Шударга мэдээ
НҮБ-ын Олон Улсын шилжилт хөдөлгөөний байгууллагатай хамтарна
Монгол Улсын Хүний эрхийн Үндэсний Комиссын гишүүд 2021 оны 3 дугаар сарын 15-ны өдөр НҮБ-ын Олон Улсын шилжилт хөдөлгөөний байгууллагын менежер Виктор Лютенког хүлээн авч уулзлаа.
Уулзалтын эхэнд ХЭҮК-ын даргын үүргийг түр орлон гүйцэтгэгч, гишүүн Ж.Хунан байгууллагын үйл ажиллагаа, ойрын болон хэтийн төлөвлөгөө, бодлого, стратеги, тулгамдаж буй хүний эрхийн зарим асуудлыг танилцуулахын зэрэгцээ Ковид-19 цар тахлын үед ХЭҮК бусад байгууллагатай хамтрах, ялангуяа НҮБ болон түүний төрөлжсөн байгууллагуудтай хамтран ажиллана гэж бодож байна гэв.
Тэрбээр ОУШХБ-ын төлөөллөөс Ковид-19 цар тахлын улмаас гадаадад гацсан Монгол Улсын иргэдийг эх орондоо ирэхэд нь туслалцаа үзүүлэхийг хүслээ. Мөн Монгол иргэд хүний наймааны золиос болох цөөнгүй тохиолдол байна гээд тус байгууллагын дэмжлэгтэйгээр гадаадад буй иргэдийн асуудлыг шийдвэрлэнэ гэдэгт найдаж байгаагаа илэрхийллээ.
Ноён Виктор Лютенко мөн байгууллагаа танилцуулж, шилжилт хөдөлгөөнийг дагасан хүний эрхийн асуудлыг шийдвэрлэх, сургалт, нөлөөллийн үйл ажиллагааг хамтран явуулахад татгалзах зүйлгүй гэснээр хамтын ажиллагааны санал солилцох уулзалт үргэлжлэв.
Уулзалтаар дотоодын шилжилт, хөдөлгөөн, шилжин суурьшигчдын бүртгэл мэдээллийн байдал, уян хатан бүртгэлийн систем бий болгох, төрийн үйлчилгээ, боловсрол дахь хот, хөдөөгийн ялгаатай байдлыг арилгах зэрэг асуудлаар санал солилцож, ХЭҮК-ын ажилтнуудад сургалт явуулах, хамтын ажиллагааг эхлүүлэх, цахим нөлөөллийн аян зохион байгуулах боломжийг судлахаар боллоо.
Тус арга хэмжээнд Монгол Улсын Хүний эрхийн Үндэсний Комиссыг төлөөлж, ХЭҮК-ын даргын үүргийг түр орлон гүйцэтгэгч, гишүүн Ж.Хунан, гишүүн Г.Нарантуяа, Д.Сүнжид, Б.Энхболд, Тамгын газрын дарга Ч.Алтангэрэл, ОУГЭХАХ-ийн дарга Ө.Ундрах, референтийн үүргийг түр орлон гүйцэтгэгч Э.Цэнгэл, НҮБ-ын Олон Улсын шилжилт хөдөлгөөний байгууллагыг төлөөлж, ОУШХБ-ын менежер Виктор Лютенко, хөтөлбөрийн ажилтан Р.Оюунбилэг, Ю.Оюунхишиг нар оролцлоо.
Шударга мэдээ
Манай улс НҮБ-ын хүний эрхийн зөвлөлд дөрөв дэх тайлангаа хүргүүлнэ
“MONGOLIA-EU HUMEN RIGHTS DIALOGUE” буюу “Монгол Улс-Европын Холбооны хүний эрхийн яриа хэлэлцээ” сэдэвт уулзалт Гадаад харилцааны яаманд боллоо.
Европын холбоо болон манай улсын хүний эрхийг хамгаалах чиглэлээр үйл ажиллагаа явуулдаг төрийн байгууллагууд, ХЗДХЯ, ГБХНХЯ-аас хэлэлцүүлэгт оролцож, Хүний эрхийн олон улсын байгууллагаас манай улсад өгсөн зөвлөмжийг хэрэгжүүлэхэд хэрхэн анхаарч ажиллаж байгаа талаар мэдээлэл өглөө.
Өнгөрсөн жил НҮБ-ын Хүний эрхийн зөвлөлд манай улс Хүний эрхийн төлөв байдлын дунд хугацааны тайланг хүргүүлсэн.
2025 онд Хүний эрхийн төлөв байдлын дөрөв дэх тайлангаа хүргүүлэхээр ажиллаж байна.
Манай улс Хүний эрхийн олон улсын байгууллагаас өгсөн зөвлөмжийг хэрэгжүүлэх үйл ажиллагааны төлөвлөгөөг баталж, төлөвлөгөөний хэрэгжилтэд хяналт тавих орон тооны зөвлөлийг байгуулсан.
Энэ ажлын хүрээнд ядуурлыг бууруулах чиглэлээр хэрэгжүүлж буй бодлого, шийдвэрийн талаар ГБХНХЯ-наас танилцууллаа.
Монгол Улсын Засгийн газрын 2024-2028 оны үйл ажиллагааны хөтөлбөрт хүний хөгжлийн үзүүлэлтийг 10 байр ахиулж, ядуурлын түвшнийг 2 дахин бууруулах зорилтыг тусгасан.Мөн “Алсын хараа 2050” Монгол Улсын урт хугацааны хөгжлийн бодлогод 2030 он гэхэд ядуурлын түвшнийг 15 хувь, 2050 онд 5 хувь болгон бууруулах зорилт тавьсан. Эдгээр зорилтыг хэрэгжүүлэхээр ажиллаж байна.
Шударга мэдээ
Б.Жавхлан: Гадаад валютын улсын нөөц таван тэрбум ам.долларт хүрлээ
Уул уурхайн бүтээгдэхүүний экспортыг нэмэгдүүлэх, гадаад валютын улсын нөөцийн нөхцөл байдлын талаар Сангийн сайд Б.Жавхлан Засгийн газрын хуралдаанд мэдээлэл хийлээ.
“Монгол Улсын Ерөнхий сайдын захирамжаар экспорт нэмэгдүүлж, тулгамдаж буй асуудлыг шуурхай шийдвэрлэх үүрэг бүхий Ажлын хэсэг уул уурхайн экспортод тулгараад буй асуудлыг цогц байдлаар шийдвэрлэж, экспортыг эрчимжүүлж, гадаад валютын орох урсгалыг нэмэгдүүлэх арга хэмжээ авч ажиллаж байна. Тус Ажлын хэсгийн дарга, Сангийн сайд Б.Жавхлан,
Нэгдүгээр улирлын нийт дүнгээр нүүрс 17.4 сая.тонн, төмрийн хүдэр 1.8 сая тонн экспортолсон нь өмнөх оны мөн үетэй ижил түвшинд байгаа бол зэсийн баяжмалын экспорт 456 мянган тоннд хүрч 24 хувиар өссөн дүнтэй байна.
Ажлын хэсэг банкны салбарын төлөөлөлтэй уулзаж, гадаад валютын улсын нөөцийг хамгаалах чиглэлд хамтран ажиллах талаар хэлэлцэж, Санхүүгийн тогтвортой байдлын зөвлөлийн хурлаар холбогдох асуудлыг шийдвэрлэж, бодлогын зөвлөмж гарган ажиллаж байна.
Энэ сарын 1-ний байдлаар гадаад валютын улсын нөөц өмнөх долоо хоногоос 305 сая ам.доллароор нэмэгдэж, таван тэрбум ам.долларт хүрлээ гэж мэдээллээ.
Шударга мэдээ
Хөдөлмөрийн хөлсний доод хэмжээ 792 мянган төгрөг болж нэмэгдлээ
Хөдөлмөр, нийгмийн түншлэлийн гурван талт үндэсний хорооны 2024 оны аравдугаар сарын 7-ны өдрийн 03 дугаар тогтоолоор Хөдөлмөрийн хөлсний доод хэмжээг 20 хувиар нэмж тогтоосон. Ингэснээр өнөөдрөөс эхлэн хөдөлмөрийн хөлсний доод хэмжээ 792 мянга болж нэмэгдэж байгаа.
Хөдөлмөрийн хөлсний доод хэмжээг 1995 оноос хойш жил бүр нэмэгдүүлж ирсэн. Тухайлбал, 1995 онд хөдөлмөрийн хөлсний доод хэмжээ 9600 төгрөг байсан. Үүнээс хойш жил бүр тогтмол өссөнөөр 2011 онд 140 мянган төгрөг болгож байсан. Түүнээс хойш хөдөлмөрийн хөлсний доод хэмжээг найман удаа нэмэгдсэн.
Хөдөлмөрийн хөлсний доод хэмжээг шинэчлэн тогтоосноор 792 мянган төгрөгөөс 106320 төгрөгийн НДШ төлнө. Өөрөөр хэлбэл, хөдөлмөрийн хөлсний доод хэмжээ 20 хувиар нэмэгдэж үүнийг дагаад нийгмийн даатгалын шимтгэл нэмэгдэнэ.
