Бидэнтэй нэгдэх

Цаг үе

Хэмнэлттэй хэрэглээ-Ногоон орон сууц

Огноо:

5 сар 23 өдөр.өмнө

,

Төмөр бетон каркастай, блокон дүүргэлттэй энэхүү орон сууцны  талбайн хэмжээ нь 35-57 ам.метр бүхий 2-3 өрөөтэйгөөр зохион байгуулжээ. Гал тогоо тусдаа байрлалтай бөгөөд байгалийн болон бусад өрөөний гэрэл нэвтрэх зохион байгуулалттай.  Тухайн өрх орон сууцаа худалдан аваад дотор зохион байгуулалтаа өөрчилж болох шийдэлтэйгээр барьжээ.

Барилгын  материалууд хүлэмжийн хийг бууруулсан,  битүүмжлэл сайтай, дулаан алдагдал багатай, сэргээгдэх эрчим хүчийг ашигласан нарны зайн хавтанг суурилуулжээ. Галд тэсвэртэй, ус нэвтрүүлдэггүй, хаягдал шилийг дахин боловсруулсан хөөмөл шилэн дулаалгын материалыг ашиглаж байна.

Ингэснээр байгалийн эрчим хүчийг ашиглаж,  дулааны хэрэглээг хангах аж.   Эрчим хүчийг хэмнэсэн төхөөрөмжийг суурилуулж, байгалийн гэрлийг ашиглах нөхцөлийг бүрдүүлсэн байна. Барилгын дулаан алдагдлыг бууруулахын тулд гурван давхар шиллэгээтэй, Low-e түрхлэгтэй нарны  хэт ягаан болон улаан туяанаас хамгаалсан шилтэй цонх суурилуулжээ.  Цэвэр модон паркетин шал, керамик плита гээд заслын материалууд ч дулаан хэмнэнэ.

Орон сууцны гаднах орчин ногоон байгууламжтай, явган хүний болон дугуйн замтай. Хүүхэд болон иргэдийн амарч, зугаалах талбайтай. Тусгай хэрэгцээт иргэдэд зориулсан төлөвлөлтийг мөн тусгаж өгсөн байна.  Оршин суугчид хатуу хог хаягдлаа барилга дотроо хаях тусдаа байгууламжтай бол нойтон хог хаягдлыг гадна талд нь хаяхаар ангилжээ. Усаа хэмнэх автомат тохируулгатай  төхөөрөмж суурилуулсан байна. Борооны ус хуримтлуулж ногоон байгууламж, хүлэмждээ ашиглах гэнэ.

Ойролцоох 500 метр радиуст сургууль, цэцэрлэг, эмнэлэг, цагдаа, бизнес инкубатр төвтэй. Судалгаагаар дээрх радиуст цэцэрлэг байгаагүй аж. Тиймээс чөлөөлсөн газраасаа тусгайлан авч, цэцэрлэг байгуулахаар Нийслэлийн боловсролын газарт шилжүүлжээ.  Өнөөдөр цэцэрлэгийн барилгын ажил бүрэн дууссан бөгөөд энэ оны дөрөвдүгээр улиралд ашиглалтад орох юм байна. Дээрх төлөвлөлтийг хийхдээ тухайн хорооны иргэдээр хэлэлцүүлэг явуулж, аюулгүй орчныг бүрдүүлэхэд анхаарчээ.

Энэхүү орон сууц ашиглалтад орсноор  иргэдэд сар бүрийн хэрэглээнээсээ эрчим хүч, дулаан, усны зардлыг хэмнэнэ. Судалгаагаар эрчим хүч, дулаан, усны хэрэглээг 20 хувиар хэмнэх тооцоо гарчээ.

Энэ бүхнийг өрхийн орлогод нийцсэн төлөвлөлтэй орон сууц гэж олон улсад нэрлэдэг байна. Нийгмийн зорилтот хэсэгт чиглэсэн, хямд өртөгтэй орон сууцыг “Өрхийн орлогод нийцсэн орон сууц” гэдэг  бидний нийтлэг ойлголт ташаа байсныг энэхүү ногоон орон сууц харуулж байна.

 

 

Энэ бол Гэр хорооллыг хөгжүүлэх ногоон орон сууц төсөл. Улаанбаатар хотыг нэг төвт хотоос олон төвт хот болгон хөгжүүлэх зорилт  тавьсан. Энэ хүрээнд АХБ-ны санхүүжилтээр зургаан дэд төвийг хөгжүүлэхээр төлөвлөн ажиллаж байгаа юм. Өнөөдрийн байдлаар зургаан дэд төвөөс Баянхошуу, Сэлбэ дэд төвийн дэд бүтцийн ажил бүрэн хийгдэж, орон сууцжуулах барилгын ажил явагдаж байна. Дамбадаржаа, Толгойт, Шархад, Дэнжийн 1000 дэд төвийн ажил үргэлжлэн явагдаж байна.

Ногоон орон сууц төслийн хүрээнд нийтдээ 5000 айлын орон сууцыг 2027 он хүртэл барьж дуусгах юм. Дэд бүтэц нь бэлэн болсон  талбар дээр Ногоон орон сууц төслийг хэрэгжүүлж эхлээд байна.

АХБ-ны  санхүүжилтээр НЗДТГ-ын  хэрэгжүүлж буй Улаанбаатар хотын ногоон орон сууц төсөл нь Баянхошуу болон Шархад төвүүдэд нийт 800 өрхийн ногоон орон сууцны барилга угсралтын ажлыг 2023–2025 онуудад хийж гүйцэтгэнэ.

Баянхошуу, Шархад дэд төвд эхний 220 айлын  ногоон орон сууц 2024 оны дөрөвдүгээр улиралд ашиглалтад орно

Өнөөдөр барилгын бүтээн байгуулалт нийслэлийн Баянхошуу, Шархад дэд төвд өрнөж байна. Эхний ээлжийн тус бүр 110 айлын, дөрвөөс таван давхар орон сууц энэ оны дөрөвдүгээр улиралд ашиглалтад орно.

Баянхошуу дэд төвд Ногоон орон сууц төслийн хүрээнд таван  га газрын чөлөөлөлт хийж, дэд бүтцийн ажлыг бүрэн хийжээ. Газрыг орон сууцаар солих хүрээнд  чөлөөлсөн айлуудыг “Буянт-Ухаа2” хороололд орон сууцад оруулсан байна.

Эдүгээ чөлөөлсөн газарт 13 блок 462 өрх айлын орон сууцны барилга угсралтын ажил 37 хувьтай  хэрэгжиж байгаа юм. Үүнээс эхний дөрвөн блок, зоорьтой дөрвөн давхар орон сууцыг 2024 оны арванхоёрдугаар сард ашиглалтад оруулна. Мөн гурван блок орон сууцны барилгын ажил үргэлжилж байгаа бөгөөд дахин таван блок орон сууцны барилгын гүйцэтгэгчийг сонгон шалгаруулаад байгаа аж. Дээрх орон сууцыг барьж дуусгаад газраа орон сууцаар солих өрхүүдийг оруулах гэнэ.  Дараагийн 20га талбайд баригдах 4188 айлын орон сууцыг барихад иргэд газраа чөлөөлж, Ногоон орон сууцад  шилжих юм.

Шархад дэд төвд Гэр хорооллыг хөгжүүлэх, хөрөнгө оруулалтыг дэмжих  төслийн хүрээнд  5.6 га газрыг чөлөөлж, айлууд газраа орон сууцаар сольжээ.  Үүний 3.8 га-д нь  есөн блок 338 айлын орон сууц, нэг блок үйлчилгээний төвийн барилга  барьж байгаа аж. Үүнээс 110 айлын орон  сууцны барилгыг энэ оны арванхоёрдугаар сард ашиглалтад оруулах юм.

Шархад дэд төвд барилга угсралтын ажлын гүйцэтгэгчийн нэг “Нутгийн буян” компанийн төслийн менежер Д.Доржхорол “Манай компани Шархад дэд төвийг түшиглэн баригдаж байгаа Ногоон орон сууц төслийн хүрээнд нийт дөрвөн блок 110 айлын орон сууцны барилга угсралтын ажлыг гүйцэтгэж байна. Барилга угсралтын ажлын гүйцэтгэл 65 хувьтай явж байна. Барилгаа 2024 оны арванхоёрдугаар сард багтаан ашиглалтад хүлээлгэн өгнө.

Энэ барилгын технологийн онцлог нь нарны эх үүсвэртэй. Энэ нь 100 хувь эрчим хүчээр хангадаг барилгын нийт 20 хувийг дотоод эх үүсвэрээрээ хангах нөхцөл бүрдэж байгаа юм. Ингэснээр эрчим хүчний хэмнэлт гарч, хүлэмжийн хийн ялгарлыг бууруулж байна.

Мөн фасадны материал нь дахин боловсруулсан хөөмөл шилэн дулаалгатай. Байгаль дээр хаягдал болж байгаа материалыг дахин ашигласнаар экологийн хувьд зөв зохицуулалттай байгаа юм. Үйлчилгээний төв болон цонхоо сүүлийн үеийн технологи бүхий шилээр шиллэсэн нь барилгын дулаан алдагдлаас сэргийлнэ. Ингэснээр дулааны зардал багасаж, иргэдэд ээлтэй нөхцөлийг бүрдүүлж байна.

Орон сууцны айлд ашиглалтын зардал байнга гардаг. Үүнийг сар, жилээр тооцвол өндөр тоо гарна. Харин энэ ногоон орон сууцны тухайд эрчим хүч, дулаан, усны хэмнэлттэй төлөвлөж барьснаас тухайн айлын ашиглалтын зардал буурна. Тиймээс амьжиргаанд нь нөлөөлж, сарын орлогоос тодорхой хэмжээний хэмнэлт гарч  орлогод нийцсэн орон сууц гэж болж байна” гэлээ.

 

 

П.Сүрэнжав: Гэр хорооллын 8000 яндан, 5000 нүхэн жорлон байхгүй болно

Улаанбаатар хотын “Орлогод нийцсэн ногоон орон сууц” төслийн ерөнхий инженер П.Сүрэнжавтай ярилцлаа.

-Энэ төсөл хэдэн оноос эхэлж хэрэгжсэн бэ?

-Манай төсөл 2020 оноос эхэлж, зураг төсөл, ТЭЗҮ-ээ боловсруулсан.  2023 онд хэлэлцүүлэг хийж, мөн оны наймдугаар сараас барилгын ажлаа эхлүүлсэн. Уур амьсгалын ногоон сан, АХБ-наас санхүүжилттэй. Тиймээс Уур амьсгалын ногоон сангаас тавигддаг шаардлагын дагуу ажлаа гүйцэтгэж байна.

-Ногоон барилга барихад тодорхой дүрэм, журам байдаг уу?

-Бид олон улсын нормаар, Монголын стандартаа баримтлан гүйцэтгэж байна.  Ногоон барилгын техник, дүрмийг боловсруулсан. Бид ногоон барилгын дүрэм боловсруулж, саналаа БХБЯ-нд хүргүүлээд байна. Ногоон барилгын EDGE сертификат олгох сургалтыг  дөрөв дэх жилдээ зохион байгуулж байна. 2021 онд 51 хүнд сургалт зохион байгуулснаас гурван эксперт төрсөн. Одоогийн байдлаар нийтдээ 143 хүнд сургалт зохион байгуулж байна. Цаашдаа ч сургалтаа зохион байгуулна. Төслийн барилга угсралтаар сард 3500 ажлын байр бий болж байна.

-Хэмнэлтийг хэрхэн тооцож гаргасан бэ?

-Улаанбаатар хотын орон сууцны нэг жилд  нэг ам.метрт  235 квт/жил ашигладаг. Үүнийг бид 150квт/жил болгоно. Энэ хүрээнд бүх тооцооллыг хийсэн. Гэр хороололд амины орон сууцад ашигладаг жилийн хэрэглээ нь 368 квт/жил байдаг. Үүнийг бид 50 хувь хэмнэх шаардлагатай.

5000 айлын ногоон орон сууц бариад нэг жил ашиглахад 12 сая квт-ын эрчим хүч хэмнэнэ. Нэг жилийн хугацаанд 5.4 сая литр ус, 30 сая квт дулаан тус тус хэмнэнэ.

Олон улсад эко технологийг амины орон сууц барихад ашигладаг. Манай улсын хэмжээнд нийтийн орон сууцад эко технологийг ашиглаж байгаа анхны төсөл. Баянхошуу, Шархад дэд төв ногоон орон сууцны анхны загвар. Энэ нь чанарын өндөр шаардлага хангасан байх юм.

-Ногоон орон сууц төслөөр агаарын бохирдол ямар хэмжээтэй буурах вэ?

-5000 айлын ногоон орон сууц баригдсанаар  нэг жил 142 746 тонн хүлэмжийн хийн ялгарлыг бууруулна. Гэр хорооллын 8000 яндан, 5000 нүхэн жорлон байхгүй болно.

-Хотхоны төлөвлөлт ногоон байгууламжид суурилжээ. Амьдралын чанар хэр сайжрах вэ?

-Амьдралын чанар талаасаа 120 мянган ам.метр ногоон байгууламж,  16.4 км унадаг дугуйн зам, 39.2 км явган зам талбай, 3800 авто зогсоол бий болох юм. Иргэдийг орон сууцжуулаад амьдрах орчныг сайжруулах юм.

 

 

Эх сурвалж: Монголын үнэн сонин №036/24615/

Уншсан:417
Дэлгэрэнгүй унших
АНХААРУУЛГА: УИХ-ын 2024 оны ээлжит сонгуулийн хуулийн холбогдох заалтын хүрээнд тус сайтын сэтгэгдэл хэсгийг түр хугацаанд хаасан болно.

Цаг үе

БНСУ-д хөдөлмөрийн гэрээний ажилтан илгээсээр байна

Огноо:

2 өдрийн өмнө

,

Монгол Улсын Засгийн газар Гэр бүл, хөдөлмөр, нийгмийн хамгааллын яам болон БНСУ-ын Засгийн газар Хөдөлмөр эрхлэлт, хөдөлмөрийн яам хооронд байгуулсан гэрээ, хэлэлцээрийн дагуу хөдөлмөрийн гэрээт ажилтан илгээх үйл ажиллагааг ХХҮЕГ тасралтгүй зохион байгуулан ажиллаж байна.

БНСУ нь 17 улс орноос гадаад ажилтан хүлээн авдаг бөгөөд Монгол Улс 2004 оноос өнөөг хүртэл жил бүр ажиллах хүсэлтэй иргэдийг бүртгэх, илгээх үйл ажиллагааг зохион байгуулдаг Засгийн газрын хэрэгжүүлэгч агентлаг Цорын ганц Төрийн байгууллага юм.

 БНСУ-ын хөдөлмөрийн хөлсний 2024 онд мөрдөгдөж буй хэмжээ цалингийн доод  2,060,740 вон байна.

Өнгөрсөн 2024 онд 722 хүн илгээсэн байна. Хөдөлмөрийн биржийн ажил хайгчаар байршсан иргэдэд улирал тутам ажлын санал ирж, сар бүрийн тогтсон өдөр илгээсээр байна.

Өнөөдөр буюу 2025 оны 04 сарын 02-ны өдөр аж үйлдвэрийн салбарт 22 ажилтан ажиллахаар тус улсыг зорилоо.

Мөн 04 дүгээр сарын 08-нд тогтвортой 13 ажилтан, ХАА, газар тариалан 2 ажилтан, Үйлчилгээ 2 салбарт 5, Барилга 1 ажилтан тус тус илгээхээр бэлтгэл ажил хийгдэж байна.

Мөн барилгын салбарт илгээгдэх иргэн хувийн шалтгаанаар явах боломжгүй гэх хариу өгөөд байгаа аж.

Сүүлийн үед БНСУ-аас ажлын санал ирсний дараа иргэдийн өөрсдийн хариуцлагагүй байдлаас шалтгаангүйгээр хойшлуулах, явахгүй гэх мэт шалтгаан ихээр гарч байгаа тул БНСУ-ын ажил олгогч тухайн ажилтныг 17 улсын ажил хайгч олон дундаас сонгож, тухайн улсдаа татвар төлж, бичиг баримтыг бүрдүүлэн 6 сар орчим хүлээсний дараа хүлээн авах, цаг хугацаа, санхүүгийн тодорхой хохирол амсах эрсдэлтэй байдал удаа дараа үүсгэж байна.

Иймд манай улсын ажил хайгч иргэдийг олноор сонгохгүй байх эрсдлийг үүсгэж байгаа тул ажлын санал ирсэн иргэдийг дээрх асуудал үүсгэхгүй байхыг сануулж байна.

Дэлгэрэнгүй унших

Цаг үе

ХӨСҮТ: Улаанбурхан өвчний батлагдсан тохиолдол 253 болжээ

Огноо:

2 өдрийн өмнө

,

Өнөөдөр буюу 2025 оны 4 дүгээр сарын 03-ны байдлаар нийт улаанбурхан өвчний лабораториор батлагдсан 253, эмнэлэгт хэвтэн эмчлүүлж байгаа 116, гэрээр 18, эдгэрсэн 119, сэжигтэй тохиолдол нь 100, Хавьтал 7220  байгаа аж.
 
Улаанбурхан өвчин нь халдварлалт өндөртэй ч вакцинаар сэргийлэгдэх боломжтой халдварт өвчин юм. Улаанбурхан өвчний тохиолдлууд ихэвчлэн Ерөнхий боловсролын сургуульд голомтлон гарч байгаатай холбоотой хамт сурдаг, ажиллаж байгаа хүүхэд, иргэд халдвараас сэргийлэх үүднээс улаанбурханы эсрэг вакцинд хамрагдан өөрийгөө болон бусдыг улаанбурхан өвчнөөс хамгаалах боломжтой юм.
 
Эрүүл мэндийнхээ төлөө иргэн бүр хариуцлагатай байж, халдвараас сэргийлцгээе.
 
Дэлгэрэнгүй унших

Цаг үе

Авлигатай тэмцэх газрын даргыг улируулан томилуулах тухай саналыг дэмжив

Огноо:

2 өдрийн өмнө

,

Улсын Их Хурлын Хууль зүйн байнгын хорооны 2025 оны дөрөвдүгээр сарын 02-ны өдрийн хуралдаанд Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын даргыг улируулан томилуулах тухай саналыг хэлэлцэн шийдвэрлэлээ. Улсын Их Хурлын гишүүн, Засгийн газрын гишүүн, Монгол Улсын сайд, Засгийн газрын Хэрэг эрхлэх газрын дарга Н.Учрал Ерөнхий сайдын саналыг танилцууллаа.

Авлигатай тэмцэх тухай хуулийн 21 дүгээр зүйлийн 21.1, 21.4-т заасныг тус тус үндэслэн Авлигатай тэмцэх газрын даргаар Зандраагийн Дашдавааг улируулан томилуулахаар саналаа ирүүлжээ. З.Дашдавааг Монгол Улсын Их Хурлын 2019 оны 37 дугаар тогтоолоор Авлигатай тэмцэх газрын даргаар томилсон бөгөөд бүрэн эрхийнхээ хугацаанд хуульд заасан чиг үүргээ хариуцлагатай, шударгаар, үр дүнтэй хэрэгжүүлэн ажилласан хэмээн танилцууллаа.

З.Дашдаваа нь 1974 онд Хэнтий аймгийн Өндөрхаан хотод төрсөн. 51 настай, яс үндэс халх, эрэгтэй. Дээд боловсролтой, хуульч мэргэжилтэй, хууль зүйн ухааны доктор, Монгол Улсын гавьяат хуульч болохыг Н.Учрал сайд танилцуулав. Тэрбээр 1995 оноос 2019 оныг хүртэл цагдаагийн байгууллагад хэрэг бүртгэгч эрүүгийн төлөөлөгчөөс эхлээд Цагдаагийн ерөнхий газрын Дотоод хяналт шалгалт, аюулгүй байдлын хэлтэс, тасгийн дарга, хэлтсийн дарга, дэд даргаар дэвшин ажиллаж улмаар 2019 онд Авлигатай тэмцэх газрын даргаар томилогдсон байна. Тэргүүн комиссар З.Дашдаваа нь цагдаагийн байгууллагад 24 жил, Авлигатай тэмцэх газарт зургаа дахь жилдээ, хууль сахиулах байгууллагад 30 дахь жилдээ ажиллаж байгаа аж.

Үргэлжлүүлэн З.Дашдаваагийн томилогдон ажилласан хугацааны үйл ажиллагааны талаар дэлгэрэнгүй танилцуулав. Өнгөрсөн хугацаанд төрийн өндөр албан тушаалтнууд холбогдсон, улсын аюулгүй байдал, эдийн засагт сөрөг үр дагавар бүхий олон их наяд төгрөгөөр хэмжигдэх хохиролтой авлигын хэргүүдийг богино хугацаанд шалган тогтоох ажлыг удирдан, хууль сахиулах байгууллагуудтай хамтран хянан шийдвэрлэсэн байна. Мөн олон улсын байгууллагуудын хамтын ажиллагааны хүрээнд Ази-Номхон далайн орнуудын хууль сахиулах байгууллагуудын сүлжээ байгуулах эхлэлийг тавьж, хөрөнгө буцаах байгууллага хоорондын авлигын эсрэг сүлжээний харилцаа хамтын ажиллагааг улам бүр өргөжүүлэн батжуулахад үнэтэй хувь нэмрээ оруулсан гэв. Гадаад улсын ижил чиг үүрэг бүхий байгууллага болон олон улсын байгууллагатай хамтран ажиллаж, гадаад улсад байгаа гэмт хэрэг үйлдэж олсон хөрөнгө орлогыг битүүмжлэх, хураан авах, хөрөнгө буцаан авах үйл ажиллагааны хүрээнд 2021-2024 онд нийт 13.9 сая ам.долларын үнэ бүхий хулгайлагдсан хөрөнгийг улс орондоо буцаан авчирч, улсын орлого болгосон байна. Мөн хуулийн дагуу ХАСХОМ гаргагч нийтийн албан тушаалтан өөрийн болон гэр бүлийн гишүүдийн татвар ногдох орлогоо үнэн зөв мэдүүлээгүй нөхцөл байдлыг шалган 2023 онд 8.3 тэрбум төгрөгийн зөрчил илрүүлж, 637 сая төгрөг, 2024 онд 2.1 тэрбум төгрөгийн зөрчилд 136.4 сая төгрөгийн нөхөн татвар, торгууль, алданги ногдуулж барагдуулсан юм байна.

Авлигын эсрэг олон нийтийг соён гэгээрүүлэх урьдчилан сэргийлэх чиглэлээр хүүхэд залуучуудад шударга ёсны үнэ цэн, үнэт зүйлийг ойлгуулах, хүмүүжил дадлын бий болгоход туслах, авлигыг үл тэвчих үзэл санааг түгээн дэлгэрүүлэх үйл ажиллагааг өргөн хүрээнд тодорхой бүлгийн онцлогийг харгалзан зохион байгуулсан нь зохих үр дүнд хүрч үнэлгээгээр хүүхэд залуучуудын шударга байдлын түвшин 0.8 пунктээр нэмэгдсэн үзүүлэлттэй байгааг Н.Учрал сайд онцолсон юм. З.Дашдаваа нь улс төр, бизнесийн бүлэглэлийн нөлөөллөөс ангид, хууль шударга, ёсны зарчмыг дээдэлж, хүний эрхийг хангаж, хуулиар хүлээсэн чиг үүргээ чин шударгаар нэр төртэй биелүүлж ирснийг онцлон Авлигын эсрэг хуулийн 21 дүгээр зүйлийн 21.4-т заасныг баримтлан Монгол Улсын Ерөнхий сайд Авлигатай тэмцэх газрын даргаар албан тушаалд улируулан томилуулах саналтай байгаа гэв.

Н.Учрал сайдын дээрх танилцуулга болон хэлэлцэж буй асуудалтай холбогдуулан Улсын Их Хурлын гишүүн Ц.Сандаг-Очир, Г.Уянгахишиг, Ж.Алдаржавхлан, Ч.Ундрам, Д.Цогтбаатар нар асуулт асууж, хариулт авсан юм. Мөн Улсын Их Хурлын гишүүн П.Сайнзориг, Д.Ганбат, Г.Уянгахишиг, Б.Энхбаяр, М.Нарантуяа-Нара, Ч.Ундрам нар үг хэлэв.

Авлигатай тэмцэх нь бүх нийтийн үйл хэрэг бөгөөд үүнд Авлигатай тэмцэх газар бүхий л үйл ажиллагааг нэгтгэн, энэ төрлийн гэмт хэргийг таслан зогсоож, илрүүлж, хариуцлага тооцох ажлыг гүйцэтгэдэг онцлогтойг гишүүд тодотгон тэмдэглээд, цаашид бүх нийтийн соён гэгээрүүлэх, авлигыг үл тэвчих хандлагыг түгээн дэлгэрүүлэх чиглэлээр илүү эрчимтэй ажиллахыг хүссэн юм. Түүнчлэн Авлигын төсөөллийн индексийг сайжруулах чиглэлд анхаарах, шаардлагатай бол санал хүсэлтээ Улсын Их Хурал, Хууль зүйн байнгын хороонд нээлттэй ирүүлж, түүнийг нь дэмжин ажиллахаа илэрхийлж байв. Г.Уянгахишиг гишүүн, Авлигатай тэмцэх газрын даргын үйл ажиллагааны үнэлгээг бүрэн эрхийнх нь хугацаагаар тодорхойлдог үнэлгээ, шалгууртай байх нь зүйтэй хэмээсэн бол Д.Ганбат гишүүн З.Дашдаваа даргын авлигатай тэмцэх эрмэлзлэл, үйл ажиллагааг үнэлж, дэмжиж байгаагаа илэрхийлсэн. Төрийн өмчийн компаниудад авлигын гол асуудлууд үүсдэг бөгөөд үүнийг хянахад бэрх болж байгаа талаарх З.Дашдаваа даргын үгэнд анхаарал хандуулахыг Б.Энхбаяр гишүүн онцлоод, аливаа улсын авлигын эсрэг тэмцэл нь улс төрөөс, Засгийн газраас, улс төрчдийн манлайллаас ихээхэн хамаардаг гэв.

Ингээд санал хураалт явуулахад хуралдаанд оролцсон Улсын Их Хурлын 18 гишүүний 16 нь Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын даргыг улируулан томилуулах тухай саналыг дэмжив. Иймд энэ талаарх санал, дүгнэлтээ чуулганы нэгдсэн хуралдаанд танилцуулахаар боллоо.

Дэлгэрэнгүй унших

Санал болгох