Санхүүгийн зохицуулах хорооноос Монголын хөрөнгийн зах зээлийг олон улсын санхүүгийн төвүүдтэй холбох, хөрөнгө оруулалтын шинэ боломжуудыг нээх, хамтын ажиллагааг өргөжүүлэх зорилгоор зохион байгуулж буй “Mongolia’s Capital Market Connectivity 2025” арга хэмжээ Улаанбаатар хотноо анх удаа болж байна. 

Энэ удаагийн арга хэмжээнд дэлхийн хөрөнгийн зах зээлийн 30 гаруй хувийг удирддаг Ази тивийн 20 гаруй улсын 100 гаруй мэргэжилтэн, Азийн үнэт цаасны форумын гишүүн холбоод, нэр хүндтэй хөрөнгийн бирж, үнэт цаасны компаниудын төлөөлөл оролцож байна. Арга хэмжээний нээлтэд УИХ-ын дэд дарга, УИХ-ын гишүүн Х.Булгантуяа, УИХ-ын гишүүн Л.Соронзонболд нар оролцож Санхүүгийн зохицуулах хорооны дарга Т.Жамбаажамц нээж үг хэллээ.    

Санхүүгийн зохицуулах хорооны дарга Т.Жамбаажамц “Энэхүү арга хэмжээ өмнө нь Хонконг, Сингапур, БНСУ зэрэг олон улсын санхүүгийн төвүүдэд амжилттай зохион байгуулагдаж, харилцан ойлголцол, түншлэлийн чухал платформ болж төлөвшсөн. Өнөөдөр энэхүү санаачлагыг эх орондоо, Улаанбаатар хотноо дахин зохион байгуулж буйд бид баяртай байна. Энэхүү цуврал арга хэмжээ нь Монголын хөрөнгийн зах зээлийн хөгжил, хөрөнгө оруулалтын боломжуудыг дотоодын болон гадаадын хөрөнгө оруулагчдад танилцуулах, олон улсын санхүүгийн хамтын нийгэмлэгтэй илүү өргөн хүрээнд холбох Санхүүгийн зохицуулах хорооны бодлогын нэг хэсэг юм. Сүүлийн жилүүдэд бид зах зээлийн дэд бүтцийг бэхжүүлэх, зохицуулалтын орчныг сайжруулах, ил тод байдал, хөрөнгө оруулагчийн эрх ашгийг хамгаалахад томоохон ахиц дэвшил гаргасан. Гэхдээ энэ амжилтаа улам бататгаж, илүү гүнзгий уялдаа холбоог бий болгохын тулд харилцан итгэлцлийг бэхжүүлж, хил дамнасан хөрөнгө оруулалт, хамтын ажиллагаанд шинэ гарцуудыг хамтдаа эрэлхийлэх шаардлагатай хэвээр байна. Өнөөдрийн арга хэмжээ нь зөвхөн мэдлэг туршлагаа хуваалцах талбар төдийгүй, Монголын хөрөнгийн зах зээл ба олон улсын санхүүгийн төвүүдийн хооронд бодит хамтын ажиллагааг өргөжүүлэх, эдийн засгийн тогтвортой өсөлтөд хувь нэмэр оруулах чухал суурь болно гэдэгт итгэлтэй байна” гэдгийг онцоллоо.

Арга хэмжээний үеэр Монголын хөрөнгийн зах зээлийн өнөөгийн байдал, ирээдүйн чиг хандлагын талаар танилцуулсны зэрэгцээ уул уурхайн олон улсын хөрөнгө оруулалт, хөрөнгө босгох стратеги, банкны үйл ажиллагаа ба санхүүжилтийн шинэ гарцууд, Ази, Европ болон бусад бүс нутгийн хөрөнгө оруулагчидтай хил дамнасан хамтын ажиллагааны талаар хэлэлцүүлэг өрнүүлж байна. “Mongolia’s Capital Market Connectivity 2025” нь Монгол Улсын хөрөнгийн зах зээлийн ил тод, хүртээмжтэй, олон улстай уялдсан өсөлтийг дэмжих замаар эдийн засгийн тогтвортой хөгжилд бодит хувь нэмэр оруулах зорилгоор зохион байгуулагдаж байна.