Шударга мэдээ
Соёлын сайд Ч.Номин утга зохиол, ном хэвлэлийн салбарынхантай уулзлаа
Соёлын сайд Ч.Номин өчигдөр утга зохиол, ном хэвлэлийн салбарын төлөөллүүдтэй уулзлаа. Уулзалтад, хүүхдийн зохиолч, утга зохиол шүүмжлэгч, уран зохиолын орчуулагч зэрэг утга зохиол, ном хэвлэлийн салбарын төлөөллүүд оролцов.
Статистик: Соёлын яамнаас гаргасан Соёлын бүтээлч үйлдвэрлэлийн суурь судалгаанд дурдсанаар 1133 зохиолч, 46 хэвлэлийн газар, 300 хэвлэлийн үйлдвэр, 365 номын сан, 238 номын дэлгүүр худалдаа, 2 цахим номын худалдаа үйл ажиллагаа явуулж 2020 онд 124.5 тэрбум төгрөгийн орлого олжээ.
“Алсын хараа 2050 – Монгол Улсын урт хугацааны хөгжлийн бодлого”-ын тэргүүнд Төрт ёсны уламжлал, түүх, соёлын дурсгал, утга зохиол, урлагийн бүтээлээр үндэсний бахархал төлөвшүүлж, эх оронч үзэл, эв нэгдлийг нягтруулна гэж заасан байдаг. Энэ хүрээнд Соёлын яам утга зохиол, ном хэвлэлийн салбарын статистик, тоо баримтыг нэгтгэсэн бөгөөд салбарын төрийн бодлогыг бүрэн хэмжээнд тодорхойлохын тулд салбарынхантай уулзалт зохион байгуулж байгаа юм.
Уулзалтын эхэнд, Соёлын сайд Ч.Номин “Өнгөрсөн онд Соёлын яам соёлын салбарын иж бүрэн судалгааг хийж дуусгасан. Энэ хүрээнд өв соёлдоо тулгуурласан 12 салбар, 98 чиглэлээр салбарын хүрээг тодорхойлж, салбар бүрд тохирсон Төрийн бодлого гаргаж байгаа. Кино урлаг, Дүрслэх урлагийн салбарын бодлогууд гарч, салбарын хэмжээнд хууль тогтоомжийн шинэчлэл, эрх зүйн таатай орчин бүрдэж байна. Үүн шиг салбар бүрийнхэнтэй уулзалт зохион байгуулж, бодлогоо нэгтгэхийг зорьж байна. Энэ хүрээнд өмнө нь утга зохиолын салбарынхантай уулзаж байсан. Энэ удаад илүү тодорхой зорилготой ажиллахаар энэ удаагийн уулзалтыг зохион байгуулж байна” гээд салбарынхантай ярилцлаа.
МУСГЗ, Чингис хаан одонт, зохиолч яруу найрагч Г.Мэнд-Ооёо уран зохиол бол дуу, театр, кино гээд олон салбарын анхдагч нь хэдий ч төрөөс сүүлийн 30 жилийн хугацаанд энэ салбарыг орхигдуулсан тул хур асуудал үүссэн гэлээ. Тухайлбал, XX зууны бидний түүхийг бүхлээр нь агуулж үлдсэн маш их өв, дурсамжийг агуулж байгаа бүтээлүүдийг төрөөс хэрхэх нь тодорхойгүй, утга зохиолын үндэсний өвийг хамгаалах орон зайгүй болсон зэрэг томоохон асуудлаас эхлээд үндэсний уран зохиолыг гадаадад өрсөлдүүлэх боломж хязгаарлагдмал, утга зохиолын фондгүй, утга зохиолын мэргэжлийн орчуулагч цөөрч байгаа зэрэг олон асуудал байгааг хэллээ.
Үүний адилаар утга зохиол, ном хэвлэлийн салбарт шийдвэрлэх хэрэгтэй олон асуудал байгааг бусад зохиолч, орчуулагч нар хэлсэн бөгөөд урт хугацааны турш үүссэн асуудлыг шийдвэрлэхийн тулд ойрмогхон уулзаж ярилцаж, энэ салбарт төрөөс баримтлах бодлогыг маш тодорхой болгох хэрэгтэй гэдэгтэй санал нэгдсэн юм.
Уулзалтын төгсгөлд, Соёлын сайд Ч.Номин утга зохиол, ном хэвлэлийн салбарт баримтлах төрийн бодлогыг тодорхой болгохын тулд салбарын төлөөллүүдийг оролцуулсан ажлын хэсэг гаргаж, баримт бичиг боловсруулах ажлыг эхлүүлэхээр болов.
Уулзалтад, МУСГЗ, Чингис хаан одонт, зохиолч яруу найрагч Г.Мэнд-Ооёо, “Суут нууц” номын зохиогч Д. Дамдинжав, “Мөрөөдлийн байшин” номын зохиогч Б.Ганчимэг, “Тэнгэрт өлгөөтэй бяслаг” номын зохиогч О.Сундуй, “Араг үүрсэн хавар” номын зохиогч Н.Минжинсайхан, “Цагаан бороо” номын зохиогч Б.Номинчимэд, “Энэ цагийн шүүмж” шүүмж судлалын 3 боть гаргасан доктор Д.Цэвээндорж, “Современные монгольские рассказы”, “Орчин үеийн оросын үргэлжилсэн зохиол” номын орчуулагч О.Чинбаяр нарын төлөөлөл оролцов гэж Соёлын яамнаас мэдээллээ.
Шударга мэдээ
Ерөнхий сайд Г.Занданшатар Монголын Ахмадын холбооны удирдлагуудтай уулзлаа
Монгол Улсын Ерөнхий сайд Г.Занданшатар Монголын Ахмадын холбооны ерөнхийлөгч Ц.Сүхбаатар болон тус холбооны удирдлагуудыг хүлээн авч уулзлаа. Уулзалтын эхэнд тус холбооны Ерөнхийлөгч Ц.Сүхбаатар ахмад настнуудын тэтгэврийг нэмэгдүүлэх, зээлийн хүүг бууруулах, хугацааг уртасгах, орон сууцны хөнгөлөлт, чөлөөлөлтөд хамруулах талаар ахмад настнуудын тавьж буй шаардлагыг уламжилж, зарим асуудлыг шийдвэрлэх боломжийн талаар саналаа хэллээ.
Тухайлбал, ахмад настнуудын тэтгэврийг инфляцын түвшинтэй уялдуулан нэмэгдүүлэхээр хуульчилсан. Гэхдээ 6 хувиар нэмэгдүүлэхэд өндөр тэтгэвэртэй ахмадуудын тэтгэвэр 200-300 мянган төгрөг, бага тэтгэвэртэй ахмадуудынх 40-60 мянган төгрөгөөр нэмэгдэхээр байгаа. Ийм зөрүү гарч байгаа тул бага тэтгэвэртэй ахмадуудын тэтгэврийг илүү нэмэгдүүлж болох юм. Мөн “Ахмадын орон сууц” хөтөлбөрийг үргэлжлүүлэн хэрэгжүүлэх, хүүхдийн тооноос шалтгаалан тэтгэврийн хэмжээг тогтоох асуудлыг эргэн харах шаардлагатай байна гэлээ. Ахмад настны тухай хуулийн зарим заалтын хэрэгжилтийг хангаж ажиллахаас гадна орон нутгийн засаг захиргаанаас ахмад настнуудад чиглэсэн бодлогод анхаарал хандуулахыг хүсэв.
Ерөнхий сайд Г.Занданшатар, ирэх онд тэтгэврийг 6 хувиар нэмэгдүүлэхэд нийт 333.5 тэрбум төгрөг зарцуулж, дундаж тэтгэврийн хэмжээг 901,000 төгрөгт хүргэхээр тооцож байна. Ахмад настнуудын тэтгэврийг нэмэгдүүлэх, амьдралын чанарыг сайжруулах зэрэг асуудал Засгийн газрын анхаарлын төвд байгаа. Нэн тэргүүнд холбогдох яамд болон Монголын Ахмадын холбоо хамтран ахмад настнуудын хөгжил, хамгааллын асуудлаар дунд хугацааны хөгжлийн хөтөлбөр боловсруулж гаргах шаардлагатай байна гэлээ.
Энэ жилийн төсвийн орлого 3,3 их наядаар тасарч, эдийн засгийн нөхцөл байдал хүнд байгаа. Энэ хүндрэлийг даван туулахын тулд Засгийн газар хэмнэлтийн зарчим баримтлан, хэмнэж болох бүх зардлыг танаж буй ч зайлшгүй зардал болох тэтгэвэр, тэтгэмж, хүүхдийн мөнгийг тасалдалгүй олгох бодлого баримталж буй. Төрөлт нэмэгдэж, ахмад настнуудын насжилт өндөрсөж буй учраас нийгмийн хамгааллын зардал тэр хэрээр өссөн. ҮСХ-ны тооцоогоор 2024 оны байдлаар нийт хүн амын 11.5 хувь нь ахмад настан байсан бол 2050 он гэхэд энэ үзүүлэлт 19.8 хувьд хүрч, таван хүн тутмын нэг нь ахмад настан болох төлөвтэй байна.
Засгийн газар хүний хөгжлийг дэмжих бодлогын хүрээнд ойрын 5 жилийн хугацаанд цалин хөлс, тэтгэвэр тэтгэмжийг олон улсын жишигт хүргэж нэмэгдүүлэх зорилт тавьсан. Ирэх сард Монгол Улсын хөгжлийн 2026-2030 он хүртэлх Үндсэн чиглэлийг УИХ-д өргөн барина. Энэхүү баримт бичигт ахмад настны талаар төрөөс баримтлах цогц бодлогыг тусгаж байгаа юм.
Уулзалтын төгсгөлд Ерөнхий сайд Г.Занданшатар Гэр бүл, хөдөлмөр, нийгмийн хамгааллын яам болон бусад холбогдох яам, агентлаг, төрийн бус байгууллагуудын оролцоог хангаж, ахмад настнуудын талаарх хууль эрх зүйн орчныг сайжруулах, тулгамдаж буй асуудлыг шийдвэрлэх чиглэлээр ажиллах Ажлын хэсэг байгуулах чиглэл өгөв.
Шударга мэдээ
Хяналтын улсын байцаагч нарын шийдвэрийн хууль зүйн үндэслэлийг шалгажээ
Нийслэлийн прокурорын газрын Зөрчлийн хэрэг бүртгэх ажиллагаанд хяналт тавих хэлтсээс дүүргийн прокурорын газруудын хяналтын харьяа эрх бүхий байгууллагын албан тушаалтны 2025 оны эхний хагас жилийн байдлаар зөрчлийн талаарх гомдол, мэдээллийг хүлээн авахаас татгалзсан, хэргийг хэрэгсэхгүй болгосон, 2025 оны 1 дүгээр улирлын байдлаар шийтгэл оногдуулсан зөрчлийн хэрэг бүртгэлтийн ажиллагаа хуульд нийцэж байгаа эсэхийг шалгасан байна.
Шалгалтаар Нийслэлийн мал эмнэлгийн газар, Дотоодын Цэргийн анги, Хөдөлмөр, халамжийн үйлчилгээний хэлтэс, Хүүхэд, гэр бүлийн хөгжил,хамгааллын хэлтэс, Татварын хэлтэс, Улсын бүртгэлийн хэлтэс, Онцгой байдлын хэлтэс, дүүргийн Засаг даргын Тамгын газрын Санхүү, төрийн сангийн хэлтэс, Цэргийн штабын хяналтын улсын байцаагч нарын шалгаж шийдвэрлэсэн, нийт 2831 зөрчлийн талаарх гомдол, мэдээллийг хамруулжээ.
Зөрчил шалган шийдвэрлэх эрх бүхий албан тушаалтны шалгаж шийдвэрлэсэн гомдол, мэдээллийг шийдвэрлэлтээр нь авч үзвэл 13.5 хувь буюу 383 зөрчлийн талаарх гомдол, мэдээллийг хүлээн авахаас татгалзсан, 3.5 хувь буюу 97 зөрчлийн хэргийг хэрэгсэхгүй болгож, 83 хувь буюу 2351 зөрчлийн талаарх гомдол, мэдээлэл болон хэрэгт торгох шийтгэл оногдуулсан байна.
Хяналтын улсын байцаагч нар “Иргэний улсын бүртгэлийн тухай хууль зөрчих” 1253, “Татварын хууль зөрчих” 414, “Галын аюулгүй байдлын тухай хууль зөрчих” 263, “Нягтлан бодох бүртгэлийн тухай хууль зөрчих” 142 зөрчилд торгох шийтгэл оногдуулсан нь хамгийн их байна.
Шалгалтаар эрх бүхий албан тушаалтан нь зөрчил шалган шийдвэрлэх ажиллагааг явуулахдаа холбогдох хууль тогтоомж, журмыг хэрэгжүүлж ажиллаагүй, үндэслэлгүй шийтгэл оногдуулж хүн, хуулийн этгээдийн эрхийг зөрчсөн нөхцөл байдлууд тогтоогджээ.
Нийслэлийн прокурорын газраас шалгалтын мөрөөр илэрсэн зөрчлүүдийг арилгаж, хүн, хуулийн этгээдийн зөрчигдсөн эрхийг сэргээх арга хэмжээ авах талаар дүүргийн прокурорын газруудад үүрэг болгожээ.
Тус прокурорын газраас хууль тогтоомжийг хэрэгжүүлэн ажиллах, буруутай албан тушаалтанд хариуцлага тооцуулах, хүн, хуулийн этгээдийн зөрчигдсөн эрхийг сэргээх чиглэлээр удирдлага зохион байгуулалтын тодорхой ажил арга хэмжээг авч хэрэгжүүлэх талаар Хөдөлмөр, халамжийн үйлчилгээний ерөнхий газар, Татварын ерөнхий газарт прокурорын шаардлага, Нийслэлийн Мал эмнэлгийн газар, Улсын бүртгэлийн ерөнхий газар, Хүүхэд, гэр бүлийн хөгжил, хамгааллын ерөнхий газар, Нийслэлийн Засаг даргын Тамгын газрын Санхүү, хөрөнгө оруулалтын газар, Онцгой байдлын ерөнхий газрын Гал түймэртэй тэмцэх газруудад хууль тогтоомжийг хэрэгжүүлж ажиллах, зохион байгуулалтын арга хэмжээ авахуулах хугацаатай үүрэг өгч, албан бичиг хүргүүлсэн байна.
Шударга мэдээ
Зөвшөөрөлгүй барилгын ажил эхлүүлсэн зөрчлийг арилгуулж байна
Сүхбаатар дүүргийн нэгдүгээр хороонд байрлах Үндэсний соёл, амралтын хүрээлэнгийн зүүн урд талд зөвшөөрөлгүйгээр барилгын ажил эхлүүлсэн зөрчлийг арилгуулж байна. Энэ хүрээнд НХШГ-ын дарга С.Энхбаяр болон холбогдох албаныхан тухайн байршилд ажиллалаа.
Тодруулбал, дээрх байршилд “Юби роботикс” ХХК саарал ус ашиглах зориулалттай автомашин угаалгын газар байгуулахаар Үндэсний соёл, амралтын хүрээлэнтэй түрээсийн гэрээ байгуулжээ. Тус компани барилгын ямар нэг зөвшөөрөлгүй, түрээсийн газартаа барилга барьж байсан зөрчлийг зогсоолоо.
Нийслэлийн Хяналт шалгалтын газрын дарга С.Энхбаяр “Улаанбаатар хотын иргэдийн эрүүл, аюулгүй орчинд ажиллаж амьдрах, зорчих нөхцөл бололцоог хангах үүднээс дагаж мөрдөж байгаа холбогдох стандартуудын хэрэгжилтэд хяналт тавьж ажиллаж байна. Улсын байцаагч холбогдох бичиг баримтуудыг шалгахад энэ байгууламж нь барилгын ажлын даалгаваргүй, барилгын ажил эхлүүлэх зөвшөөрөлгүй, Барилгын хөгжлийн төвд зураг төслөө батлуулаагүй зэрэг зөрчилтэй байсан. Тиймээс бид албан шаардлага хүргүүлж, барилгын ажлыг зогсоолоо. Тус байгууллагад торгуулийн арга хэмжээ авч уг байгууламжийг богино хугацаанд буулгуулна. Улсын байцаагчийн заасан хугацаанд компани тус байгууламжийг буулгахгүй бол улсын зардлаар нурааж, гарсан хөрөнгийг зөрчил гаргасан этгээдээр төлүүлнэ.
Мөн Үндэсний соёл, амралтын хүрээлэн энэ газрыг амралт, зугаалгын цогцолборын зориулалтаар ашиглахаар нийслэлийн Газар зохион байгуулалтын албанаас зөвшөөрөл авсан. Хотын төвийн А бүсэд зөвшөөрөлгүй барилга байгууламж бариулах эрх Үндэсний соёл амралтын хүрээлэнд байхгүй” гэдгийг хэллээ.
