Урлаг спорт
Соёлын дэд сайдаар ахлуулсан Ажлын хэсэг орон нутагт ажиллалаа
Соёлын дэд сайд М.Батбаяраар ахлуулсан Ажлын хэсэг 8 дугаар сарын 2-6-ны өдрүүдэд Архангай, Өвөрхангай, Баянхонгор, Завхан аймагт ажиллалаа.
Соёлын сайдын тушаалаар Архангай, Өвөрхангай, Баянхонгор, Завхан аймгийн нутагт хэрэгжүүлж буй төслийн хөрөнгө оруулалт, барилгын ажлын явцтай танилцах, Засгийн газрын 2021 оны 168 дугаар тогтоолын хэрэгжилтийг хангах чиглэлээр мэргэжил арга зүйн зөвлөгөө өгөх, шинээр батлагдсан хууль тогтоомжийг сурталчлах, түүх, соёлын биет өвийн хадгалалт хамгаалалт, аюулгүй байдалтай танилцах чиг үүрэг бүхий Ажлын хэсгийн бүрэлдэхүүнийг баталсан.
Соёлын дэд сайдаар ахлуулсан Ажлын хэсэг Архангай, Өвөрхангай, Баянхонгор, Завхан аймгийн удирдлагууд, соёл урлагийн байгууллагын төлөөлөлтэй уулзаж санал солилцохын зэрэгцээ аймгийн нийтийн номын сан, музей, соёлын төвүүд, соёлын бүтээн байгуулалтын үйл явцтай танилцлаа.
Архангай, Өвөрхангай, Баянхонгор, Завхан аймгийн соёлын салбарын төлөөлөлтэй уулзах үеэрээ Соёлын дэд сайд М.Батбаяр Соёлын яам байгуулагдсан нэг жилийн хугацаанд хийж, хэрэгжүүлсэн ажил, бүтэц үйл ажиллагаа, салбарын хүний нөөцийн бодлого, стратеги төлөвлөгөө, цаашид авч хэрэгжүүлэх арга хэмжээ, цалин урамшуулал, хууль тогтоомжийн талаар танилцуулсан юм.
Орон нутгийн соёлын байгууллагуудын төлөөлөл уулзалтын үеэр орон нутгийн театрын стандарт, түүний бүтэц, холбогдох журмыг баталгаажуулах, мэргэжлийн боловсон хүчин, соёлын төв болон сумдын орон нутаг судлах танхимын ажилтны орон тоог нэмэгдүүлэх, соёлын өвийн хадгалалт хамгаалалтын төсвийг нэмэгдүүлэх шаардлагатай байгааг Ажлын хэсэгт уламжиллаа.
Мөн Соёлын дэд сайд М.Батбаяр орон нутагт Соёлын хэлтэс байгуулах асуудлаар аймгийн удирдлагуудтай ярилцаж, орон нутгийн соёлын ажилтнуудыг мэргэшүүлэх, дахин сургалтад хамруулах зэрэг тодорхой ажлуудыг хийж эхлүүлэхээр болов.
Үүний дараа Ажлын хэсэг аймгуудын музей болон зарим сүм, хийдийн үйл ажиллагаатай танилцаж, аюулгүй байдлыг цаг алдалгүй хангах, албан хаагчдын ажлын хариуцлагыг нэмэгдүүлэх, сүм, хийд, хувь хүний өмчлөлд байгаа түүх, соёлын дурсгалт зүйлийг соёлын өвийн бүртгэл мэдээллийн санд бүртгүүлж өмчлөлийг баталгаажуулах талаар холбогдох албан тушаалтнуудад үүрэг, чиглэл өгөв.
2021 оны 7 дугаар сарын 15-17 буюу Үндэсний их баяр наадмын амралтын өдрүүдээр баруун аймгуудын музей, сүм, хийдүүдэд гарсан хулгайн гэмт хэргийн талаар орон нутгийн холбогдох цагдаагийн байгууллагын төлөөлөлтэй уулзаж, соёлын өвийн эсрэг гэмт хэрэг, зөрчилтэй тэмцэх чиглэлд хамтын ажиллагааг өргөжүүлэх, аюулгүй байдлыг чангатгах цаашид авч хэрэгжүүлэх арга хэмжээний талаар харилцан санал солилцож нягт хамтран ажиллахаар боллоо.
Соёлын яам нь соёлын өвийн эсрэг гэмт хэрэг, зөрчилтэй тэмцэх ажлыг эрчимжүүлж, энэ төрлийн гэмт хэрэгтэй тэмцэх үндэсний сүлжээ байгуулах, олон нийтийн болон хууль сахиулах байгууллагуудын албан хаагчдын соёлын өвийн талаарх мэдлэг, ойлголтыг нэмэгдүүлэх, түүнд чиглэгдсэн сурталчилгаа, контент бүтээх зэрэг ажлуудыг хэрэгжүүлж эхлүүлээд байна.
Түүнчлэн Соёлын дэд сайд аймгуудад баригдаж буй соёлын бүтээн байгуулалтын ажлын үйл явцтай танилцаж, зураг төсвийн дагуу барилга угсралтын ажлыг хийж гүйцэтгэх шаардлагатайг онцлов.
Өнөөдрийн байдлаар Архангай аймгийн Хөгжимт драмын театрын барилга 75 хувь, Өвөрхангай аймгийн музейн барилга 45 хувь, Баянхонгор аймгийн Хүрээмарал сумын соёлын төвийн барилга 75 хувь, Завхан аймгийн Хөгжимт жүжгийн театрын барилга 80 хувьтай байна гэж Соёлын яамнаас мэдээллээ.
Урлаг спорт
Монголын бүх ард түмний спортын наадмын галт бамбарыг улсын арслан Э.Батмагнай асаалаа
Дөрвөн жилд нэг удаа зохион байгуулдаг Монголын бүх ард түмний спортын зуны XVI наадам Улаанбаатар, Баянхонгор аймагт нэгэн зэрэг болж байна. Өчигдөр тус наадмын нээлтийн ёслол Баянхонгор аймагт болж, Баянхонгор аймгийн Засаг дарга Д.Мөнхсайхан МБАТСН-ыг албан ёсоор нээж, ССАЖЗЯ-ны Төрийн нарийн бичгийн дарга Б.Даваацэрэн мэндчилгээ дэвшүүллээ.
Наадмын тамирчдын тангарагийг жүдо бөхийн залуучуудын дэлхийн аварга, Оюутны дэлхийн аварга, армийн дэлхийн аварга, Үндэсний шигшээ багийн тамирчин, ОУХМ Л.Сосорбарам, таеквондогийн Азийн АШТ-ий хүрэл медальт, Монгол Улсын есөн удаагийн аварга, Д.Чинзориг нар өргөв.
XVI наадмын тугийг пара таеквондогийн “Парис-2024” паралимпын аварга, Хөдөлмөрийн баатар У.Сүрэнжав, боксын Дэлхийн цомын хошой хүрэл медальт, Азийн АШТ-ий хүрэл медальт, ОУХМ Т.Энхтөр, пауэрлифтингийн улсын аварга, бодибилдингийн спортын ОУХМ Н.Нэмэхбаяр, чөлөөт бөхийн улсын аварга, Азийн АШТ-ий мөнгөн медальт, ОУХМ Э.Бямбадорж нар өргөн мандуулав.
Харин тус наадмын галт бамбарыг үндэсний бөхийн улсын арслан, чөлөөт бөхийн Армийн дэлхийн аварга, Азийн АШТ-ий хүрэл медальт, ОУХМ Э.Батмагнай асаалаа. Тэрбээр хоёр жилийн өмнө Монголын хүүхдийн спортын VII их наадмын галт бамбарыг Хөдөлмөрийн баатар, гавьяат тамирчин М.Уранцэцэгийн хамтаар асааж байв.
Монголын бүх ард түмний спортын ХVI наадам спортын 28 төрөлд, 163 жин, зайд, 879 багц медалийн төлөө 21 аймаг, 9 дүүргийн 3146 тамирчин өрсөлдөж байна.
Урлаг спорт
ABU GENERAL ASSEMBLY 2025: Спортын салбар хорооны уулзалт, хэлэлцүүлгүүд эхэллээ
Эхний хэлэлцүүлэг “Үндэсний болон соёлын өвийг хамгаалахад спортын хэвлэл мэдээллийн гүйцэтгэх үүрэг” сэдвийн хүрээнд боллоо. Тус хэлэлцүүлэгт МҮОНТ-ийн “MNB Спорт” сувгийн захирал О. Ууганбаяр, БНСУ-ын Үндэсний Олон Нийтийн Телевизийн Спортын төлөвлөлт, продюсерын багийн дэд дарга Нам Сан Вон, Ази, Номхон далайн өргөн нэвтрүүлгийн холбооны ерөнхий нарийн бичгийн дарга Ахмед Надим нарын олон орны хэвлэл мэдээлэл болон спортын байгууллагуудын удирдлагууд, төлөөлөгчид оролцсон юм.
Хэлэлцүүлгийг Турк улсын үндэсний өргөн нэвтрүүлгийн байгууллагын Спортын газрын захирал (TRT) Эмре Ботан Күмэт удирдан явуулсан байна. Оролцогч орнуудаас БНХАУ, БНСУ, Япон, БНАСАУ, Малайз, Шри Ланк, Индонези, Вьетнам зэрэг орнуудаас тухайн салбарын мэргэжлийн төлөөлөгчид олноор ирж оролцлоо.
Монголын Үндэсний Спортын Хорооны ерөнхийлөгч Ц.Магалжав эхний илтгэлийг тавьж манай улсын үндэсний спортын тухай хууль, өнөөгийн нөхцөл байдал, олон улсад танигдсан байдал, хөгжлийн чиг хандлага зэргийг танилцуулсан юм. Мөн сурын харваа, хурдан морины уралдаан, бөхийн барилдаан эртний уламжлалт спортын төрлүүдийн түүхэн цаг хугацааны өөрчлөлт, өв соёлыг танилцуулсан юм.
Мөн эрийн гурван наадмын спортын төрлүүдээс гадна шагайн харваа, мөсний шагай, мөсний харваа, тэмээн уралдаан, тэмцээн поло, тулам булаалдах тэмцээн гээд бусад олон төрлүүд байдгийг ч онцолсон юм. Түүнчлэн үндэсний бөхийн спорт дээр тулгуурлаж хөгжүүлсэн чөлөөт бөх, жүдо бөхийн спортын төрлүүдээр тив дэлхий, олимпын наадмуудад олон амжилт гаргасаар ирснийг үндэсний спортын түүх уламжлалтайгаа уялдуулан танилцуулав. Мөн дэлхийн монголчуудын наадмыг энэ жил Бельги улсын Брюссель хотноо анх удаа зохион байгуулахын зэрэгцээ дэлхийн олон орон дахь монголчууд үндэсний спортын төрлүүдээр дамжуулан өв соёлоо түгээн дэлгэрүүлж байдгийг чухалчиллаа. Тэрээр энэ бүх үйл ажиллагаа болон түүнийг таниулан сурталчлахад хэвлэл мэдээллийн байгууллагуудын үүрэг ямар чухал нөлөөтэй тал өөрийн байр сууриа мөн илэрхийлсэн. Ингэхдээ энэхүү үйл ажиллагаануудыг даган тус салбарт орж ирэх реклам, зар сурталчилгаануудын орлого, ивээн тэтгэгч байгууллагуудын оролцоо нэмэгдэж, маш олон боломжууд гарч ирдэг гэдгийг онцоллоо.
БНСУ-ын Үндэсний Олон Нийтийн Телевизийн Спортын төлөвлөлт, продюсерын багийн дэд дарга Нам Сан Вон өөрийн илтгэлдээ үндэсний ширым бөхийн спортоороо дамжуулж орчин үеийн хүүхэд залууст уламжлалт өв соёлоо хэрхэн түгээж байгаа талаараа хуваалцлаа. Мөн уламжлалт хэв маягийг орчин үеийн хэв загварт шилжүүлж телевизийн шоу хэлбэрээр эх орондоо болон олон улсад хэрхэн гаргаж байгаа туршлагаа танилцууллаа. Тэд олны анхаарлыг татах гадаад төрх, бие бялдрын хөгжилтэй залуучуудыг тус шоунд оролцуулж олны анхаарлыг татдаг байна. Үүний нөлөөгөөр тамирчид нь олон байгууллагуудын нүүр царай болж, реклам сурталчилгаа, загварын ертөнцөд орж, тус спортоор таниулан сурталчилж чаддаг байна.
Мөн дотооддоо спортын олон төрлийн тэмцээнүүдийн үеэр бүжигчид, хөгжөөн дэмжигч охид зэргийн нөлөөгөөр үзэгчдийн идэвх, оролцоог нэмэгдүүлэх гээд энтертайнмент олон арга хэлбэрүүдийг ашигладаг байна. Илтгэлийнхээ дүгнэлт хэсэгт тэр уламжлалыг тэр хэвээр нь хадгалах боломж маш бага учраас орчин цагийн хөгжлийн чиг хандлагатай нэгтгэн уялдуулж, цааш хөгжүүлэн авч явах нь чухал юм.
Шри Ланкийн Үндэсний Телевизийн ерөнхий захирал Маножа Надишана Амарасинхэ энэ үеэр тавьсан илтгэлдээ мөн үндэсний спортын төрлүүдийнхээ талаар онцоллоо. Волейболын спортын үндэсний хэлбэр болон үндэсний тулааны спортын төрлүүдээ танилцуулсан юм. Монголын үндэсний бөхтэй адил тус улсын үндэсний спортын төрлүүд ч өв соёлыг нь ихээхэн тээдэг, соёлын чухал өвүүд болдог байна. Үүнийг спортын тэмцээн уралдаануудын шууд дамжуулалт, нэвтрүүлгүүдээрээ түгээн дэлгэрүүлж байж л цар хүрээг нэмэгдүүлж, хадгалан авч үлдэж чадна гэдгийг тэр чухалчиллаа.
Хурал, хэлэлцүүлгүүд өнөөдөр мөн спортын хэд хэдэн чухал сэдвүүдээр үргэлжлэх хуваарьтай байна.
Урлаг спорт
"Саньяа 2026" Азийн VI элсний наадамд оролцох урилгыг МҮОХ-нд ирүүллээ
БНХАУ-ын Хайнан мужийн Саньяа хотноо Азийн VI элсний наадмыг 2026 оны дөрөвдүгээр сарын 22-30-ны өдрүүдэд 14 спортын 15 дэд төрөлд зохион байгуулахаар шийдвэрлэж нийт 63 багц медалийн төлөө АОЗ-ийн гишүүн 45 ҮОХ-ны баг тамирчид өрсөлдөх боллоо.
Азийн олимпын зөвлөлийн ивээл дор 2 жил тутамд зохион байгуулагддаг энэхүү наадам нь анх 2008 онд Индонезийн Бали аралд анх удаа зохион байгуулагдаж улмаар Оман (2010), БНХАУ-ын Хайнан (2012), Тайландын Пукет (2014), Вьетнамын Дананг (2016) хотуудад тус тус болсон юм.
Цар тахал болон тодорхой шалтгааны улмаас 10 жил завсарласан энэхүү наадам цар хүрээгээ улам тэлж 2026 онд Саньяа хотод зохион байгуулагдахаар боллоо гэж Монголын Үндэсний Олимпын Хорооноос мэдээллээ.
-
Улстөр нийгэм2020/12/04
УИХ-ын чуулган өнөөдөр цахимаар чуулна
-
Улстөр нийгэм2024/12/03
Шүүхийн ерөнхий зөвлөлийн шүүгч бус гишүүний сонгон шалгаруулалтын томилгооны со...
-
Цаг үе2024/04/30
Төрийн банк хувьцаа эзэмшигчдийн ээлжит хурлаа хийлээ
-
Улстөр нийгэм2023/11/08
УИХ: Байнгын хороод өнөөдөр хуралдана