Цаг үе
Нийслэлийн Газар зохион байгуулалтын ерөнхий төлөвлөгөөг шинэчлэн боловсруулж байна
НЗДТГ, Нийслэлийн Газар зохион байгуулалтын албанаас Нийслэлийн газар зохион байгуулалтын ерөнхий төлөвлөгөөг боловсруулан, дүүрэг, нийслэлийн иргэдийн төлөөлөгчдийн хурлын төлөөлөгчдөд танилцуулж байгаа. Арваннэгдүгээр сарын 16-наас эхэлсэн танилцуулга, зөвлөгөөн өнөөдөр Хан-Уул дүүргийн газар зохион байгуулалтын ерөнхий төлөвлөгөөг хэлэлцсэнээр үргэлжиллээ.
Анх 2001 онд Газар зохион байгуулалтын ерөнхий төлөвлөгөөг баталж байсан бөгөөд 2012 онд тус ерөнхий төлөвлөгөөнд тодотгол хийж байжээ. Ийнхүү анхны ерөнхий төлөвлөгөөнөөс хойш 19 жилийн дараа шинэчлэн боловсруулахаар ажиллаж байна. Газар зохион байгуулалтын ерөнхий төлөвлөгөөг хөдөө аж ахуйн газар, хот тосгон болон суурин эдэлбэр газар, зам, шугам сүлжээний газар, ойн сан бүхий газар, усан сан бүхий газар, улсын тусгай хэрэгцээний газар хэмээн ангилан төлөвлөлтөө хийжээ.
Нийслэлийн Газар зохион байгуулалтын албаны дарга А.Энхманлай “Нийслэл Улаанбаатар хотын газрын харилцааны бодлого, төлөвлөлт, өнөөгийн нөхцөл байдал, цаашдын чиг хандлагын талаар НИТХ, ДИТХ-д сонгогдсон төлөөлөгчдөд танилцуулах зөвлөгөөнийг хийж байна. Ирэх жилүүдэд газрын харилцаатай холбоотой ямар ажил хийх вэ, хэрхэн зөв төлөвлөх вэ гэдэг асуудлаар зөвлөлдөж байгаа. Хийх ажлаа зөв төлөвлөснөөр төлөвлөгөөт ажлаа хэрэгжүүлэх нөхцөл нь бүрдэнэ. Тиймээс иргэдийн сонгосон албан ёсны төлөөлөгчдөөр нь дамжуулж саналыг нь тусгуулах юм. 2022 оны нэгдүгээр сарын 1-нээс эхлэн шинэ ерөнхий төлөвлөгөөгөөр газар болон хот байгуулалтын асуудлууд шийдэгдэнэ” хэмээж байв.
Түүнчлэн тус зөвлөгөөнд оролцож буй Газар зохион байгуулалт, төлөвлөлтийн мэргэшсэн инженер Ц.Ханбүргэд “Энэ удаагийн газар зохион байгуулалтын ерөнхий төлөвлөгөө нь Улаанбаатар хотын 2040 он хүртэлх хөгжлийн ерөнхий төлөвлөгөөтэй нэг цаг хугацаанд хийгдэж байгаагаараа онцлогтой. Цаашид Улаанбаатар хотын газрын бодлого ирээдүйн 16 жилд хэрхэх вэ гэдэг нь тодорхой болж, бодлогын үндсэн бичиг баримт нь шинэчлэгдэн батлагдаж байна. Шинжлэх ухааны бүхий л шинэ арга зүй, ололт амжилтуудыг ашиглан, тус төлөвлөгөөг боловсруулж байгаа бөгөөд тун шинэлэг ерөнхий төлөвлөгөө болж байгаа. 2018 онд Монгол Улсын газар зохион байгуулалтын ерөнхий төлөвлөгөө шинэчлэгдэн батлагдсан. Үүнтэй холбоотойгоор нийслэл болон аймгуудын газар зохион байгуулалтын ерөнхий төлөвлөгөөг тус төлөвлөгөөтэй уялдуулан боловсруулсан. Газар зохион байгуулалтын ерөнхий төлөвлөгөөг 2020 оноос эхлэн хийж эхэлсэн бөгөөд 2021 ондоо багтаан НИТХ-д өргөн барихаар бэлтгээд байна. Улаанбаатар хотын тохиромжтой байдлын үнэлгээгээр хотын иргэдэд өмчлүүлэх газар болон иргэдэд олгох газрын нөөц багассан. Дагуул, хаяа хотуудыг хөгжүүлбэл иргэдэд өмчлүүлэх, шинээр олгох газрын нөөц нэмэгдэнэ. Монгол Улсад хүчин төгөлдөр мөрдөж буй стандартуудаас давсан буюу өндөр нягтралтай төвийн дүүргүүдэд газар шинээр олгохгүй. Харин нийгмийн дэд бүтэц буюу сургууль, цэцэрлэгийн нягтралыг сайжруулах, зам, шугам сүлжээг нэмэгдүүлэх чиглэлээр газар олголтыг хийнэ. Бусад зориулалтын барилга, байгууламжид газар олголт хийхийг хориглох байдлаар тус төлөвлөгөөг батлах гэж байна” гэв.
Өнгөрсөн жилүүдэд жилд дунджаар 100 орчим гарааш буулган, газрыг чөлөөлдөг байсан бол 2021 онд нийслэлд мянга орчим гарааш буулган, газрыг чөлөөлсөн. Ирэх онд үлдсэн бүх гарааш буюу 5700 орчим зөвшөөрөлгүй барьсан тоосгон гарааш, чингэлгийг буулгахаар төлөвлөжээ. Гараашнууд голдуу сургууль, цэцэрлэг, эмнэлгийг тойрсон байршлуудад хашаа даган байрлаж, иргэдийн эрүүл, аюулгүй орчинд амьдрах нөхцөлийг алдагдуулдаг. Тиймээс эдгээр гараашийг бүгдийг нь буулган, тохижилт, ногоон байгууламж, авто зогсоол бий болгон, явган зорчилтыг нэмэгдүүлэх үүднээс орц, гарцыг нээх ажлыг ирэх оноос эрчимжүүлэх аж.
Цаг үе
Японы хөрөнгө оруулагчдыг урилаа
Япон Улсын Токио хотноо “Инвест Монголиа: Эрчим хүч ба санхүү” хөрөнгө оруулалтын форум боллоо. Уг форумыг Эрчим хүчний сайд Б.Найдалаа нээж үг хэлэв.
Тэрбээр “Япон Улс нь манай орны шилжилтийн хүндрэлтэй цаг үед тухайлбал, 1995-2008 онд “ДЦС-4” ТӨХК-ийн I, II ээлжийн шинэчлэлийн төслүүд, мөн 2014-2018 онд станцын үр ашгийг дээшлүүлэх төслийг амжилттай хэрэгжүүлснээр Монгол Улсын эрчим хүчний салбарт бодитой хувь нэмэр оруулж, тухайн үеийн эрчим хүчний хямралыг даван туулахад үнэтэй дэмжлэг үзүүлснийг онцлон тэмдэглэж байна.
Энэ ташрамд, Монгол Улсын эрчим хүчний салбарын хөгжил, шинэчлэл, эрчим хүчний шилжилтийн хүндрэлтэй цаг үед цагаа олсон, тууштай дэмжлэг үзүүлж ирсэн Япон Улсын Засгийн газар болон хамтран ажилласан байгууллагуудад чин сэтгэлийн талархал илэрхийлье.
Хоёр орны Засгийн газар болон олон улсын хамтын ажиллагааны байгууллагуудын хүрээнд олон төсөл, хөтөлбөр амжилттай хэрэгжиж байна. Цаашид ч хоёр улсын эрчим хүчний салбарын хамтын ажиллагаа улам өргөжиж, тогтвортой хөгжил, ногоон шилжилтийн зорилтыг хэрэгжүүлэх агуулгаар баяжигдаж байна.
Монгол Улсын Засгийн газраас эрчим хүчний салбарыг тогтвортой хөгжүүлэх хүрээнд сэргээгдэх эрчим хүчийг зохистой харьцаагаар нэмэгдүүлэх, эх үүсвэрийн бүтцийг төрөлжүүлэх, цэвэр технологид үе шаттай шилжих дунд, урт хугацааны зорилт тавин ажиллаж байна.
Дэлхий нийтээр эрчим хүчний шилжилт эрчимжиж, уур амьсгалын өөрчлөлтийн эсрэг бодит алхмуудыг авч хэрэгжүүлж байгаа энэ цаг үед Монгол Улс сэргээгдэх эрчим хүчний нөөцдөө тулгуурлан өсөн нэмэгдэж буй эрчим хүчний дотоод хэрэглээгээ хангаж, цаашид бүс нутгийн цэвэр эрчим хүчний чухал тоглогч болох зорилтыг дэвшүүлэн ажиллаж байна.
Манай улс жилд 300 гаруй хоног нартай, салхины өндөр нөөцтэй бүсүүдтэй бөгөөд энэ нь нар, салхины эрчим хүчийг хөгжүүлэх, ногоон устөрөгч, ногоон аммиак зэрэг ирээдүйн эрчим хүчний шинэ бүтээгдэхүүн үйлдвэрлэх, экспортлох боломж бүрдүүлэх ач холбогдолтой юм.
Мөн бид хөрөнгө оруулагчдын эрх ашгийг хамгаалах, засаглалыг сайжруулах, ил тод, тогтвортой эрх зүйн орчныг бүрдүүлэхэд онцгой анхаарч байгаа бөгөөд Засгийн газрын зүгээс зөвшөөрөл авах шат дамжлагыг бууруулах чөлөөлье санаачилгыг хэрэгжүүлж, ажил хэрэг болгож эхлээд байна.
Япон Улс нь дэвшилтэт технологи, өндөр стандарт, найдвартай түншлэлээрээ дэлхийд тэргүүлэгч орнуудын нэг билээ. Монгол Улсын Засгийн газар дараах чиглэлүүдээр Япон Улсын хөрөнгө оруулагчидтай хамтран ажиллах сонирхолтой байна.
Үүнд: Сэргээгдэх эрчим хүчний томоохон төслүүд (нар, салхи, усан цэнэгт цахилгаан станцууд), эрчим хүч хадгалах батарей хуримтлуур, ногоон устөрөгч, аммиакийн үйлдвэрлэл экспорт, эрчим хүч дамжуулах, түгээх сүлжээний өргөтгөл, шинэчлэл, эрчим хүчний үр ашиг, дэвшилтэт технологи зэрэг чиглэл багтаж байна.
Энэхүү уулзалт нь хоёр улсын эдийн засаг, хөрөнгө оруулалтын хамтын ажиллагааг шинэ шатанд гаргах, бодит төслүүдийг эхлүүлэх чухал эхлэл болно гэдэгт итгэлтэй байна. Та бүхнийг Монгол Улсад хөрөнгө оруулж, харилцан ашигтай, урт хугацааны тогтвортой түншлэлийг хамтдаа хөгжүүлэхийг урьж байна. Өнөөдрийн уулзалт бодит төслүүдийг эхлүүлэх чухал үе шат болно гэдэгт итгэлтэй байна” хэмээн өгүүллээ.
Япон Улсын Гадаад худалдааг дэмжих агентлаг болон Монгол Улсаас Япон Улсад суугаа Элчин сайдын яам, Хөрөнгө оруулалт, худалдааны газраас хамтран зохион байгуулсан энэхүү форумд хоёр орны 300 орчим хөрөнгө оруулагч оролцов гэж Эрчим хүчний яамнаас мэдээллээ.
Цаг үе
Тусгай хамгаалалттай газар нутгийн тухай хуулийн шинэчилсэн найруулгын төслийг орон нутагт хэлэлцүүлж байна
Цаг үе
“МА” компанийн менежер Т.Д нарын 6 хүнийг яллагдагчаар татан, мөрдөн шалгах ажиллагааг явуулж байна
Авлигатай тэмцэх газрын Мөрдөн шалгах хэлтэст нийтийн албан тушаалтан С.Б, П.Я, иргэн Т.Д нарт холбогдох Эрүүгийн хуулийн тусгай ангийн 22.1.1-д заасан эрүүгийн хэрэгт мөрдөн шалгах ажиллагаа явуулж байна.
Тээврийн цагдаагийн албаны Замын цагдаагийн газрын Гэрээт цагдаагийн хэлтсийн дарга С.Б нь Сонгинохайрхан дүүргийн 20 дугаар хорооны нутаг дэвсгэрт авто зам сэтлэх болон авто замын орц, гарц шинээр гаргах зорилгоор замын байгууламжийг эвдэж гэмтээсэн “МА” компанийн гаргасан зөрчлийг илрүүлсэн Замын цагдаагийн хэлтсийн чиглэлийн ахлах зохицуулагч П.Я руу “МА” компанийн менежер Т.Д-ын гуйлтаар, утсаар холбогдон “Наадхаа зохицуулаад нэг удаа чимээгүй болгочих” гэх хууль бус үүрэг чиглэлийг өгч, уг зөрчлийг эрх бүхий албан тушаалтнаар шалгуулахгүй байх ашиг сонирхлын үүднээс албан тушаалын байдлаа урвуулан ашиглаж, “МА” компанид Зөрчлийн тухай хуулиар арга хэмжээ авахуулалгүй давуу байдал бий болгосон гэмт хэрэгт хатгагчаар хамтран оролцсон байна.
Түүнчлэн яллагдагч С.Б нь үргэлжилсэн үйлдлээр Гэрээт цагдаагийн хэлтэст ашиглагдах ёстой 1 тонн түлшийг өөрийн танил “АА” компанийн захирал Г.Ж-д худалдан борлуулж, багын найз болох “ЭОК” компанийн захирал Д.А-гийн эзэмшлийн дансаар 3,2 сая төгрөгийг шилжүүлэн авч өөртөө санхүүгийн давуу байдал бий болгосон нь мөрдөн шалгах ажиллагааны явцад тогтоогджээ.
Авлигатай тэмцэх газрын Мөрдөн шалгах хэлтсээс дээрх хэрэгт 6 хүнийг яллагдагчаар татан, мөрдөн шалгах ажиллагааг явуулж байгаа бөгөөд “Shinebayar Altai” нэрээр олон нийтийн сүлжээнд бичсэн “АТГ-т нөлөөлж авлигын хэргийг хаалгасан” гэх мэдээлэл нь огт үндэслэлгүй, илт худал ташаа болохыг үүгээр мэдэгдэж байна гэж АТГ-аас мэдээллээ.
