Их хааны суу алдар, үйл хэрэг, билиг сургаалыг эрхэмлэн дээдэлж, даган мөрдөж, түгээн дэлгэрүүлэх нь Их Монгол Улсын гал голомтыг сахин суугаа монголчуудын эрхэм дээд үүрэг гэдгийг хэллээ. Мөн Хэнтий хан хайрхан, Бурхан Халдун уулын шүтээн Сүлд тэнгэр монгол төрийг хүчирхэгжүүлэн, ард олныг энхжүүлэн, ээлийн дээдээ хүртээж, ивээлийн ихээ хайрлаж байхыг сүслэн даатгалаа.
Ерөнхийлөгчийн Тамгын газрын дарга Алтанхуягийн Үйлстөгөлдөр Бурхан Халдун хайрхны тэнгэрт хандсан айлтгалыг дуудан сонсгож, торгон дээр бичсэн эх хувийг нь Хэнтий аймгийн музейд хадгалуулахаар Засаг дарга Дамдинжавын Аюурбуньд хүлээлгэн өглөө.
Төрийн хонжин Бүх цэргийн Их хар сүлдний тайлга эхлэх команд өгөхөд хөгжимд хүндэтгэлийн аялгуу эгшиглэлээ. Их сүлдэч “Их хар сүлдийн өчил” өчих үед тахилгад оролцогсод Их хар сүлдэнд хүндэтгэл үзүүллээ.
Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх идээ шүүсний дээж зэргийг Их хар сүлд болон хайрхны зүг өргөж, Их хар сүлдэнд мөргөлөө.
Ерөнхийлөгч тэнгэрт хүргэх дуут сумыг Хэнтий аймгийн Баян-Адарга сумын харьяат, Сумын мэргэн Жаргалсүрэнгийн Эрхэмбаярт хүлээлгэн өгч, Хэнтий аймгийн Цэнхэрмандал сумын харьяат, Сумын алдарт уяач, мянгат малчин Цэрэнжамцын Барссайханы цагаан /бор/ азаргыг сэтэрлэлээ.
Хүндэт харуулын цэргүүд Бүх цэргийн Их хар сүлд, Өмнө, Өрнө, Умар, Дорнын элч сүлдийг Монгол Улсын Төрийн далбаа, Хэнтий, Төв аймгийн туг, Эзэн Богд Чингис хааны хөрөг, Төрийн долоон эрдэнийг буцаан заллаа. Ерөнхийлөгч, Зэвсэгт хүчний Ерөнхий командлагч У.Хүрэлсүх хүндэтгэлийн гэрэлт цогцолборт мэхийн ёсолж, тэнгэрт дахин хүндэтгэл үзүүлснээр Бурхан Халдун хайрхны тэнгэрийг тайх төрийн тахилга өндөрлөлөө.
Бурхан Халдун уулыг Хиад боржигины өвөг Бодончарын үеэс тахиж, Эзэн Богд Чингис хааны үед Хамаг Монгол, Монголын Эзэнт гүрний Сүлд уул болгон тахиж байсан. 1995 онд Ерөнхийлөгчийн зарлигаар төрийн тахилгатай уул болгосон юм. 2015 онд ХБНГУ-ын Бонн хотноо болсон ЮНЕСКО-гийн Дэлхийн өвийн хорооны чуулганаас “Бурхан Халдун уул, түүнийг хүрээлсэн тахилгат газар нутаг” гэсэн нэрээр Дэлхийн соёлын өвд бүртгэжээ.
Улстөр нийгэм
БНЭУ-ын Гадаад хэргийн сайд С.Жайшанкар газрын тос боловсруулах үйлдвэрийн бүтээн байгуулалтын явцтай танилцлаа
Гадаад харилцааны сайдын урилгаар Монгол Улсад албан ёсны айлчлал хийж буй Бүгд Найрамдах Энэтхэг Улсын Гадаад хэргийн сайд Др. С.Жайшанкар, сайд Б.Батцэцэг, Аж үйлдвэр, эрдэс баялгийн сайд Г.Дамдинням нарын Монгол, Энэтхэгийн албаны хүмүүс энэ сарын 23-нд Энэтхэг Улсын хөнгөлөлттэй зээлээр баригдаж буй Дорноговь аймгийн Сайншанд хот дахь Газрын тосны үйлдвэрийн явцтай танилцлаа.
Төлөөлөгчдийг Сайншанд хотын удирдлага, “Монгол газрын тос боловсруулах үйлдвэр” ТӨХХК-ийн гүйцэтгэх захирал Д.Алтанцэцэг, компанийн инженер техникийн ажилтан, хамт олон найрсгаар угтан авав.
Захирал Д.Алтанцэцэг төслийн явц байдал, цаашид хэрэгжүүлэх ажлын төлөвлөгөөний талаар танилцуулав. Тэрээр үйлдвэрийн тоног төхөөрөмж, эд ангиуд, ган хийцүүд үйлдвэрийн талбайд бууж, угсралтууд хийгдэж байгаа гэж ярив. Мөн үйлвэрийн гол байгууламж болох нэрэх цамхагийн хэсгүүд өнгөрсөн сарын сүүлчээр үйлдвэрийн талбайд бууж, одоо угсарч эхэлсэн байна. Сонирхуулахад цамхагийн өндөр нь 58,4 метр, диаметр нь 3,2 м, жин нь 245 тонн гэжээ. Мөн 520 гаруй км урт түүхий тос дамжуулах хоолойн бүтээн байгуулалт 90 шахам хувьтай яваа аж.
Гадаад хэргийн сайд С.Жайшанкар төслийн явцын талаар мэдээлэлтэй байсан ч өөрөө газар дээр нь ирж танилцсандаа сэтгэл хангалуун байна гээд Монгол, Энэтхэгийн Стратегийн түншлэлийн бодит илэрхийлэл болсон уг төслийг төлөвлөсөн хугацаанд амжилттай хэрэгжүүлэхэд Энэтхэгийн Засгийн газар бүх талын дэмжлэг үзүүлж, хамтран ажиллахаа илэрхийлэв.
Улстөр нийгэм
Трампын мэдэгдлийн дараа Ираны төлөөлөгчид хэлэлцээг түр зогсоов
Швейцарийн Бургенстокт АНУ-ын талтай хэлэлцээ хийж байсан Ираны төлөөлөгчид АНУ-ын Ерөнхийлөгч Дональд Трампын Ираны эсрэг хийсэн заналхийлсэн мэдэгдлийг эсэргүүцэн хэлэлцээг түр зогсоожээ.
Трамп олон нийтийн сүлжээгээр дамжуулан Ираныг Ливан дахь “төлөөлөгчдийн” үйл ажиллагаагаа нэн даруй зогсоох ёстой гэж анхааруулсан байна. Тэрбээр эс тэгвээс АНУ Ираны эсрэг дахин, илүү хүчтэй цохилт өгч болзошгүй гэж мэдэгджээ.
Ираны хэвлэлүүдийн мэдээлснээр, тус улсын төлөөлөгчид АНУ-ын талд эсэргүүцлээ илэрхийлж, уулзалтын танхимыг орхисон байна. Улмаар 80 орчим минут үргэлжилж байсан хэлэлцээг түр завсарлуулж, Ираны тал дотоод зөвлөлдөх уулзалт хийжээ.
Ираны төлөөлөгчдийн тэргүүн, Парламентын дарга Мохаммед Багер Галибаф олон нийтийн сүлжээнд “Тэд үгээ анхааралтай сонгох хэрэгтэй. Манай зэвсэгт хүчин янз бүрийн хэлбэрээр хариу өгөхөд бэлэн байна” гэж бичсэн байна.
Одоогоор талуудын хэлэлцээ цааш үргэлжлэх эсэх нь тодорхойгүй байна.
-
Улстөр нийгэм2021/12/17
Сангийн сайд Б.Жавхлан ОХУ-ын Сангийн сайд А.Г.Силуановтой уулзалт хийлээ
-
Цаг үе2023/04/21
Улаанбаатарт өдөртөө 5 хэм дулаан
-
Шударга мэдээ2019/06/19
Д.Цогтбаатар: Хар тамхи тээвэрлэж байгаад баривчлагдан шалгагдаж байгаа Б.Баттүш...
-
Үзэл бодол2022/10/07
Д.Сумъяабазар: Ногоон байгууламжийг нэмэгдүүлэх, иргэдэд ая тухтай орчин бүрдүүл...