Гар урлаачдын бүтээлийг олон улсын зах зээлд гаргана

“Соёлын бүтээлч сар” аяны хүрээнд нийслэл болон хөдөө орон нутгийн гар урлаачдын 2000 гаруй бүтээлийг дэлгэсэн арга хэмжээ болж байна. 

Соёлын яам, “Нийслэлийн Жижиг, дунд үйлдвэр, үйлчилгээг дэмжих төв” НӨҮГ-тай   хамтран “Уламжлалт гар урлалыг дэмжих хөгжүүлэх боломж, шийдэл-2022” цогц арга хэмжээг зохиож байгаа юм. Энэ хүрээнд гар урлаачдыг чадавхжуулах сургалт хэлэлцүүлэг мөн болно. Соёлын сайд Ч.Номин энэ талаар  “Энэ удаагийн цогц арга хэмжээний хүрээнд гар урлаачдынхаа бүтээлийг бүтээгдэхүүн болгох, үйлдвэржилтэд шилжихэд хэрхэн дэмжлэг үзүүлэх вэ гэдэгт түлхүү чиглэсэн. Өнөөдрийн арга хэмжээнд ирсэн бүтээлүүдээс хөгжүүлэлт, бойжуулалт хийж олон улсын зах зээлд гаргахад анхаарч байна. Гар урлаачдын бүтээл бүтээгдэхүүн болж эдийн засгийн эргэлтэд орсноор олон улсын зах зээлд гарах боломж бүрдэх юм. Цаашлаад 2023-2024 оныг аялал жуулчлал, Монголд зочлох жил болгож байгаа. Тэгэхээр Монголыг зорих аялагч, жуулчдын тоо нэмэгдэнэ. Энэ утгаараа монгол ахуй соёлоо харуулсан бүтээгдэхүүн үйлчилгээгээ дэмжих нь чухал” гэв.